Адуней апсуа-абаза конгресс ЙхIаракIу асовет аунашвачпагIв Эгьзакь Мусса акьристанква йхъаду ргвыргъьарамш Христос ЙгIабзагылхра ахьызла драйхIвахIвтI. А-Пасха сынчIва апрель а 28 атшын йдыртлапIитI.

Эгьзакь Мусса йшгIаликIгIазла, а-Пасха агвыргъьахъв «адуней акьристанква зымгIва рыхъазла гвбайара магIны ду амапI».

«А-Пасха йгIалкIкIитI аиман алашара, ауагIа ргвква гвыргъьарала, бзибарала, гвапарала йарчвитI. А-Пасха артлапIара сквшышвпхьадзара йщаквгылу апхъанчIвиква рцIасква хIзыгIахъындырхIвхитI йгьи ажвлара рпны зынгьи йшIымчIвуш агвбайара арыбагъьара йацхърагIитI», – йхIватI Эгьзакь Мусса.

Ауи йшгIаликIгIазла, ари агвыргъьахъв йгIахIнаргвалашвахитI агIвычIвгIвыс йборч хIагIа – йаргванква дрыцIагылра, хьыгIа зду дицхъагIара, аунагIваква, атгIачваква рпны акъыльаквшвара щаквйыргылра шатахъу.

«А-Пасха агвыргъьахъв лашара швбзазара йгIаланацIаргIатI агвыргъьари агIапын акъагIари. АзгIвадара бзи, анасып йгьи абзибагIа швымазтI!» – араса акьристанква зымгIва драйхIвахIвтI Эгьзакь Мусса.

А-Пасха акьристанква йыргвыргъьахъв хъадапI. Ауи йартлапIитI агIвычIвгIвара атурых цIолата йызпсахыз агIаншара – Анчвапа, АнчвагIвычIвгIвыс Иисус Христос ЙгIабзагылхра. Христос АпхIвыс Цкьа Мария дгIалритI Анчва Йпсы дгIахъшахъыцIын йгьи ари адуней дгIаквылтI йгIазхъшахъыцIыз Адами Еви ргвнахIырхIара амщтахь агвнахI йарлыгуаз ауагIа гIайхчарныс ахъазла. Христос ауагIа ргIахчара анизахъвдаквыцI аджьуар данаквдыркI амщтахь акIвпI: агIвычIвгIвара атурых апны гвнахIкIгьи змырхIаз, льажьадъа йырщыз АгIвычIвгIвысзаджвыкI йара-йара йхъа йаквицIатI адуней агвнахI йгьи йызхъазцIаз, йлихыз ахабзаквала йбзазауа ауагIа АжвгIванд ПаштахIыгIва апны йапымшвтуата йызлазлуш абзира йазйыргвыгъатI. Христос ахваша дырщытI, Ауи аиудей цIасквала дыцIарцIатI, ауаса йхымшкIхуз, амшташа атшын, АгIасы апны Ауи Йхъвади гьырмаухтI, ауаса Ауи дгIабзагылхта ауагIа дырзыгIахъынхIвхтI. ЙащтагIайуата Ауи мыш 40 руацIа йдин анкъвгагIвчва драйбжьауамцара адгьыл дыквын. Ауат Ауи Йдин гIандыршатI йгьи адунейла кьристан дин ауагIа йрыларгауа йалагатI.