АгIаншараква 18.10.2019 00:15 19563

Йбергьльу акIавкIаздырыгIв Генко Анатолий йынхараква «Абаза материалква» – хIва йызхьзу акнига апны йазкIкIыта Согъвым апны рпрезентация рчпатI.

Барганджиа Саид

Согъвым апны йгIадырбатI Россия апны йбергьльу акIавкIаздырыгIв Генко Анатолий йнаука нхараквала йадгалу акнига «Абаза материалква».

АгIацIщтра апрезентация апны дгIачважвауата акнига йадынхалыз йрыуазаджву Апсны анаукаква р-Академия апрезидент, акIавкIаздырыгIв, апрофессор Джьапуа Зураб йшихIвазла, ауыс асквш 2007 йгIашIарышвта йадынхалуан, ауи арыхIазырра «гIамта щардагьи, къаругьи, йчватархагаз цIхщардагьи адгалра атахъхатI».

Апрофессор йшихIвазла, «Абаза материалква» гIвхъвыкIта йалапI. Йапхъахауа ахъвы апны асквшква 1929 йгьи 1933 рагIан аэтнограф Генко Анатолий йазикIкIыз анаука гIвыракви шIырпшыра змам абаза фольклор аматериалкви алапI. Арат атекстква йапхъахауата йгIацIырщттI. ЙгIвбахауа ахъвы апны ашвъаква адкIылапI.

«ЙгIвбахауа ахъвы апны дукI йбергьльым аматериалква гIарбапI, абаза бызшвала Генко Анатолий йнаука рхъвыхраква ртурых ауысла айрышта ацIабырг гIазырбауа ашвъа бзаква», – йхIватI Джьапуа Зураб.

Йшаъула, акнига йаншвалыз атексткви ашвъакви Санкт-Петербург апны йаныргIалу РАН йаланакIуа амарагIайырта напIлагIвыраква р-Институт архив, Ставрополь шта акъральыгIва архив йгьи йара Генко Анатолий йхъатачIв архив рпны йгIараутI.

Апхьахьа йгIаликIгIатI акнига агIацIщтра ркъару шаларцIаз Апсны анаукаква р-Академия, Апсны акъральыгIва университет йгьи Эгьзакь Мусса дызхъаду абаза-апсуа этнос атшауацIыхра ацхърагIара знархару адуней адкIылара «Алашара».

АААК ЙхIаракIу асовет йгьи «Алашара» адкIылара рхъада Эгьзакь Муссагьи акнига апрезентация апны даъан. Ауи акнига йадынхалыз швабыж дшырзыразу йхIватI.

«Швабыж йсгвапапI араъа зымгIвагьи швъазбауа. Акнига ахъазла сшвзыразпI. Нхара ду акIвшатI, йгьсквшыкIым, йгьгIвысквшам, гIамта ауыра чхIара гIашвырбауата аматериал азшвкIкIытI, гIапсара ду адыжвгалтI. Апхьахьа Генко йыхьыз пIатIу ду аквхIцIушта йаъапI: ауи йапшта хIыбызшва йадынхалыз мачIыгIвпI, йгьцIабыргымма? Ауи йыхъазла асквш 2021 юбилей сквшыпI – дгIадрийищтара сквшы 125 цIуаштI. ЙсыцшвкIуазтын ауыс гIащтIыхIхпI, хIацIагылпIта чвахъабага син йызхIыргылпI», – ари апш ажванахъа гIайгтI Эгьзакь Мусса.

Апрезентация апны дгIачважватI Адуней апсуа-абаза конгресс ЙхIаракIу асовет йалу, йбергьльу абызшвадырыгIв Чирикба Вячеславгьи. Ауи йгIайхIватI Генко Анатолий йбзазара баргвыта йшымгIвайсыз, айззара йалаз йгIадйыргвалашвахтI апхьахьа дыркIыта дштыргаз, хIапсакI апны дтата асквш 1941 агIан амла дшагаз.

«Генко Анатолий дкIавкIаздырыгIв дууын, дгIвычIвгIвыс бергьльын. Ауи бызшва 20 раъара йдыруан йгьи абаза бызшви апсуа бызшви цIолата йырхъвыхуан. МагIны ду змаз йынхараква рщарда данабгаз йгьгIацIрымщттI. Акнига «Абаза материалква» - анаука ахъазла магIны дудздза зму нхарапI», – араса акIвпI Чирикба Вячеслав йшипхьадзауа.

Генко Анатолий йынхараква разкIкIра «Абаза материалква» атираж экземпляр 500 йнадзауата йгIацIцIтI. Акнига Апсны Республика анаукаква р-Академия апны йгIахвгIа йауаштI.