Апсуа режиссер Агрба Атана лфильм «Бача» Великобритания апны йакIвшауа акинофестиваль Lift-Off Global Network апрограмма йалапI.
Барганджиа Саид
«Бача» зхьзу апсуа режиссер Агрба Атана йхъылхыз йъагIахъвмаруа акино айшыс Великобритания апны йакIвшауа акинофестиваль Lift-Off Global Network йалапI.
«Афильм гIвымызкI цIуата [афестиваль йалазларныс] йсщтитI. Йшцалауа, афильм ъахъырхыз Апсны акIвта йануцIарыквын «аполитика швхIаусыгIваквала» йгIалдрышвтитI. Россия апны йхъырхта йанцIара атахъхатI ауагIа йырбара ахъазла. Йаргьи абар, сальамшвъа сызгIайтI: афестиваль акомиссия бахIвара швъа йалапшын афильм анкъвакъвра апрограмма йаларцIатI», – ахабар хIлырдыритI арежиссер.
Агрба Атана Lift-Off Global Network фестиваль «адуней шабгу апынгьи йазалхта заджвгьи йзынымхауа йцIабыргу акино йагIарбартазаджвыкIта» йылпхьадзитI.
«Ауи йаццауата ауи зпроектква зырхъйара зтахъу акинематографистква йырцхърагIарныс йащту йщардам афестивальква йрыуапI. Ауаса щарда уырхъысра атахъыпI, агIарбараква апшыгIвчва ражвагьи йапщылапI», – йгIахIгвынлыргIвытI ауи.
Арежиссер шIа ВГИК (Герасимов С.А. йыхьыз зхъу Россия акинематография акъральыгIва институт – аредакция ррытаразга) йхвбахауа акурс апны дапхьитI. Афильм хъвыцра хъадата йалу Атана йапхъахуз акурс дапхьаркIвауата лхъа йгIаташватI, ауаса ауи агIан ауи лырхъйарныс гьлылымшатI.
«Сара асценарий ахъазла ахабар згIвытI, ауаса ауи агIан лшарагьи техникагьи гьсымамызтI, дыррагьи гьсзымхъузтI. ЙызгIвыз зджьара йщтIасцIан йсхъаштылхтI. Хысквша анцIы хIадагIвача [асценарий] сахъанагахтI, шIыц-шIыц йызгIвыхта йгIалцIуа сапшырныс йаквскIтI», – лхIвитI арежиссер.
ЙгIазквчважвауа гIахълымтIуата ауи йгIахIалхIвтI афильм йгIанарбауа сквшщарда ква ъагIамквахуа кыткI апны йшыншауа. АлокIкви анашанакви рдуней йалата йбзазауа акыт абзазагIвчва зымгIва афыр хъада Майа йылльажьата йлыквырцIитI, ауи дъану рыцхIагIаракI ншауата рхIвитI. Акино ахьыз гIазхъыху «Бача» атрактор йахьызпI. Ари акIвпI акино ауысла арежиссер йхIзыгIахъылтIыз.
Анкъвакъвра йалашваз акино апны Апсны адрама театр актерква гIахъвмартI – ауи Агрба кIьыдата лхъа аладухитI.
«Атурасы хъадаквала йгIахъвмарыз Ломиа Милани Кове Бенари швабыж йгврыхвапI, сара ауат рыхъаз Москва йауу ахъыхыгIвчва гвып рпахь схъа ду йызбахуан. АгIвыджьгьи, ага акино апны йырхъырххьаз дукI аъамызтынгьи, руыс зджьара йгIанымхауата йазъазапI, йхъадахугьи – ари анхара ргвы аквкIта, йыззычпу зымгIва гIадырбауата йадгылтI. Саргьи ауат йрапшу апрофессионалква рыцынхарала швапха мачIкI сырхIатI», – лхIватI Агрба.
Акино апсуа кыт Баслата апны йхъырхуан. Агрба йшылхIвауала, ахъыхырта апны анхара баргвыта йгIацIцIтI, ауаса ауи гIаншарала йырчвын угвы йгIатахауатагьи йаъан.
«Ахъыхра ауи аъара хIгвы азакъвпуанта жвизкьазукIла йхъыхIхырныс йхIгвыгъаз пщымшкIла йхъыхIхтI. АкьазукI агIсахIаткI ртарала жвагIсахIаткI тшарауан», – йгIахIгвынлыргIвитI арежиссер.
РахIа лгвы йгIатахаз йапхъахуз амш, тамамта йухIвушызтын – асцена хъада анхъырхуаз ацIх акIвпI. Ауаъа асценарий йшгIанахIвузла адгьылрхарджьга техника – атрактор алазара атахъын, ауи акIвымкIвагьи ахъыхырта уатыкв гIатрыкIкIгIара атахъын.
«Афильм злалгауа асцена уахъынлата архъа апны йхъыхIхуан, электрокъару ъагIауахвуаш аргваныта закIгьи гьаъамызтIта амзаква зшIахIрышвуаш гьхIымамызтI. ХIара МЧС хIрыхIван генератор гIахIырттI. Датшагьи асценарийла ква гIакIачIвара атахъын. ЦIабыргыта, ауи ауахъ йгIаквадзун, ауаса акамера апсабара аква йшатахъу апшта йгьгIанакIуам, йнапIылачпару ква атахъын. МЧС тшатарзынахIырхахтI амцарычвга машинаква [дзы ртата] йгIахIыртырныс – ауатгьи «ахча-багIвча» рымхIвауата йгIахIыртын хIуыс хIалгандзкIьара йгIахIцхърагIауа йхIыцын», – лхIватI Агрба, МЧС рцхърагIара хвы шузаквымцIуш, ауыла ауат швабыжта дшырзыразугьи гIацылцIахтI.
ВГИК астудентка йгIалгвалашвахитI атехника баргвыраква йгIарылцIла кьазукI агIан анхара ауырата йшзаламгуз, уацIыхъван квашуа гIайуатагьи хабар шгIарадзаз.
«Йара ауасагьи хIгвжважвауа хIынхун – араъа гIванла тшгIахIрыласра атахъхатI. Ахъыхырта уатыкв апны уагIата 50-гIвыкI алан. Аратква зымгIва гIалазгаз са шсакIву тшазыздырхуанта – ауи такIвгьи сгвы ахвгIун, ауаса йсыцынхаквузгьи сырчвпхащун: са сыхъазла ауи аъарагIвы ацIх шабгу архъа йнагIвгIагIвуа йыквын», – ллахIвараква хIыцагIвылшатI арежиссер.
Афильм айшыс «Бача» амчыбыжь ауацIа афестиваль асайт апны йтазлуштI, ауи аномер 81-пI. Йагъьу афильмква ангIалырхуа апшыгIвчва рнапIщтIыхра агIарбараквагьи йырпшуаштI – дзачIвызлакIгьи асайт апны тшаницIата (ауи учпарныс гьбаргвым) рыцIа йгвапхаз акино ахъаз напI щтIих йауаштI. Ауи акIвпIта Lift-Off Global Network фестиваль йалу апсуа фильм йапхыцIахуш дасузлакIгьи йуыс алайцIа йауаштI.
швталра йа тшаншвцIара атахъыпI.