АпхIвысква рыдынхалрала АААК ашIыпIа совет ащтащтийыгIв Ардзынба Гета Москва апсыуа культура афестиваль «Апсны» апны а-Конгресс апавильон анхара агIарбараква дрыквчважватI.
АпхIвысква рыдынхалрала ашIыпIа совет ащтащтийыгIв Ардзынба Гета АААК ахабарргарта портал йшгIаралхIвызла, Москва апны апсыуа культура афестиваль «Апсны» анакIвшуз Адуней апсуа-абаза конгресс асатырква йрылалтI уагIа 30-гIв. Апсыуа культура афестиваль йанархаракIта Москва апарк «Пресня Къапщы» апны сентябрь а 30 атшын а-Конгресс апавильон нхун, араъа йызтахъу дзачIвызлакIгьи йылшун а-Конгресс далалырныс.
А-Конгресс апавильон асасчва АААК йалалырныс мурад рымазтын кьангьашракIгьи шгIарыламхуш апшта акIвын ауи анхара шащтацуз: зтахъырала ауыс йацхърагIуз чкIвынргIа йауацIыхта йгIархIвун адунейла акъральква йыртабзазауа хIабашталагIвчва радкIылра знархару а-Конгресс анхара шадгалхауа.
«Йджьащахъвата апавильон анхара апны йгIаншатI хIабашталагIвчва хIшрыдынхалуаз зырхъвыхуаз урышв пхIвыспачкIвынкI а-Конгресс далалырныс ъагIалтахъхаз. Ауи йшылхIвазла, хIара хIгIаджвыквцIараква бзира злу ауысква рырхъйара нархарата йрымапI», – лхIватI Ардзынба Гета.
Ауи йгIалылкIгIатI шIыцта йалалкваз ауагIа пщыгIв хIвсыса абазата йшрылу, ауат рыуа азаджв апхIвысква рсовет ашIыпIа хъвшара апны лара лтахъырала дынхарныс дшхIазыру.
«Абазашта йауу хIахщчва ранкетаква гвыхътIыла йгвыргъьауа йхIыцызларныс ртахъыта мачвы рыцIарцIатI. АхIвсса рыуа азаджв, Дармыва Инна, АААК апхIвысква рсовет далалырныс дшхIазыру лхIватI. Ауи ахIатырла ажва гьалам ауи апхIвыспа хIынхара уысква дшгIарыдхIкIылуаш», – араса дгвышхвауа лгвтара хIыцагIвылшатI Ардзынба.
Ауи йшылхIвазла, апавильон анхара лкIгIара зму нархаракIта йаман аэтнокультура. Ауи аныргIалща ауагIахъа цIасквала йадгалан. АгIарбарта чкIвын Апсны апхъанчIви баракъква ргIаквчважвара нархартата йаман. АныргIалща араса йанадгылуаз хачIвыта рпахь йдыргылуан ауагIа радкIылра ауыс. ЙалкIгIата ауи акIвпI агIарбарта апны йхъаду хцIарата йзгIадрысабапыз апсыуа баракъ – адуней йырзыхътIу анапIсаргвыцIа. Ауи ахцIара сквшышвпхьадзара рурала абазакви апсыуакви аднакIылитI.
АААК апавильон апны а-Конгресс ахабарргарта портал гIазырбауа аэкран щаквгылан. Асасчва рыуа дзачIвызлакIгьи ауи анхара тшахайыргIвазарныс йылшун. АцхърагIагIвчва асасчва йддырбун асайт апны штшанырцIуш, а-Конгресс йгIаквчважвауата йыртахъу ахабарква шырзгIатыхуаш. Ауи акIвымкIва зымгIвагьи йрыларшун а-Конгресс амурадква, ахачIвква, анархарта хъадаква гIазырбауа ахабарргага буклетква, асайт адрес зныз авизиткаква ауаъа тшанызцIарныс, ауи ахабарква тшрыхазыргIвазарныс зтахъкву рыхъазла.
Апавильон анхара абгата йгIауахвырквын запхъанчIви псадгьыл йачвыхъарата йбзазауа хIабашталагIвчва йырзынархата йщаквгылтI, хъатакIла йгIанымхауата абаза уагIа ртшадкIылра йазынхауа а-Конгресс агвып тшрыдыркIылырныс йаквгIазшIнатуата.
«ХIабашталагIвчва а-Конгресс анхара гIальаматра ду азрымапI, – араса лырхъвыхра лахIвараква хIыцагIвылшатI Ардзынба Гета. – Апавильон асасчва зымгIва рацкIыс рыцIа щарда йыззцIгIуз закIын – а-Конгресс анхара йалалырныс, йацхърагIарныс ахъазла амальта йрыму. ХIайгвыргъьитI хIыззынхауа ауагIа йрыуата щардагIвы ргвы ъацхIауа, хIуагIахъара агIахчари атшауацIнарыхри гIальаматра ъазрыму, хIцIаскви хIкультури рпшдзара хвы ъаквырцIауа».
АААК апхIвысква рсоветква ращтащтийыгIв кьангьаш гьазгIалгуам ари анархартала апхъахьылагьи нхара акIвыршара шатахъу. Ауи асхъан а-Конгресс аунашва здыруаш, йалалуаш рпхьадзара рыцIа-рыцIа йщардахуштI, ауат анхара апны рыцIа-рыцIа джьгарта тшгIадырбуштI.
«Ари анхара агIарбараква хвы рыквуцIарныс баргвыпI. Ари афестиваль адиаспора йшабазу рхъа аладырдухара йахъазымкIва йрыларкIырныс йаквнаргвышхвитI тшадыркIылра, апхъанчIвиква йхIызгIаныржьыз акультура тынха ащатаква рхъмаштылуата, йрылархIвауата йбзазарныс шатахъу», – араса лажва налырдзахуата йгIацылцIахтI Ардзынба Гета ари афестиваль марамшы апхъахьылагьи ргвышхвара гIалцIыртата щардагIвы йшырзалуаш.
АщтащтийыгIв датшагьи йгIалхIватI Москва апны уыжвласыла апхIвысква рсовет ахъвшара гIаныршахарныс шылтахъу.
✊️
швталра йа тшаншвцIара атахъыпI.