Къарча-Черкес автоном область агIаныршара йахъыцIуа асквш 100 йадахIвуата йакIвшауа Къарча-Черкес Республика ауагIахъаква рлитературакви разъазари рдекада йаланакIуата Черкесск, ареспублика къральыгIва библиотека апны йгIахъыртIытI абаза литератури азъазари рымшква «Ацри тшгIва амца апсыпнкъвгара».
Айсан Людмила
Февраль а 6 атшын Черкесск Байрамыкъва Х. лыхьыз нкъвызгауа ареспублика къральыгIва библиотека апны йгIахъыртIытI абаза литератури азъазари рымшква «Ацри тшгIва амца апсыпнкъвгара». Ауи Къарча-Черкес автоном область агIаныршара йахъыцIуа асквш 100 йадахIвуата йадгалу ареспублика ауагIахъаква рлитературакви разъазари рдекада йаланакIуата йакIвшитI.
Агвыргъьахъв айззара гIахъитIытI Россия агIвгIвчва радкIылара йгьи ажурналистква радкIылара йрылу, абиблиотека аунашвачпагIв Хапчаев Салых. Ауи «ареспублика йтабзазауа ауагIахъаква рыбызшваква, ркультура йгьи разъазара ргIахчара йырзынархата асквш аурала йакIвдыршуш анхара» даквчважватI.
«ХIызту асквш хIара хIыхъазла магIны зму атурых гIаншараквала йырчвыпI. ЙалкIгIата, сынчIва Къарча-Черкес автоном область агIаныршара йахъыцIитI сквшы 100, датшагьи ауи йахъхIвалгIапI «Къабард-Балкъар Республика йгьи Къарча-Черкес Республика райгвара асквш» йгьи «Атеатр асквш», - йгIаликIгIатI Салых Уасыф йпа.
Агвыргъьахъв айззара йалан Къарча-Черкес Республика акультура аминистр Барокъва Рамазан, ареспублика ауагIахъаква, йауацIыху акоммуникацияква йгьи агIацIщтраква руысла аминистр ХIапышвт Мурат, датшагьи ареспублика акультура йгьи арыпхьара ауысхагIвчва, ауагIахъа жвлара адкIылараква ргIащтийыгIвчва.
Айззара асас, Къарча-Черкес Республика асатинква рыжвлара адкIылара «Фарн» аунашвачпагIв Хетагуров Олег дгIачважвауата «абызшви акультури ргIахчара йахъазымкIва ауагIахъаква раргванчIври райгвара арыбагъьари руысла» ари йапшу агвыргъьахъвква радгалра амагIны шдуу гIаликIгIатI.
«ХIара зымгIвагьи хIагвлачвата хIбзазитI, азаджв азаджв пIатIу йыквхIцIара, хвы йзыгIбара атахъыпI, уахьчIва анйара йапшкву рбзира хIуагIахъаква ртшауацIыхра йазынарху сабап ду алапI», - йгIаликIгIатI ауи.
Абаза литератури азъазари рымшкIва йгIарыцIанакIуата датшагьи йгIахъыртIытI акнигакви асураткви ргIарбарта «ЛахьыкIла хIаларпапI анцIрала». АгIарбарта абаза уысагIвчва, агIвгIвчва дуква рыршIыйарала, агазетквала, ажурналквала, йцIыхъвахауа асквш ауацIа абиблиотека йгIадыргалыз агIацIщтра шIыцквала йадгалапI.
Айззара йахъвхъадата йакIвшатI алитература хъвлапны «Азаман йапхъысыз ауысагIв». Ауи йбергьльу абаза уысагIв Мыхц Кьарим йхъыцIуа асквш 70 йадахIвуата йадгалан. Ари аюбилей йазынархата йгIахъыртIытI ауысагIв йазкIкIраква йгьи йбзазари йыршIыйари йгIарыквчважвауа агIвыраква ргIарбарта.
Къарча-Черкес Республика апны йаныргIалу «Алашара» адкIылара ауысхарта аунашвачпагIв Мыква Мурат ахъвлапын адгалагIвчви асасчви йдйырбатI Адуней адкIылара «Алашара» рцхърагIарала йгIацIцIыз гIвкнига шIыцкI – Цекъва Пасарби йтрилогия «Ащхъаркт ащахахра» йгьи Мыхц Кьарим йуысаква разкIкIра «ГIайхра».
Агвыргъьахъв айззара дрыпшдзатI ауагIа ашваква, агIахIвраква, ацIаснкъвгара йгьи абаза суратгIвгIвчва йгьи анапIлачпара-рыпшдзара ршIыйагIвчва рынхараквала йадгалу агIарбарта.
Абаза литератури азъазари рымшква йрыдахIвуата йгIахъыртIыз агIарбартаква Байрамыкъва Х. лыхьыз зхъу ареспублика къральыгIва библиотека апны февраль а 15 агIандза йынхуштI.
швталра йа тшаншвцIара атахъыпI.