АААК ашта хъвшара асовет йалу рбзирала Гвыдауыта ауацIа йапшым атыпква рпны ауыжвгIанчIви спорт турникква дыргылтI.
Барганджиа Саид
Апсны акъала Гвыдауыта ауацIа йапшым атыпква рпны щарда мцIуата араъа йгIандыршаз АААК ашта хъвшара асовет ауысхагIвчва хспорт турниккI дыргылтI.
Асовет аунашвачпагIв Лакоя Амра йшылхIвазла, апроект ашта совет ангIанша октябрь а 3 атшынбырг йгIархъвыцтI – ауи агвып йрыуазаджву аспортсмен Джениа Алмасхан йгIаджвыквицIатI. АгIаджвыквцIара асовет йалу зымгIвагьи йацыркIын йащтагIайуаз атшын йгIашIарышвта ауыс йадынхалуа йалагатI.
«Апроект абзазара йаналагIыжьуаз асхъан хIыгIвзачвагьи гIахIцхърагIатI, интернет йтахIцIаз апостква рбзирала пщымшкIла ахча гIазхIкIкIытI. ЙгIалскIгIара стахъыпI ахча гIалазцIаз Гвыдауыта абзазагIвчва йшырхъазым. Сшхъвыцуала, ауи магIны амапI. АцIабырг схIвапIта, апхъапхъа жвамшкI руацIа гIвтурниккI хIыргылырныс акIвын йшаквхIкIыз, ауаса гIамта айшысла зпхьадзара рыцIа йайхIаз ахча анадхIкIыл хтурниккI хIхвгIата йхIыргылырныс хIылшатI», – лхIватI Лакоя.
Ауи йшылрытамамызла, йдыргылыз атурникква аурам фитнес знархару спорт ъамапсыма квпшырапI, ауи «воркаут» – хIва йапхьитI (ангьльыз ажва workout – «тшыбжьара» йгIахъыхпI). Ауи йапшу атурник апны йапшымкIва тшарыщцара 25 райхIа чпа йауитI агIвычIвгIвыс йыпкъ ажьышвква зымгIвагьи йрысабапхауата, йаргьи спорт квпшыра бзи дтанаргылуата. Ужвы Гвыдауыта апны йызтахъу зымгIвагьи хвыдаъа ахIауа цкьа йылата спортла рхъа йадынхалырныс рылшуштI.
Гвыдауыта апны АААК ашта совет анхара даквчважвауата Лакоя Амра йшылпхьадзауала, ауат абзазара йаларыжьуа апроектква нархарата йрымазара атахъыпI ажвлара рсабап.
«А-Конгресс ашта хъвшара асовет йамурад хъадата йспхьадзитI абзазагIвчва йгIаджвыквырцIауа ажвлара уысква йрыцкIра. Ауат ауысква йрыуапI культура, спорт йгьи датша нархара змакву, апсуа-абаза уагIахъа рыбызшва, ркультура, рцIасква ртшауацIыхра йацхърагIауа», – лхIватI асовет аунашвачпагIв.
АААК ЙхIаракIу асовет ауысхарта аунашвачпагIв Таниа Кан йшгIаликIгIазла, Гвыдауыта апны АААК ашта хъвшара асовет йапхъахауа апроект ауи ангIандырша амщтахь жвамшкI ахIа мцIыскIва абзазара йаларжьырныс рылшатI.
«Акъала-фыр Гвыдауыта апны йгIаныршу АААК ашта хъвшара асовет а-Конгресс анхара апринципква дахIврала йгIазырбауа швапха бзита йгIахв йауаштI. Апроект архъйара йазынархата ахча гIалазцIаз зымгIвагьи хIырзыразпI, йалкIгIата ашта хъвшара асовет ауысхагIвчва рхъатала. Ауат уысла йгIадырбатI: хIанацIагылуа йхIылшауа щардапI», – йхIватI Таниа Кан.
Ауи йшгIаликIгIазла, а-Конгресс ашта хъвшара советква ангIандыршауа асхъан зпшырта рчпауа АААК агвып йрылата йынхарныс зтахъу ракIвпI – «акъала йа акыт абзазара агъьчIвра знархару, ауагIа, ажвлара рсабап гIазлыцIуа апроектква рырхъйара апны».
«Ауи апшта хIыгIвзачва, хIдырква хIрайкьангьашуамцара згвы цхIауа агIвычIвгIвысква хIрабадыритIта дара абзазагIвчва ргIальаматра злу ауысква хIацацхърагIумцара йхIырхъйитI. Апсуа-абаза уагIахъа ъабзазауа аштаква рпны а-Конгресс ауысхагIвчви дара абзазагIвчви ркъару анадыркIылра асхъан агIаджвыквцIара бзикви апроекткви дырхъйарныс гвышхвара гIарылалитI йгьи йрылшитI», – йгIахIгвынйыргIвитI Таниа Кан.
ЗымгIва рацкIыс атурникква йрайгвыргъьаз дара акъала абзазагIвчва ракIвпI.
«Аворкаутква щарда цIитIта адуней акъральква рпны йауацIыхта ауагIа йгIадрысабапитI. Швабыж сайгвыргъьитI ауат ужвы бзи йыгIбауа хIыкъала апынгьи йъагIаншаз. ХIаргьи хIгIайлуштI араъа, хIсабиквагьи гIагIдлуштI. Акъала ахъазла ари апроект швабыж йбзидздзапI», – араса йпхьадзитI акъала абзазагIв Барганджиа Зульа.
Гвыдауыта апны Адуней апсуа-абаза конгресс ашта хъвшара асовет асквш 2019 октябрь а 3 агIан йгIандыршатI. Асовет ауысхагIвчва йрыуапI Анкваб Инал, Джениа Алмасхан, Гицба Хамида йгьи ауи аунашвачпагIв Лакоя Амра.
швталра йа тшаншвцIара атахъыпI.