Барганджиа Саид

ЙхIаракIу асовет аунашвачпагIв Эгьзакь Мусса, архъйагIв секретарь Гицба Инар злу АААК аделегация амтшаша октябрь а 21 атшын Трыкв Республика нхара уысла йцатI. Ауат мурадта йрымапI уахьчIвала Трыквшта апны йынхауа апсуа-абаза жвлара адкIылараква йрабадырныс, йхIватI АААК архъйагIв секретарь.

«ХIара хIгвыгъитI апсуа-абаза уагIахъа рацзакIыра арыбагъьара, хIапхъанчIвиква йхIызгIаныржьыз агвбайара тшауацIнарыхра, цри бызшва агIащаквыжьра знархару а-Конгресс анхара йзацхърагIуш агIвычIвгIвыс джьгарква хIуыс йгIаланахIыркIырныс», – йгIаликIгIатI Гицба Инар.

АААК ауысхагIвчва ари гIванхауата Трыквшта йцитI.

«Йапхъахауата ауаъа хIанаъаз хIара хIызламгIвайсуаш анархараква лыхIхтI. Ужвы ауи агIан хIызлачважваз ауысква рыцIа йауацIыхта, йалыргата хIрыквчважвата рырхъйара хIызджвыквцIушта хIгвыгъитI», – йхIватI Гицба.

Анйараква Астомбыль, Анкара къалаква йгьи Сакарйа шта рпны йакIвшуштI.

ЗымгIвагьи шазпшуала, ауат анйараква рпны а-Конгресс йгьи Трыквшта йаъу апсыуа культура квтаква р-Федерация (Апсуафед), Трыквшта апны КIавкIаз ауагIахъаква ркультура квтаква йрапшу ажввлара йгьи адиаспора адкIылараква рацынхарала йалыргу, йалакIу ахачIвква лырхуаштI.

Йара ауи апшта йалыргата йлырхра рмурадпI Трыквшта апны а-Конгресс ауысхартаква рыргIапсщи Трыквшта апны АААК анхарала ахачIвкви.

Адуней апсуа-абаза конгресс ауыснкъвгагIвчва Трыкв Республика апны октябрь а 25-дза йаъазлуштI.