Афон ШIыц апны Эгьзакь Мусса йсогIакваква рыхъазла хвитта абакIрала йюбилейу Х Адуней анкъвакъвра афиналква акIвшатI.
Адуней апсуа-абаза конгресс ЙхIаракIу асовет аунашвачпагIв Эгьзакь Мусса йсогIакваква рыхъазла хвитта абакIрала Х Адуней турнир афинал анкъвакъвраква акIвшатI Афон ШIыц апны амтшаша, декабрь а 11 атшын. Анкъвакъвраква Адуней апсуа-абаза конгресс асквш 30-и декабрь а 7-8 Апсны апны йакIвшаз АААК VIII Айззарадуи йырзынархата йадгалан.
ЗымгIва шалу атурнир спортсмен 130-гIв раъара азнакIкIытI, ауат ныбыжьла хгвыпкIта, хIатларала 15 категориякIта йшан. Йапхъахуз амш амцIасраква рымщтахь категориипхьадза йауата пщгIвы-пщыгIв гIанхатI. Ахвыцква рпны апхъагылара тигатI Гвдауыта йауу Гегенава Инал – асудьяква ауи йабакIыща шнардзу гIалыркIгIатI, апхъахьылагьи адахIвраква йымазларныс йызхIвахIвтI. Аспортсмен йащтагIайуа асквшгьи атурнир дгIалалта зныбыжьла рыцIа йахIбу рквтагьи дайгIайныс йгIайыргвыгъатI.
Харчилава Даниил Калининград дгIатыцIын йкъаруква йырхъвыхныс дгIайтI, йаргьи килограмм 70-дза зчакьквауа ачкIвынчва зымгIва драгъьхатI. Ауи йшихIвазла, анкъвакъвра дгIайра апхъала мчыта тширыхIазыруан – йаргьи ауи акIвпI йдахIвра йащатахаз. Даниил дзабакIквазгьи шымчыз, анкъвакъвраква аквыргъвгъвата йгьи джьащахъвата йшакIвшаз гIаликIгIатI.
Атурнир Россия ауацIала йакIвшаз чкIвыныргIа рквта хвитта абакIрала анкъвакъвраква рпны йайгIайыз Пандариа Баграти хвитта абакIрала Литва ачемпион Абдулаев Арипи райгвара амцIасрагьи алан. Ауаъа айгIайра Абдулаев йтигатI.
АхIбачва рквта йапхъахауа агыларта Саркисян Игорь йкIытI. Ауи арат анкъвакъвраква рылазара дзачIвабакIгIвызлакI йыхъазгьи магIын ду шаму гIаликIгIитI.
«Арат йрапшу анкъвакъвраква рбзирала Апсны апны хвитта абакIра тшауацIнахитI, анадзарагьи рыцIа йхIаракIхитI: йахьчIва анкъвакъвраква йрылан йапшым ашта йгьи адуней анкъвакъвраква рпны йайгIайхьаз аспортсменква. Са багъьата йхъасцIитI щарда йнамихуата ари аспорт квпшыра апны Апсны йауу йапхъахауа олимп чемпион дшгIаншуш», – йхIватI Саркисян.
Апсны ауагIа р-Абашта айсра аветеранква рыжвлара адкIылара «Аруаа» аунашвахъцIагIв Гулиа Тимур дшапшуала, атурнир алазара адуней йапшым ашIыпIаква йгIартыцIуа аспортсменква йанйаларныс, абакIрала йыззычпу абадырбаларныс, рабакIыща агъьырчIвларныс лшара рнатитI.
«ХIара хIыхъаз гвыргъьара дупI Апсны апны хвитта абакIра бзи йызбауа араъарагIвы ъайззаз. Анчва дырзыразхатI аспортсменква къвльейрата йгIадырбаз ахъазла, Анчва дырзыразхатI ауат зрыхIазырыз абжьагIвчва. КIьыдата сразыра рзынасырхара стахъыпI ари апш гвыргъьахъв лшарата йхIзызчпаз адгалагIвчва», – йхIватI Гулиа.
АААК ЙхIаракIу асовет аунашвачпагIв Эгьзакь Мусса анкъвакъвра анадзара хIаракIыта йшадгалаз гIаликIгIатI, ачемпионкви ауат рбжьагIвчви драйхIвахIвтI.
«Анкъвакъвра ъадзакIвшуз агIвымшкI руацIа хIара знадзара хIаракIыз абакIра хIгвы азхIырчIватI. Сара сгвы йгIатыцIдзауата адгалагIвчва, асудьяква, абжьагIвчва бзидздзата йъанхаз ахъазла сшырзыразу расхIвра стахъыпI. ЙалкIгIата срызхIвахIвра стахъыпI абжьагIвчва: швара швгIапсара абзирала хIара уахьчIва арат йрапшу апрофессионалква гIбитI», – йхIватI Эгьзакь Мусса.
Аспортсменква тшырзынайырхауата Эгьзакь Мусса йгIаликIгIатI апышва амдари абакIыща агъьчIври анкъвакъвраква йгIауыртуа хвы зквцIауачву швапхата йшалуа.
«Гылартата йшвкIлакIгьи – швара зымгIва швайгIайтI. Сара замгIвагьи Анчва йхъвыкI шшвылу швылызбгIитI. Кьангьаш гьазгIазуам швыуа дзачIвыздакIгьи спорт апынгьи абзазара апынгьи адахIвра дуква дшырзынадзуш», – йажва найырдзатI Эгьзакь Мусса.
АААК ЙхIаракIу асовет аунашвачпагIв анкъвакъвра апны йайгIайкваз ахча согIаква рзыщаквйыргылтI: ахIатлараква зымгIва рпны апхъагылара тызгакваз сом 15000 рырттI; йгIвбахауа агыларта зкIкваз – сом 10000, йхпахауа агыларта ахъаз согIата сом 5000 бжьан. Йшалу атурнир апны ахча согIата сом зыкь 525 ршатI. Ауи акIвымкIвагьи аспортсменква амедалькви аграмотакви рырттI. Ахъмаштылга согIаква «Абаза» спорт клуби Апсны Республика чкIвыныргIи спорти руысла АкъральыгIва комитети йадыргалтI.
АААК ЙхIаракIу асовет аунашвачпагIв, ажвлара йгьи акъральыгIва уыснкъвгагIв, абзихагIв Эгьзакь Мусса йсогIакваква рыхъазла хвитта абакIрала Адуней анкъвакъвра акIвыршара Апсны апны асквш 2011 йгIашIарышвта йцIасхатI. Ауи азаман ауацIа анкъвакъвраква России Апсни йрыуата спортсмен швкIыгIвпхьадзара гIарылалхьатI.
Адуней апсуа-абаза конгресс VIII Айззараду ахабар дыргауата йацынхитI: Апсны акъральыгIва телерадиуакомпания (АГТРК), «Абаза-ТВ» телеканал, Sputnik Апсны хабарргарта агентства.
швталра йа тшаншвцIара атахъыпI.