Апсны зхъа йахвиту къральыгIвата дипломат амальла йацыркIищтара йцIуа а 10 сквша знархару йхIвахIвра тшазынархара апны АААК ЙхIаракIу асовет аунашвачпагIв Эгьзакь Мусса йшгIаликIгIазла, Апсны ауагIа йгIатыргаз ахъахвитра ахв хIаракIыпI, ауи йазабакIуата щардагIвы рхъа щтарцIатI.

Ауи йацицIахтI Апсны Абашта айсра апны ауагIа айгIайра ангIатырга йгIашIарышвта йапымшвтуата нхара ду шакIвнагашуз. Анхара анархартаква йрыуазакIын Апсны зхъа йахвиту къральыгIвата йшщаквгылыз адунейла йадгылырныс йгьи йацыркIырныс.

«Асквш 2008 август а 26 – Апсны Республика ауыжвгIанчIви турых апны магIны ду зму мшыпI. Россия Федерация Апсны Республика зхъа йахвиту къральыгIвата йадгылтI. Ауи зымгIва йрапхъата Апсны абзазагIвчва рхъыхчара йацхърагIатI. Ари асахIат йгIашIарышвта Апсны Республика лшара азыгIаншатI ауачIв бзазара йазынхарныс: Апсны йгьи Россия ркъральыгIва азазаъащаква ртшауацIнарыхра амч шIырпшыра амамкIва йдупI. Апсны апны ауи амч гIарысабапхуштI», – йгIаликIгIатI Эгьзакь Мусса.

Ауи йшихIвазла, Россия – адунейла йдуу къральпI, ауи адипломат ацкIра зджьара йгIанымхауата йгIатгара дупI йгьи магIны ду зму чIвырхъапI апсыуа-абаза уагIа ртурых апны. Россия йацыркIтI датшагьи акъральква – Никарагуа, Венесуэла, Сирия, Науру, Вануату, Тувалу. Ауат акъральквагьи Апсны зхъа йахвиту къральыгIвата йырпхьадзатI. Ужвы адуней акъральква рквтала Апсны аъащата йызтагылу агалагьи тшапсахтI асквш 2008 август мыз апхъала йшаъаз йгIаквухырквын.

Ауи датшагьи йацицIахтI Россия йгьи Апсны йырбжьу ангIалра кърарла йшрыбагъьу, ауи апсыуа-абаза уагIа радкIылра знархару лшара ду шгIаннаршауа. Апхъала хIпшуата уыжвгIанчIви турых апны ауат анапаква златагIвы йауаш уыс рхъйарапI. 

Асквш 2008 август а 26 агIан Россия Апсны йгьи ГIвадахь Осетия рсуверенитет йадгылтI. Апсны Республика зхъа йахвиту къральыгIвата йадгылтI датшагьи Никарагуа, Венесуэла, Науру, Вануату, Тувалу. Асквш 2018 май мыз агIан Апсны Республика ахъахвитра йшацыркIуа йхътIыта йгIархIватI Сириягьи.