Апсны йауу арежиссёр Нармания Инар Лакрба Михаил йгIвыраквала йхъихыз афильм Архангельск дуней кинофестиваль апны апхъагылара гIатнагатI «Зурала йайшысу ахъвмарра фильм йагъьу арежиссёр» номинацияла.
Барганджиа Саид
Апсыуа режиссёр Нармания Инар зурала йайшысу йфильм «Сара сыхьыз МахазпI» Архангельск дуней фестиваль Arctic open апны апхъагылара гIатнагатI «Зурала йайшысу ахъвмарра фильм йагъьу арежиссёр» номинацияла. ЙгIатгара далачважвауата арежиссёр АААК ахабарргарта портал йшгIарайхIвызла, ауи «гвлахIарапI, джьауапкIра дугьи апщылапI».
Афильм «Сара сыхьыз МахазпI» асоветква рзаман йаквыргIапста зурала йайшысу анахьанат ановеллаква йрылата Лакрба Михаил йгIахIвахрала йхъырхыз хъмашлтылра лашара комедияпI. Акиноальманах «7 новеллакI» асквш 2017 август агIан йхъырхуа йалаган асквш 2018 январь мыз апны йалгатI.
«ХIара хIыхъазла магIны аман агIагвалашвахра лашараква гIацIсырныс. Йалныс ауыпI ауи адуней гIахъвыцрахарныс, ауаса йхIтахъын апшыгIвчва аэкран апны йгIаншауа даргьи ргвы йазынадзауата йрылархIварныс», – йхIвитI арежиссёр.
Инар йшипхьадзауала, афильм афырква рщардагIв рпхыцIала йнаспынтшапI, ауаса ауат «раъащаквала тшрымпсахуата йшхIвапсагIву йгIанхитI».
Арежиссёр йшихIвазла, акинофестиваль Arctic open ашорт-лист йаншвалтI фильм 48, ауат гIазлырхыз атшазынархара швъаква 2000 райхIа йнадзун. Анкъвакъвра программа зурала йауацIыху йгьи зурала йайшысу ахъвмарра фильмква гIарыцIанакIуата нархара щардала йахъыхацIыхын. Архангельск афестиваль апны афильм йгIатнагаз айгIайра гьпычIвым.
«ХIара хIыхъазла зымгIва йрапхъаз йгьи рыцIа магIны змаз асогIа Согъвым адуней фестиваль SIFF апны йгIахIквнадыргатI (Согъвым дуней кинофестиваль – аредакция ррытаразга), уадыргIвана Москва афестиваль Konik film festival апны Гран-при гIатыгIгатI, йащтагIайуата Калининград афестиваль «Айшыста» – хIва йзхьзу хIалан, ауаъа йазалху асогIа гIахIквнадыргатI. Декабрь мыз агIан йбергьыльхатI Россия акъральыгIва киноакадемия хIыхьыз шаларцIаз асквш 2018 апны акинопремия «Хьапщ уарба» зквнагауата йырпхьадзаз афильмква рашIыпхьадзара», – йхIватI Нармания Инар.
Адуней кинофестиваль Arctic open декабрь а 6 йгIашIарышвта декабрь а 9 атшындза йгIванхауата йакIвшун. СынчIва анкъвакъвра йгIадыргалыз афильмква ррежиссёрква къраль щарда йрыуан: Россия, Апсны, США, Дания, Исландия, Канада, Швеция йгьи Норвегия.
швталра йа тшаншвцIара атахъыпI.