АААК ЙхIаракIу асовет аунашвачпагIв Эгьзакь Мусса абаза уагIа ртурых архъвыхра нхара «Абаза ренессанс» йадынхалыз дрыуазаджвыпI.
Барганджиа Саид
Москва апны абаза уагIа ртурыхи ркультури йгIарыквчважвауа акнига «Абаза ренессанс» йапхъахауа атом гIацIцIтI. Ауи йадынхалтI АААК ЙхIаракIу асовет аунашвачпагIв Эгьзакь Мусси Россия апны йбергьльу апхьахьа Емельянова Надежди.
Эгьзакь Мусса акнига агIацIщтра даквчважвауата йшгIаликIгIазла, Адуней апсуа-абаза конгресс йгьи адуней адкIылара «Алашара» ауагIахъа бызшвакви акультура цIаскви ргIахчара знархару нхара ду акIвдыршитI йгьи акнига «Абаза ренессанс» «йауацIыху ауи анхара йахъвыпI».
АААК ЙхIаракIу асовет аунашвачпагIв йширытамамызла, акнига адынхалра йаквзыргвышхваз ари акIвпI: йгIадзынгылуа апсуа, абаза абанпараква руагIахъа турых дырдырра, ауи шддырдыруаш йаквгIазшIытра атахъыпI, йауа ухIварыквыквын сквшызкьпхьадзара рурала абаза уагIа чвгьара щарда рчва йтшатI, йгIаншун ауагIахъа рыквчвгIара ашварагIварара апны йаннадзузгьи.
«Сара швабыж сгвыгъитI ари анхара хIуагIахъа ртшауацIыхра ащапIы швабыж йызрыбагъьуш, змагIны дууызлуш щъахушта. ЗымгIва рпынгьи йбергьльыпI ажважв: «Зтурых зымдыруа ауагIахъа пхыцIа гьрымам». Арат ажваква рмагIны уахьчIвала зынгьи йапшымкIва швабыж йдупI. Акнига гIацIцIхьатI, уыжвласыла йыртиуа йалагуштI. Датша хъатакIла йгIауахвырквын ауи йджьащахъву турыхдырра нхарапI, ауи апны дзачIвызлакIгьи йызгIауаштI джьащахъвара щарда. ХIара, йсыцадынхалуази сари, апхъала змагIны дуу чIвырхъакI атыхIптI – апхъанчIвидза заман йгIашIарышвта хIуагIахъа ртурых шгIамгIвайсуаз шIыц-шIыц хIаквчважвахитI», – йхIватI Эгьзакь Мусса.
«Абаза ренессанс» йгIвыджьхауата йадынхалыз аурышв турыхдырыгIв, амарагIайыртадырыгIв, ажурналист Емельянова Надежда лакIвпI. Ауи йшгIалылкIгIазла, акнига апны абазаква ртурых йраргвандзу ауагIахъа – апсуаква – ртурых йапщылата йгIарбапI. Ауи йшылхIвазла, акнига апны арат агIвуагIахъакI ртурыхлагьи ркультуралагьи йшазакIу гIарбапI, апхъала «Абаза ЧIвыла» – хIва йызпхьуз аполитика, ажвлара йгьи акультура шта атурых гIащаквыргылхпI.
«Абаза ртурых – щардала йакIвшуз айсраквала, йауырамыз амамырра гIамтаквала йалапI, рагъачва йырпшIагылата рпсадгьыл шгIархчуз, рыгвлачва уагIахъаква йрангIалуата, мамырта йшрыцбзазуз гIазырбауа турыхпI. Ашвъаква йшгIадырбауала, абаза уагIахъа рымч дудздза, ртурых ашвапха бзи йагIахчагIвыта йщаквгылтI – ауат арыцхIагIаква йгIарыцIсуа, абаргвыраква йрайгIайуа йгIамгIвайситI, рахIа йхьанту агIамта йанташварагьи йызлагIащаквгылхуаш акъару гIарылцIитI», – лхIватI автор.
Ауи йшгIалылкIгIазла, атурых ршIыйара знархару агIвыраква, ауагIа рбзазаща гIазырбуз, арыпшдзага суратква, ауагIахъа фаша ачпаща руысла швабыж дылцхърагIатI Черкесск апны йаныргIалу «Алашара» адкIылара ауысхарта аунашвачпагIв Мыква Мурат.
Эгьзакь Мусса агIацIщтра йадынхалуаз агвып зымгIва дшырзыразу йхIватI, кIьыдата йгIаликIгIатI аредактор Филиппова Татьяна лынхара: ауи ацитатаквали ажважвквали йалата хъвипхьадза эпиграф тамам ахъадзлыргылтI.
А-Конгресс ЙхIаракIу асовет аунашвачпагIв йшихIвазла, «йалацIара ахв узымшвушта йдупI» агIацIщтра йаредактор хъадаз, адунейла зыхьыз бергьльу апхьахьа, Россия анаукаква р-Академия йаланакIуа амарагIайыртадырра а-Институт аэкс-директор, Апсны анаукаква р-Академия апны чIахI змаз академик Рыбаков Ростислав Борис йпа (1938-2019).
Эгьзакь Мусса кIьыдата лыхьыз йхIватI акнига асуратква радгалагIв, анкъвакъвра«Лермонтов-2014» йапхъагылагIвхаз Петербург апны йбергьльу асуратгIвгIвы Граблевская Ольга. Авторква шаквшахIатхауала, атурых йаквыргIапсдзу асуратква лчпара ахъазла ауи Россия амузейкви аршIыйара фондкви рпны нхара ду акIвлыршатI.
«Лермонтов йгIвыраква суратла йадызгалуа ари аршIыйагIв цIолата йлылалхIвитI КIавкIаз алкIгIараква. Йхвиту ауи лджыпха майра агIацIщтра аквпшыра арыпшдзатI», – араса йпхьадзитI Эгьзакь Мусса.
Акнига «Абаза ренессанс» уыжвласыла аткванква йгIарыцIарцIуштI. АгIацIщтра рзынархапI ацивилизациякви акультуракви апызщылуа КIавкIаз атурыхи алкIгIаракви зымагIальамату апхьагIвчва зымгIвагьи. Авторква йшырпхьадзауала, акнига сабап рызгIалхуаштI ауагIахъа уыскви ауагIахъа азазаъащакви зъачIвагIала йрыдынхалуа аполитикква, ажвлара йгьи акъральыгIва уысхагIвчва.
швталра йа тшаншвцIара атахъыпI.