IХ акультура-спорт фестиваль «Абаза» акIвшатI Къарча-Черкес Республика апны июль а 21 йгIашIарышвта а 23-дза. Сынчва ауи йаланакIтI Абаза уагIа рхъвмарраква, Акультура амш йгьи апсуа, абаза бызшваква асабигIзартаква рпны тшауацIдрыхра ауыс йазынархаз ауатыкв айчважвара.
Асквш 2014 йгIашIарышвта АААК ЙхIаракIу асовет аунашвачпагIв, «Алашара» адкIылара апрезидент Эгьзакь Мусса йгIаджвыквцIарала «Абаза» культура-спорт фестиваль акIвшалитI. СынчIва ауи адгалра йгIалалтI Абаза уагIа рспорт академия.
Афестиваль КъЧР йаланакIуа Адыгьа-ХIабльа район йауу Апсуа кыт апны йакIвшаз ахъвмарраквала йгIахъыртIытI. АтшрыгIвырта апны уагIа зкьыгIвпхьадзара тшазыркIкIытI: анкъвакъвраква йрылаз, акытква рбзазагIвчва, Россия йапшым ашIыпIакви агIвыма къралькви йгIартыцIыз асасчва.
ЙгьспортгIвацам
Ахъвмарраква рпрограмма 11 спорт квпшыракI аланакIуан: апхъаныгIвра, мини-футбол, волейбол, хысра, хрихыцаущтра, нахъгIахъра, хIахъваущтра, махъвшIала абакIра, ащъахъалра, гирьщтIыхра, пара.
Акытква ргвыпква ракIвымкIва йанкъвакъвырныс лшара рыман апшыгIвчвагьи – згвы йазгIайуаз дзачIвызлакIгьи йапшым ахъвмарщаква – дартс, петанк, шахмат-агьиква – дрыс йауан. Ахъвмарраква йрылан КъЧР йауу абаза кытква, Москва къала йгьи Апсны йгIадыргылыз 11 командакI.
«Ари хысквшахауата Абаза уагIа рхъвмарраква хIрылазлитI. ХIара йшхIылшауала ансисквшагьи акоманда гIахIыршIыцлитI, чкIвыныргIа йрыуата рыцIа щардагIвы ахъвмарраква йшгIайуаш апшта. Ажва гьалам, аспорт гIарбараквагьи магIны рымапI, ауаса хIайщчва абазаква хIъарынйауа, хIъарабадыруа ага айгIайра йрыхвпI. Араъа ахIауа рахIматла йшырчву ажвала йгьузыхIвушым, анкъвакъвраква йанакIвызлакIгьи апшта швабыж бзита йадгалапI. ХIара хIгвып 37-гIв хIнадзитI, зымгIвагьи айгIайра азабакIра йазгIашыкъпI, хIспортсменква рыуа азджьакI бзита тшгIадырбахьатI. АгIарбара бзиква хIрайгвгъитI!» – йхIватI Апсны агвып ркапитан, чкIвыныргIи спорти тшауацIдрыхрала АААК ахъвшара аунашвахъцIагIв Берзениа Валерий.
Ахъвмарраква ангIахъыртIуаз цIыпх анкъвакъвраква рпны апхъагылара зкIыз ЙынджьыгьчкIвын ргIащтийыгIвчва йтыргаз асога хъада ачагьарейква йрырттI.
ЙгIайззаз тшырзынадырхауата йгIачважватI АААК ЙхIаракIу асовет аунашвачпагIв, «Алашара» адкIылара апрезидент Эгьзакь Мусса, Апсны Республика репатриацияла АкъральыгIва комитет аунашвачпагIв, апсуа делегация рахIба Харазиа Вадим, Абаза уагIа рспорт академия апрезидент Тльыс Мурат, Абаза уагIа рахIбачва рсовет аунашвахъцIагIв Аубакь МухIадин, самбола адуней ачемпион ГIвыкIьа Рамед, КъЧР акультура аминистр Агырба Зураб, КъЧР аспорт аминистр Узден Ращид, Адыгьа-ХIабльа район аунашвахъцIарта ахъада Астежев Мыхвтар, Апсуа кыт аунашвахъцIарта ахъада КIвыждза Ануар.
«Арат йакIвхIыршауа ахъвмарраква аспорт, атгIачва, ацзакIыра рыхв щтIызхуа уагIахъа гвыргъьахъвта йщаквгылхьатI. Угвы йалахIитI сквшигIадзагьи ауат рыцIа-рыцIа штшауацIырхуа анубауа. Ауи ауагIа хIпрограмма рыцIа цIолата йгIаргвынгIвуамцара, йхIчпауа зымгIва ззыхIчпауа тшазырдыруамцара йшгIалалуа йаквшахIатхитI. Спорт – ауи йгьызгIвадарагIвацам, уымч йаланархIагIвацауатагьи йгьаъам. Аспорт, азгIвадара, агвыргъьара, анашх пшдзаква хIрылата хIара чкIвыныргIа руагIахъа, ркъраль бзи йырбауата йгIадзынхIыргылитI. ХIара хачIв хъадата йхIыргылуа хIыуа дзачIвызлакIгьи дъанызлакIгьи хIуагIахъа пшдзата йшгIайырбуш акIвпI», – йгIаликIгIатI Эгьзакь Мусса.
СынчIва йапхъахауата ахъвмарраква рагIан тшы гIадрыгIвтI. АтшрыгIвраква анкъвакъвраква рпрограмма йгьаланамкIуазтI, ауаса йгIайззаз зымгIва рыла дырпшытI. Атшква рпшдзара, ауат рымчи рласыри апшыгIвчва рыуа заджвгьи гвалымста дгьгIанырмыжьтI. Атшчва метр 1600 йгьи 2000 рпны хвын йгIагIвтI. АйгIайыгIвчва акубоккви ахча согIакви рырттI.
Ахъвмарраква радгалра ркъару аларцIатI уагIа щардагIв – акыт абзазагIвчва джьгарква, ахIбачва, апхIвысква рсоветква, абзихагIвчва.
«Акыт абзазагIвчва, «Алашари» Абаза уагIа рспорт академии рынхагIвчва, датшагьи щардагIвы рацзакIыри рацахъри рбзирала уагIата 6000-гIв райхIа азызкIыз гвыргъьахъв ду акIвшатI. Ахъвмарраква абаза кытква йырхъазымкIва хIайщчва апсуаквагьи Москва йгIатыцIта йгIайыз агвыпгьи рылапI. Анкъвакъвраква хIара хIабадырра дрыбагъьитI, хIацзакIыри хIымчи йрыздырхIитI!» – йгвгIанаграква хIыцагIвишатI Абаза уагIа рспорт академия апрезидент Тльыс Мурат.
Абаза уагIа йжвбахуз рхъвмарраква рпны айгIайра Къвбина кыт йыргатI, йгIвбахауа агыларта айынджьыгьква йыркIытI, йхпахауа – Гвымлокт.
Апсны акоманда волейболла «рызна» гIатнагатI. АтшрыгIвраква рпны ангьльыз щацкьа ткъвым метр 2000 йангIагIвуаз зымгIва рапхъа йгIадзатI хIабашталагIв Цышба Нодар йтшы Радеда. АсогIаква зымгIва анырша амщтахь хIапхъа ахъвмарраква акIвдыршарныс акьазу рквнадыргауата ахIальуахъылпа Хъвыжвду кыт абзазагIвчва йрырттI.
АуысхагIвчва ранйараква
Акультура-спорт фестиваль апкъ йтата СогIвым акъала айззара адепутатква Черкесск ахъада Дедук Валерий йынйатI. Апсуа уысхагIвчва ргвып йалан адепутатква Берайа Игорь, Квтарба Роман, Календжян Айк, Инапщба Денис йгьи Багапщ Сергей йыхьыз зхъу аспорт тдзы адиректор Эшба Батал. Ауат агIвреспубликакI рпны спорт, туризм, кыт млыкврхIара тшауацIдрых йшауаш йаквчважватI.
Черкесск апны «АсабигIзартаква рпны абаза бызшва тшауацIнарыхра ауыс уахьчIвала йшаъу йгьи апхъахьыла йцара шатахъу» ахьызта уатыкв айчважвара акIвшатI. Ауи йалан Къарча-Черкес йауу арыпхьари анауки рынхагIвчва. ЙгIачважватI ауаъа йдрайгваз асасчвагьи – Апсны арыпхьара аминистр йапхъахауа йтарагылыгIв Кварчелиа Ади Педагогика аинститут апхьарта йыцIамылс асабиква рарыпхьарала аъачIвагIагIв Джениа Римми.
«ХIара цри бызшва тшауацIнарыхра апны хIзынйауа абаргвыраква гIахIхIватI, арыпхьара а-Министерства йылнахыз апхьагаквагьи гIахIырбатI. ХIаргьи гвыхътIыла йгIахIачважватI, абызшва ауысла хIзынйауа абаргвыраква апшыпI. Абызшва – агIвычIвгIвыс йуагIахъа тшдырра йагIарбага хъадапI, араъа хIара хIадгылта ауат абаргвыраква хIрайгIайра атахъыпI», – лхIватI Кварчелиа Ада.
Агвыргъара апны тшадкIылра
Абаза уагIа ргвбайара амш, цIаста йшщаквгылыз апш, июль а 23 – Апсны Республика АкъральыгIва баракъ амш агIан йдыртлапIитI. «АдзыгIвбжьа йачIва» парк апны анапIлачпараква ргIарбартаква тшауацIырхтI, рдзамгIваква сурат ъарнырцIауа, кIарт ъархъырхуаш атыпква азалырхтI.
Ауи акIвымкIвагьи йапшым анкъвакъвраква адыргалтI – зуагIахъа фаша рыцIа йпшдзу, абаза бызшвала уыса рыцIа бзита йгIапхьауа.
Апахь апны йгIандыршаз агваран чкIвыныргIа гIатымцIуата йгIахIвуан, агьагьара йалагылаз агIарбартаква рпны асасчва ауагIа разъазара тшахадыргIвазун, абаза фачIвква рхъагIара дырхъвыхуан.
«Сквшипхьадза ари алалра рыцIа-рыцIа тшауацIнахитI. Ари азын анапIлачпараква йырпщылу ауагIа рыцIа щардагIвыта йхIзазкIкIтI. АйхIарагIв дара йыртахъхатI йгIайта рнапIы йачпауа гIадырбарныс – ауи швабыжта хIаргвыргъьитI. ХIкультура тшахадыргIвазарныс лшара рыман Къарча-Черкес Республика йту ауагIахъаква зымгIвагьи, йхIыгвлу аштаква йгIартыцIта йгIайыз асасчвагьи», – йхIватI «Алашара» адкIылара аунашвахъцIагIв Гьадыгв Мурат.
Хъвлапны зымгIвадзугьи амфитеатр йнашылын ауагIа бзи йырбауа абаза йгьи апсуа артистква злаз аконцерт йапшытI. Ашвипхьадза, гIахIврипхьадза апшыгIвчва напIасара дула йапылуан. Апсны йауата ауатыкв йгIаталтI ашвахIвагIвчва Тшыжвба Абзагв, Перцхелиа Валерия, Габниа Саиди ауи лбжьамата шIакви, Джумутиа Ираклий.
Абазата 2000-гIв райхIа азызддаз агвыргъьахъв фейерверк пшдзала йалгатI. Асасчва ари амш ргвы йшгIатахуш убауата рнашхква щтIыхта йамцIыцIхтI.
швталра йа тшаншвцIара атахъыпI.