Барганджиа Саид

Адуней апсуа-абаза конгресс ЙхIаракIу асовет аунашвачпагIв Эгьзакь Мусса йкубок ахъазла ансисквша йакIвшалауа хвитта абакIрала анкъвакъвраква сынчIва «Абаза» культура-спорт фестиваль йахъвыкIта йадгалан. Ауат Гвдауыта апны йакIвшатI. Йапшым къала щарда йгIартыцIыз аспортсмен шIаква рныбыжьла гIвгвыпкIта рхIатларалагьи 17 гвыпкIта йшата йанкъвакъвтI.

АсогIа хъада гIатызгаз афестиваль йхпахауа амш Согъвым апны агвыргъьахъв анакIвшуш агIан йгIархIвуштI. Ауахьауат йайгIайыз зымгIва рыхьызква йахьчIва йбергьыльхатI.

Хвитта абакIрала аклуб «Абаза» архъйагIв директор Боджгуа Леонид Апсны ргвып зымгIва рацкIыс медаль щарда шгIаргыз гIаликIгIатI.

«АйгIайра гIатызгаз зымгIва амедалькви акубоккви рырттI. Апхъагылара зкIкваз ауи акIвымкIвагьи дасузлакIгьи сом 10000 рырттI. Ауаса асогIа хъада – АААК ЙхIаракIу асовет аунашвачпагIв Эгьзакь Мусса йкубок – зыртуаш ужвыгьи ймадзапI, ауи уачIвы агвыргъьахъв концерт апны акIвпI йаныгIдыруаш», – йгIахIгвалайыршвахтI ауи.

Атурнир агIарбараквала йагъьу арбитрта йыхьыз гIархIватI Чвейба Адам (Апсны), йагъьу абакIгIвыта – Тобыль Алан (Къарча-Черкес), йагъьу аъазара гIазырбаз апсуа абакIгIвы Пилиа Данил ауи йазалхыз асогIа йквнадыргатI.

АйгIайра азгIашыкъра ахъазла дгIалыркIгIан артшхъвага йквнадыргатI Нахвышв Алан (Къабард-Балкъар). Артшхъвагаква зквнадыргаз аспортсменква рбжьагIвчвагьи чIахIра ртшхъвага швъа рнапIыцIарцIатI.

Боджгуа йгIаликIгIатI анкъвакъвраква рнадзара хIагIата йшадгалаз, ауаъа ужвыгьи спортсмен гврыхва щардагIв штшгIадырбаз.

«Анкъвакъвра 200-гIв раъара алан, ауи айщчвара ацIасквала йакIвшатI. Спортсмен щардагIв хIапхъагьи араъа йанйахуашта йайгвгъауата йамцIыцIхтI», – йхIватI ауи.

Гвдауыта район аунашвахъцIарта ахъада Ладариа Руслан Эгьзакь Мусса йкубок ахъазла анкъвакъвраква йатахъдзата, магIын дугьи рымата йпхьадзитI.

«ХIара швабыж йхIгвапапI ари атурнир хIыкъала-фыр Гвдауыта апны йъакIвшалауа. Ауи рахIа хвы ззырбауа анкъвакъвраква йрылапхьадзапI йаргьи спортсмен шIа щардагIв азнакIкIитI. ХIара ари анкъвакъвра йацхIкIитI, хIапхъахьылагьи хIгвыргъьауа ауи хIыкъала апны йгIахIрайгвалуштI», – хIгIайыргвыгъатI Ладариа.

Хвитта абакIрала Апсны абжьагIв хъада Бениа Джанраз йгIаликIгIатI Эгьзакь Мусса йкубок ахъазла атурнир хвду ъазырбауа Апсны апны йшахъазым. ДаквчважватI ауи Апсны ауацIала абакIра тшауацIнарыхра ауыс апны Эгьзакь Мусса йалацIарагьи.

АРИ АГIАНШАРА АВИДЕО АПШРА>>

«Ауи йцхърагIарала уахьчIва бжьагIвыта 35-гIв райхIа нхаша хIакъ гIаргуата йынхитI. Апсны шабгу апны абакIра тшазызбжьауа аспортсмен 600-гIв Эгьзакь Мусса йбзирала йыртахъу ъамапсымала йадгалапI», – йхIватI абжьагIвы.

Анкъвакъвраква дрылан Апсны йауу абакIыгIв шIа Багателиа Леон. Леон жвасквша дыртапI, ауат йрыуата хысквша абакIра дапщылапI.

«Сара сызбжьауа Цвейба Адам йакIвпI. Сара йгIванхауата ари анкъвакъвра салапI. ЦIыпх апхъагылара гIатызгатI, сынчIва скъаруква мачIкI йгьнамхъатI. ЙгIасабакIквуз гьармыуымызтI. РыцIагьи самайчуа тшызбжьуштIта хIапхъа амаль амамкIва асогIа хъада гIатызгуштI», – дгвышхвауа йхIватI аспортсмен.

Анкъвакъвраква рпны хьапщ согIа тызгакваз дрыуапI Краснодар йауу Солтамурадов Джамал. Ауыгьи йкъаруква йырхъвыхырныс араъа дгIайын дайгIайтI.

«Сара абакIрала анкъвакъвра щарда срылалхьатI. Хьапщ гIатызгарныс мурадта йскIын айрышта ауи сазцун, йаргьи йгIасдахIвтI», – йлахIвараква хIыцагIвишатI абакIгIвы.

Анкъвакъвра хвду аквырцIауата йгIачважватI ауи йалазгьи абжьагIвчвагьи. Ауи апшта Къабард-Балкъар йауу абжьагIвы Нахвышв Руслан адгалагIвчва йъагIазшIыртыз ахъазла дшырзыразу йхIватI, анкъвакъвраква швабыж бзита йшадгалазгьи гIаликIгIатI.

«ХIара пщысквшахауата ари атурнир хIгIайитI. Бзидздзата йакIвшитI. ХIара араъа зныбыжьли зхIатларали йапшым 15-гIв спортсменчва гIагIгтI», – йхIватI ауи.

Эгьзакь Мусса йкубок ахъазла анкъвакъвраква Апсны апны йапхъахауата асквш 2011 агIан йакIвшатI. Арат асквшква руацIа ауи ахабар Апсны утыцIтагьи хъарата йгатI. СынчIва анкъвакъвраква йрылан Москва, Санкт-Петербург, Ростов, Краснодар, Калининград, Швача, Къарча-Черкес, Къабард-Балкъар, Лагъь Осетия, ГIвадахь Осетия, Йынгвыщшта, Дагъстан йгьи Апсны акъалаква зымгIва йгIартыцIыз спортсмен 200-гIв раъара. Ауат рныбыжьла гIвгвыпкIта рхIатларалагьи 17 гвыпкIта йшан. Йхъаду асогIа – Эгьзакь Мусса йкубок – гIатызгаз «Абаза» фестиваль йцIыхъвахауа амш – ахваша, октябрь а 18 атшын – дыгIдыруаштI. Ауи йыхьыз Согъвым АмхIаджьырква рдзытшпурам апны агвыргъьахъв концерт анакIвшуш агIан ауагIа йгIарылархIвуштI.