Согъвым апны йгIадырбатI афольклористква материал азкIкIрала рынхара тамамта йадыргалырныс ахъазла йгIарцхърагIуш, азцIгIараквала йадгалу акнига.
Барганджиа Саид
АзцIгIараквала йадгалу, апсуа фольклор азызкIкIуа аъачIвагIагIвчва рынхара йазалху акнига Апсны къральыгIва университет анартдырри ашIыпIа фольклористики р-Квта апны йгIадырбатI. Ауи афольклористкви аэтнографкви рынхара апны йрыхъвуш цхърагIагапI, ауаъа ахабаргIвоу (ауагIа ршIалахIвара гIазхIвахуа агIвычIвгIвыс – аредакция ррытаразга) йзыргылра атахъу азцIгIараква йауацIыхта йгIарбапI.
«Акнига ашIыпIа нхара, афольклор йгьи аэтнография материал азкIкIра йазалхпI. Ауи ахабаргIвоу уанишIашвара айчважвара тамамта йшадугалуаш, ауыс ахъатаква рыцIа цIолата йшгIаууырдыруаш йырзынарху цхърагIагапI», – йхIвитI акнига аредактор хъада, апрофессор Джьапуа Зураб.
Ауи йшгIаликIгIазла, ари апш азцIгIара книга адгалра Апсны ауагIа р-Абашта айсра амщтахь зынла дазхъвыцтI. Йара ауи асхъан афольклорист акнига дадынхалуа далагатI, ауаса йапшым ашвхIаусыгIваква йгIархъшахъыцIуата анхара йызнымкIва йапышвтуан. Асквш 2016 агIан Апсны Республика анаукаква ракадемии «Алашара» адкIылари рангIалра йахъвыта анхара атаджвыквицIахырныс йылшатI, асквш 2018 агIан акнига гIацIцIтI.
ЙалкIгIата ауи злалу азцIгIараква йрыдынхалтI афольклористква ХIаджьым Саиди Барцыц Наали.
«Акнига нархара щарда зму азцIгIараквала йадгалапI, ажва ахъазла: «Швансабийыз йгIашвархIвуаз йзапш локIызйа?», «Ауат рфыр хъадаква жвдырхума?» Ауасамцара датшагьи щарда. АзцIгIага магIны хъадата йамапI афольклорист ахабаргIвоу дъадзайачважвауа дыррата йауа зымгIва абгата йгIайахвырнысла амаль йзыгIаныршара», – лхIватI ХIаджьым Саида.
Акнига апрезентация апны даъан Апсны Республика апхьари анауки рминистр Какоба Адгур. Ауи Апсны анауки афольклори рыхъазла ари ацхърагIага агIацIщтра магIны ду шаму йхIватI.
«ЗымгIва хIыхъазлагьи ауи гвыргъьара дупI, йалкIгIата афольклори аэтнологии йрыдынхалуа рыхъазла. ЗымгIва рапхъа йгIалскIгIара стахъыпI азцIгIага ауыжвгIанчIви тахъыраква йшрыквыргIапсу йгьи апсуа фольклор ажанрква зымгIва шгIахънатIуа. Афольклор азкIкIра йшатахъу апшта уадгылырныс ахъазла мгIва уыквызцIуш нхара дупI ари. Ауи апш литература швабыж йхIыгхауата йаъан», – йгIаликIгIатI Какоба Адгур.
АзцIгIага атираж ахъарыспI, экземпляр 350 ракIвпI йнадзауа. Акнигаква рызбжа акъала хъада акнигатйыртаква рпны йпшцIырщтуаштI, арахьари рызбжа Апсны абиблиотекаква рпны йынкъвыргуштI.
швталра йа тшаншвцIара атахъыпI.