Адуней апсуа-абаза конгресс ЙхIаракIу асовет аунашвачпагIв Эгьзакь Мусса ауагIа ргвбайара тынха йазынарху "Амазара" проект зладжвыквлыз ахъвы шакIвшаз даквчважватI.
Барганджиа Саид
Апсуа уагIа ргIахIвра йазынарху "Амазара" проект йапхъахауа авидео уагIата зкьы 30-гIв раъара йырбахьатI, ауи йапшуа рпхьадзара рыцIа-рыцIа йалахIитI. Ауи йхIватI Адуней апсуа-абаза конгресс ЙхIаракIу асовет аунашвачпагIв Эгьзакь Мусса ахаша, ноябрь а 11, авидео зчпази йалаквази онлайн амальла данрынйа.
АААК апресс-квта апны авидеоролик арыхIазырра йапщылаз йрыуата йайззаз гьщардагIвымызтI: "КIавкIази" "Шаратыни" гвыпква ргIахIвчва, арежиссер КIвакIваскьыр Темур, амакъымршIыйагIв Агрба Тимур, акомпозитор Гвымба Анри.
АААК ахъада агIахIвра йазынарху аролик йадгIапсалыз зымгIва дшырзыразу йхIватI йгьи йгIаликIгIатI "Амазара" проект "йгврыхву, згвы цхIауа уагIа щардагIв" шаднакIылыз.
"БаргвыпI ужвы йсыласхIвауа аразыра ажвала йухIварныс. Сайщчваква анызбара сара щарда гIасылахIитI. Швымч, швлахIвараква саргьи йсыласхIвитI. Швара швбзирала хIара (апсуа-абаза уагIа – аредакция ррытаразга) адуней зымгIва гIахIпшуата йхIзычпитI. Анчва дшвзыразхатI агIаджвыквцIара ъашвылашвкIыз, йъашвылашвхIваз. Йапхъахауата йхIчпаз авидео зджьара йгIанымхауата йпшдзахатI, уыла хънахуата йцатI. Йджьащахъву ауи агIахIвра ауагIа йырбуштI. Ари апроект мурадта йаму закIыпI – хIымч хIамайгьдзауата хIынхата хIкультура гIахIырбарныс", – йхIватI Эгьзакь Мусса.
Ауи йгIаликIгIатI АААК апхъахьылагьи аршIыйара проектква йшрыдынхалуаш, "Амазара" авидеороликква зчпазгьи йшрыцынхалуш.
"ШвгIай, хIацшвырхъвыц. ХIацыта йхIырхъйуш, уыла йуызгIацIамыжьуа ауысква гIахIшвырхъвыц. ЗымгIва йрахIхIвпI, адуней йыкву гIвычIвгIвысипхьадза йзынахIырдзапI хIара йазакIу хIштгIачва дуу", – ажва гIайгтI АААК ЙхIаракIу асовет аунашвачпагIв.
Авидео арежиссер, йбергьльу апсуа кинематографист КIвакIваскьыр Темур "Амазара" проект далазларныс лшара ъайауыз ахъазла йразыра ажваква Эгьзакь Мусса йзынайырхатI. Ауи Эгьзакь Мусса апсуа культура, наука, абызшва ртшауацIыхра щарда шалайцIауа гIаликIгIатI.
"Анчва дузыразхатI Апсны атшауацIыхра къарута йалауцIауа ахъазла. ХIара йыгIбитI угвы шуыхьуа: ауагIахъа рыхъазла, хIкультура ахъазла угвы блитI. Уара угвыхътIырала ауагIа алауыршвитI, абар, хIаргьи хIуыргвышхван ари апроект хIзырхъйатI", – йхIватI арежиссер.
Адуней апсуа-абаза конгресс апроектква йгьызным йъадзарыцикIхьаз апсуа композитор Гвымба Анри. АмакъымгIаныршагIв йгIаликIгIатI АААК агвып руысадгылща "угвы шгIащтIнахуа йгьи ушаргвышхвауа".
"Ари апроект акIвпIта – ауи апш уыс сквшщарда цIуата йалачважвун, ауаса хIадызкIылта хIызрыцIсрыз дгьгIанымшузтI. Анчва дузыразхатI уара хIуыцта ауи ъахIзырхъйаз. Апхъахьылагьи гIальаматракI, сабапракI злу уыскI гIаншузтын йацскIныс йанакIвызлакIгьи схIазырпI", – анйара йалакваз гIайыргвыгъатI амакъымршIыйагIв.
Апроект йалаз ауагIахъа фашаква рсуратчпагIв Чанба Мадина лкьазу ангIадза кIьыдата Адуней апсуа-абаза конгресс йаланакIуа апхIвыс советква рунашвачпагIв Ардзынба Гета дшылзыразу лхIватI, йауа ухIварыквын, "ауи лакIвпI зуыс здыруа ауи аъарагIвы ъачIвагIагIвчва проекткI агьагьара йыззадкIылыз".
"Ауи швабыжта дынхатI. Луыс дазычпапI, хIыуа дзачIвызлакIгьи ауи йылайхIватI. Ауи даламкIва ари апроект гьгIахIыдамхIвуашызтI", – йылпхьадзитI Чанба Мадина.
Эгьзакь Мусса ауи йлыцикIын йара йахькIьалагьи йгIацицIахтI АААК апхIвыс советква рунашвачпагIв "ауыс, заъара йбаргвызлакIгьи, йлыхъвдаквцIата тынчта лцIыхъва утагыла уымгIвайс йшауаш".
"ДгвыбзыгъарчIвачIвапI, хIара ауи лгврыхвара, гвыла лпшдзара, лджьауапкIра хвду аквхIцIитI", – йхIватI АААК аунашвачпагIв.
Адуней апсуа-абаза конгресси "Алашара" Дуней адкIылари апсуа-абаза уагIахъа ргвбайара йазынарху апроект "Амазара" (апсуа бызшвала "йазкIкIу байара, абайара ахчарта" гIаныцIитI – аредакция ррытаразга) мызквакI цIуата йджвыкврыжьтI. Ауи йгIацIанакIитI знадзара бзита йчпу, ауагIа ргвбайара тынха йапшым ахъатаква йырзынарху авидеороликква ррыхIазырри Интернетла тшамцIнадрыхри.
Ауыс гIазхъвыцыз АААК ЙхIаракIу асовет аунашвачпагIв Эгьзакь Мусса йакIвпI. Апроект Абаза уагIахъа йгIарыланакIуа дзачIвызлакIгьи йхIыбызшвам ауагIагьи хIапхъанчIвиква йынкъвыргаз акультура апшдзари ацIолари днарбарныс йаквгIазшIытпI. "Амазара" проект архъйара джвыквырцIауата йапхъахауата тшыззынадырхаз агIахIвра акIвпI. АААК агвыпи аъачIвагIагIвчви йацыта апсуа гIахIвра уыжвгIанчIви квпшыра артын видео ахъырхтI. Аролик АААК ахабарргарта портал апынгьи адуней апны йбергьльу аинтернет уатыквква рпынгьи йгIатарцIатI.
швталра йа тшаншвцIара атахъыпI.