Инстаграм йгьи ВКонтакте соцсетква рпны уагIа щардагIв ъаталуа «Абаза history» паблик гIанзыршаз, Москва апны йгIаныршу АААК ашта совет йалу КIарма Марйана Адуней апсуа-абаза конгресс лцхърагIан абаза бызшвала бжьыла йгIву книга анцIарала апроект лырхъйатI. Книгата йгIалылхыз ХХ асквшышв ахъаква рагIан Россия апны Октябрь революция аныншуз абазаква Осман империя ахьыла йшхъысуаз йгIаквчважвауа ТхIайцIыхв Бемырза йроман «Нышв напIыкI» акIвпI.

Апроект гIалазгаз йшылхIвауала, бжьыла йгIву книга анылцIарныс асквш 2018 агIан лхъа йгIаташватI. Ауи агIан Марйана ахвыцква йырзынарху, асаби хъвлапны данщтIауцIахуа дыззурыдзыргIв йауаш аудиоматериал дазыпшгIун.

«Сара локI йа гIахIвахра сырзыпшгIун. Ауаса йа ахвыцква, йа адуква йырзынархата абаза бызшвала аудиоматериалкIгьи гьсмаутI. «Алашара» асайт йту алингафон апхьарасахIатква ракIвмызтын», – лхIватI ауи.

Абаза бызшвала бжьыла йаныта гIахIвахракIгьи Интернет йъатам акIвпI КIарма Марйана книга анылцIарныс ацIыхъва дтазыргылыз.

Аблогер йшылпхьадзауала, глобализация агIамта абызшва ауагIа йанрылаугауа йгIаугвынгIвра атахъыпI абызшва абжьы асоциал хабарргартаква рпны йуыргарныс магIын ду шаму. Ауаса ауи апш материал абаза бызшвала заджвгьи йгIанйымыршата лхIвитI.

«Сара сцри Хъвыжвду (Къарча-Черкес Республика апны йаъу акыт – аредакция ррытаразга) апхьарта адиректор КIьылдза Амра слачважватI. Ауи йшгIасалхIвызла, гIвырата йхIыму зымгIва ашвъабгъьы йаныта акIвпI йшаъу. Ауи агIан апроект рхъйара шатахъу ауысла кьангьашракIгьи гьсзыгIанымхатI», – йгIахIгвылыргIвытI апроект гIазхъвыцыз.

АААКи аблогер КIарма Марйани абаза бызшвала бжьыла йгIву книга анырцIатI

Аудиокнига йбжьыла йаницIатI абаза театр актер йгьи арежиссер, КъЧР апны гIатгара зму культура анхагIвы Быджь Амир, атехника уыс йырхъйатI амакъымршIыйагIв ХIашвцIа Асльанбакь.

КIарма Марйана йшгIахIалхIвызла, апроект ауысла «ажва гвымхакI заджвгьи йгьгIалайымхIвтI». Ауи йгIалылкIгIатI акнига ауагIа ажвылта йшаздзыргIвуа. АпхьартаквакI рдиректорква Марйана телефон йлызгIасын аудиокнига ашIчIвараква абаза бызшвала апхьарасахIатква рпны йшгIадрысабапуаш гIалархIвтI.

Апроект автор АААКгьи, ауи ЙхIаракIу асовет аунашвачпагIв Эгьзакь Муссагьи, аппарат аунашвахъцIагIв Таниа Кангьи дшырзыразу лхIватI.

«АлахI дизыразхатI Мусса ХIабальа йпа, ауи йбзирала акIвпI арат апроектква зымгIва шгIаншауа, саргьи [йазалху аблог сырцауата] смурад – абаза бызшва рыцIа уагIа щардагIв йдырдырра – сазычIвырхъитI. Анчва дизыразхатI Таниа Кан – ауи йанакIвызлакIгьи дуыздзыргIвыта апроект гIайгвынгIвырныс, ауи магIны амата йбарыквынгьи дацхърагIарныс дхIазырпI», – лхIватI КIарма Марйана.

АААК аппарат аунашвахъцIагIв Таниа Кан йгIахIгвалайыршвахтI а-Конгресс ахъада Эгьзакь Мусса агIсквша райхIа цIуата апсуа-абаза уагIа ргвбайара, рцIасква гIахчара йгьи тшауацIдрыхра ауыс ахча щарда шалайцIауа.

Черкес театр апьеса «Нышв напIыкI» Россия акультура аминистерства анкъвакъвра апны йайгIайтI

«ЗаманкI анагIвс хIара йгIахIгвынгIвытI апроект кIьыдаква ргIвра рыцIа уагIа щардагIв, аъачIвагIагIвчва гIаланаркIра шатахъу, ауи агIан закIы зчпарныс згвы йту зымгIва рылшараква гIадрысабапырныс амаль шрауаш. Абарауаса асквш 2018 агIан АААК апны Дискуссия клуб гIаншатI, ауи йапшым ауысква урылачважвара йахъазымкIва цри бызшва, литература, культура ртшауацIыхра, апсабара ахчара, апхьахьа шIаква цхърагIара драдзара знархару апроектква уырхъйа йъауаш айкьангьашыртахатI», – йхIватI Таниа.

Ауи йгIацицIахтI абаза уагIа ртурыхи ргвбайари уыла йгIацIалуата йгIазырбауата йхIыму ъамачIу гIайпхьадзауата Эгьзакь Мусса ауи атынха бжьыла йгIвыта, видеола йахъыхта йазкIкIра хачIвыта йшйыргылыз. Абарауаса йгIаншатI дахIвра зму «Амазара» проекти

асквш 2026-дза йырхъйара атахъыта йлырхыз апсуа-абаза (Абаза) уагIахъа рыбызшва, ртурых, рлитература гIахчарала йгьи тшауацIдрыхрала апрограмми.

«АААК а-Дискуссия клубгьи ауи анархарала йынхауа йалагатI. Йапхъахауата КIарма Марйана лылапш йацIата йхIырхъйаз проектхатI абаза бызшвала бжьыла йгIву акнига анцIара. ХIа йшхIпхьадзауала, аудиокнига йхIыщтагIайуаш абанпараква дырра рызгIаныжьра йахъазымкIва абызшва тшауацIнарыхрагьи йазынхитI. Ауи АААК ЙхIаракIу асовет аунашвачпагIв Эгьзакь Мусса йынкъвигауа, хIаргьи йхIылахIйыркIуа, йхIырхъйарнысгьи хIызквйыргвышхвауа аидеология йахъвхвыцкIпI», – йажва алйыргатI Таниа Кан.

ТхIайцIыхв Бемырза йроман «Нышв напIыкI» абаза бызшвала уаздзыргIвы йауаштI АААК ахабрргарта портал (ари агIвыра ацIыхъва), Вконтакте сеть – «Абаза History» паблик рпны. Уыжвласыла аудиокнига Youtube-гьи йгIатарцIуштI.