Барганджиа Саид

АААК ЙхIаракIу асовет аунашвачпагIв Эгьзакь Мусса абаза уагIахъа йгIарыцIанакIуа зымгIва йгIаталуа асквш 2021-ла драйхIвахIвтI.

Ауи йгIаликIгIатI асквш 2020 хьантата йшгIацIцIыз: щардагIвы рцриква, рыгIвзачва аргванква рчвыдзтI – ауат бзи йызбауа зымгIва ргвква анцIрала йыртазлуштI.

Ага ауаса йаъазтынгьи Эгьзакь Мусса бзира щардагьи шаъаз ауагIа йгIаргвалайыршвахтI, ауат абзираква йрыуапI саби щардагIв адуней йъагIаквлыз. АААК ахъада дшапшуала, ауи хIара уахьчIвамшгIвацала хIымбзазауата хIуачIвымш хIшазынхуш хIазнархъвыцитI.

«ТгIачва дукIта йспхьадзауа хIуагIахъа йрызсыму абзибара, гIвычIвгIвысипхьадза, сабипхьадза рылахь шцуш ахъаз аджьауапкIра, йхIырхъйара атахъу хIапхъанчIвиква ргвыгъараква, Анчва йазхъацIара ракIвпI сара ари схъвдаквцIара нкъвызгарныс саззыргвышхвауа. Сара йстахъыпI абаза уагIахъа тшгIащтIырххырныс, хIгвбайари хIцIаскви хIымрыдзныс, абызшва тшауацIнахырныс, абзири абзибари хъгалра ркIырныс. Апсни России руачIвымш лашарахарныс», – йхIватI Эгьзакь Мусса.

ЙхIвахIвра апны ауи ахIбачва тшырзынайырхауата ргIарикви ауат ран-рабачва йрызрыму, «бзибари айгвыгIври зыщату» азаъащи рбарыквын «атгIачва рцIыхъва шауырахушла» гвырбзига рымазларныс шырзыйтахъу йхIватI. Ауат рымщтахь Эгьзакь Мусса чкIвыныргIагьи драйхIвахIвтI.

«ХIысабиква, сара йшвзыстахъпI апхьара, аспорт, азъазара, зымгIва йрапхъахугьи – швкультури швыбызшви швабыжта бзи йыжвбарныс», – йхIватI ауи.

«Спсы йапшу, абаза уагIахъа йаднакIылуа сцриква! Асквш шIыц тгIачва гвыргъьахъвпIта – унагIвипхьадза бзибара, абагвынгIвра, згIвадара, тынчра, пхара гIвназтI. ЗымгIвагьи йшвзыстахъпI асквш 2021 агIангьи багъьата, хIхъагвы аквыта, хIнапIква абаркIыта хIынасып хIазычIвырхъарныс! Асквш шIыц амшипхьадза швтгIачваква рыцIа-рыцIа йымчхарагIатI – абагвынгIвра апынгьи, абзибара апынгьи, азшара апынгьи, анасып апынгьи. ЙстахъыпI уацзакIызларныс шнасыпра дуу зымгIвагьи йгIахIгвынгIвырныс. Ауи агIан хIара азаджв азаджв хIйайгвыгIвхуаштI, хIапхъанчIвиква йхIызгIаныржьта уахьчIвагьи хIадызкIылуа хIгвбайара, хIыбызшва, хIцIасква бзи йыгIбуштI йгьи хIрызсакъуаштI», – йхIватI ауи.

Ауи дшхъвыцуала, «уацызларныс шнасыпру» гIазгвынгIвуа агIвычIвгIвыс йпхыцIа рыцIа пшдзата йзаныргIалитI. Эгьзакь Мусса йгIаликIгIатI насып зму йгьи йбагъьу ауагIа ъабзазауа акъраль ацкIыс насыпла йырчву йгьи йымчхъу къраль шаъам. Ауи зымгIвадзугьи асквш шIыц агIан згIвадари баракьати рыгымхарныс дрызхIвахIвтI.