Абашта айсра апны Апсны йгIатнагаз АйгIайра йахъыцIуа асквш 25 йазынархаз тшыла аспорт анкъвакъвраква акIвшатI Мыкв кыт апны.
Барганджия Саид
ЙцIасхаз тшыла аспорт анкъвакъвраква акIвшатI ахваша, сентябрь а 28, атшын Очамчыра район йаланакIуа Мыкв кыт апны. СынчIва ауат Абашта айсра апны Апсны йгIатнагаз АйгIайра йахъыцIуа асквш 25 йазынархан.
Анкъвакъвраква Джгерда, КвтIол, Мыкв, Пакващ, Уарча, Тамыш, Гуада кытква ртшчва гвыпква рылан.
«УахьчIва йапхъанысуаш атшква зымгIва Апсны йауапI, закI-макI ракIвмызтын ауат зымгIва КвтIол тшырхIарала аспорт апхьарта апны йрыгIзаз ракIвпI», – йхIватI АААК ахабарргарта портал акорреспондент дгIайачважвауата анкъвакъвраква радгалыгIвчва йрыуа заджву Очамчыра къала аунашвахъцIарта анхагIвы Агрба Михаил.
Ауи йгIацицIахтI ахъвмарраква мурад хъадата йрыму Апсны апны аспорт тшырхIара тшауацIнарыхра, атшыгIвчва ръазара йалархIара шракIву.
РахIа йшIаз атшыгIв 15 сквша ракIвпI дызту, ауи Цвижба Баграт йыхьызпI. Анкъвакъвраква рпны ауи Уарча кыт ахъаз тшы гIайрыгIвуан.
«Сара гIвысквша цIитIта атшрыгIвраква срылапI, швабыж йсгвапхитI. Апхъахьылагьи ари аспорт квпшыра садкIылазларныс сгвыгъапI», – йгвы йту хIыцагIвишатI Баграт.
Тшы гIазрыгIвквуз йрыуу ужвыгьи заджвы Бобуа Беслан Пакващ дауапI, ауи аспортсменква атшрыгIвраква асквш ауацIа штшрыздрыхIазыруа гIаликIгIатI.
«ХIара хIыхъазла ари мгIан ду зму уыспI, йаргьи хIгвы аквкIта ауи тшазхIрыхIазыритI, атшырхIарта спорт апхьарта апны тшыгIбжьитI», – йхIват Беслан.
АтшрыгIвраква рпны пщсогIакI амаркIуан: Апсны йапхъахуз рпрезидент Ардзынба Владислав йыхьыз зхъхIвалгIаз акубок, йгIвыджьхуз апрезидент Багапш Сергей йыхьыз зхъхIвалгIаз акубок, ужвы президентта йгылу Хаджимба Рауль йкубок. Йпщбахуз акубок Апсны Абашта айсра йаладзыз ауагIа йырчвахъабаган. Метр гIвынызкь йгIагIвуаз атшква зымгIва дара апсыуаква йдырхIауа атлапкъква йрыуан.
АпщкубоккI рыуа ахпа – Ардзынба Владислави Хаджимба Раульи рыхьызква зхъхIвалгIази Абашта айсра йаладзкваз рхъмаштылги – КвтIол кыт йауу Голандзия Инал йтигатI. АААК акорреспондент дгIайачважваута ауи йхIватI йцри кыт ахъазла анкъвакъвраква дъарылу чIахIра дута йшипхьадзауа, хын дъайгIайызгьи йхъа швабыж йшаладухауа.
Багапш Сергей йыхьыз зхъхIвалгIаз акубок Гуада кыт йауу ПапIба Альас йтигатI.
Ахъвмарраква йрылаз сагIындакъ – Аҵәегәыдҵа (апсыуа бызшвала асагIындакъ ахьыз – аредакция ррытаразга) аущтралагьи йанкъвакъвтI. Араъа атшчва агвхъцIа йшыкву асагIындакъла (асагIындакъ абамбук йгIалху, метркI айхIа зуру, зхъаква дзагву лабан – аредакция ррытаразга) йырпшIагылу ахъвмарыгIв йа ауи йтшы йаквшвара атахъын. АтшыгIв дйыквшвазтын акоманда гIвочкокI гIарынхун, атшы даквшвазтын – очкокI. Очкота рыцIа щарда гIазынхаз акоманда айгIайитI.
«Ари ауагIа рыла зырпшуа хъвмаррапI, ауаса йшварагIварапI. Йхъвмарквауа хвырта анрадзуз ншалун. Ауаса ауи ъашварагIвару йгIалцIла апшыгIвчва рыцIагьи йрымагIальаматхитI», – йгIаликIгIатI ахъвмарраква йырхъпшылуаз ашахIат.
Ахъвмарраква йрылан тшыла топасрагьи – Ҽыла ампыл архәмарра (апсыуа бызшвала ари апсыуа уагIа рхъвмарра ахьыз – аредакция ррытаразга). Араъа атшчва атоп йазалху лабала йасуамца йынкъвырцитI. Ауасамцара йырпшIагылу агвып ргвашв йтарцара атахъыпI. РыцIа щарда йтазцауа агвып айгIайитI.
Арат агIвквпшыракI рпынгьи айгIайра КвтIол кыт агвып йтыргатI. ЗымгIва шалу анкъвакъвраква тшчвата 60-гIв рылан.
Очамчыра район йаланакIуа Мыкв кыт апны тшыла аспорт анкъвакъвраква ари 25-нхауата йакIвшитI. Ахъвмарраква йрылапI атшква метр 1400, 1600, 1800 йгьи 2000 йгIарыгIври гвыпла ауагIахъа хъвмарщаквала – сагIындакъ аущтрала йгьи тшыла топасрала – анкъвакъвракви. Арат ахъвмарраква рпны ансисквша Апсны шабгу йгIатыцIитIта уагIа швкIыгIвпхьадзара гIадгылитI. Йаргьи ауат щарда цIуата ареспублика апны тшыла йхъаду спорт анкъвакъврата йщаквгылапI.
швталра йа тшаншвцIара атахъыпI.