Абашта айсра Ду агIан йгIатыргаз АйгIайра йахъыцIуа асквш 74 Апсны апны Зыхьыз бергльльым айсыгIв йчвахъабага син хIврапшдза азыщтIарцIауата, айсчва рпарадла, архъа мацIауыртала йгьи «Аджьаль змам аполк» акцияла йдыртлапIатI.
Барганджиа Саид
Май а 9 атшын Апсны йартлапIатI ХХ асквшышв агIан рыцIа йщарычIвараз айсра – асквшква 1941-1945 рагIан йакIвшаз Абашта айсра Ду – апны йгIатыргаз АйгIайра Амш. Ареспублика шабгу апны агвыргъьахъв алалраква акIвшатI, рахIа уагIа щардагIв тшъазыркIкIыз акъала хъада апны акIвпI.
Щымтадза йалаган ауагIа айсра йаладзкваз хвы рыквырцIауата Зыхьыз бергьльым айсыгIв йчвахъабага син адзхъа йайззауа йалагатI. АсахIат а 11 ачвахъабага хIврапшдзи хIврапшдза алапи азыщтIацIара джвыквырцIатI. Ауи йалан ареспублика а-Президенти аунашвахъцIарта йалаквуи, апхьагIвчва, астудентква, акъала абзазагIвчва, Согъвыми Апсни рысасква.
Ари агIаншара асуратлента апшра>>
Диоскурква рдзатшпы урам апны айсчва рпарад акIвшатI. СынчIва ауи 11 щъагIв колоннакIта йшаз айсра къвырльыкъвхагIвта 400-гIв алан.
ЙалкIгIу лахIвара рылата ари агвыргъьахъв йапылитI айсра аветеранква. Асквш 2019 АйгIайра Амш йадахIвуата Согъвым ауат йрапшта йгIатахаз агIгIвызаджвыкI ракIвпI.
Агвыргъьахъв алалра йалаз аветеран Шульгина Валентина айсра агIан сквшы 20 мачIкI ацта ракIвын дызтаз. Ауи Берлиндза днадзатI, амедицина къвырльыкъвхара далейтенант ахIбата АйгIайра дапылтI. Ужвы сквш 96 дшыртугьи Шульгина Валентина сквшыкIгьи хълымрыпауа Зыхьыз бергьльым айсыгIв йчвахъабага син дазгIайитIта йлыцта йайсуаз лынбжьагIвчва гIалгвалашвитI. Шульгина Валентина бзидздзата йылдырхитI гIвзачва анлауаз йгьи йанылчвыдзуаз айсра асквшква.
«Сара сыхъазла айсра Сталинград апны йалагатI. Ауи ангIахIырхвитх амщтахь хIымгIва Курск-Орел гьагьара, Варшава, Вена, Прага йрылсын Берлиндза хIарцатI», – лхIват айсра аветеран.
Айсра аналга амщтахь Шульгина Валентина къвырльыкъв лхарныс Япония дцатI. Асквш 1953 агIан акIвпI ауи ар дангIарылцIх. Ауи амщтахь бзазара Апсны дгIайтI.
«Араъа схъацIи сари хIацгIайтI – ауи айсра агIан дмгIвагIарбагIвын. Араъа тдзы хIыргылтI, хIбзазарагьи араъа йцатI», – йгIацылцIахтI ауи.
Абашта айсра Ду йаладзкваз гIаргвалашвахтI Адуней апсуа-абаза конгресс ауысхагIвчвагьи.
«ЗымгIвадзугьи йхIзацалу ари «акод» – «АйгIайра Ду акод» – Апсны апынгьи адуней шабгу апынгьи йапшым абанпаракви ауагIахъакви аднакIылитI. ХIара ари ауыс ахъазгIваца хIгьалам – хIара йхIборчпI зхъа щтIазцIакваз рыхьыз хIхIварныс квырмышгьи рзыхIчпарныс», – лхIват АААК йаланакIуа апхIвысчва рсоветква рунашвачпагIв Ардзынба Гета.
Агвыргъьахъв йалан йцIасхаз «Аджьаль змам аполк» акция. Апхъала апшта сынчIвагьи ауи айсра йаладзыз, щтадъа йыдзыз йа афронт йгIахъынхIвыхта уахьчIва йаъахым рзаъачва рсуратква змата йгIайуаз уагIа щардагIв азнакIкIытI. ЩардагIвы рсабиква рыцта йгIайтI, йауа ухIварыквын ауи йжьыхьыдаз айсра афырква йгIадзынгылуа абанпараквагьи йырдырра атахъыпI.
«Абашта айсра Ду агIан саба йгIвайщчва црикI афронт йпшцIалын йгьгIацампахтI. Ауат Гулиа Кьаазыми Мектати ракIвпI. УахьчIва хIсабиква хIыцта ауат рсуратква хIымата «Аджьаль змам аполк» хIрылагыла хIгIамгIвайстI», – лхIватI акция йалаз Гулиа Виолетта.
Ари атшын Зыхьыз бергьльым айсыгIв йчвахъабага син адзхъа архъа мацIауырта андыргIалтI. Ауаъа дасузлакIгьи йтахъызтын айсчва йырфуз амамырса апш жвпIата йаларцIуз ачайгьи ацта йшIайыршва ауашын.
Абашта айсра Ду агIан йгIатыргаз АйгIайра Амш – май а 9 – ансисквша Россия йахъазымкIва Совет Союз йгIаланакIуаз анахьанат аштаква рпынгьи датша къраль щарда рпынгьи йдыртлапIитI. Абашта айсра асквшква рагIан апсынчIвыла йтыцIын афронт йпшцIалтI зкьы 55-гIв райхIа, ауат йрыуата 15500-гIв апсыуан. Айсра афронтква рпны йайсытI абазатагьи 3000-гIв райхIа.
швталра йа тшаншвцIара атахъыпI.