ЙагIвсыз амчыбыжь ауацIа Апсны апны коронавирус рыхьуата ужвыгьи 55-гIв гIараутI, азгIва рыхьуи йрымхьуи гIаддырдыруата архъвыхра 655-гIв гIакIылстI. Ауи апш хабар аргатI АуагIа коронавирус згIва йачвыхчарала аоперштаб.

Аштаб ауысхагIвчва йшырхIвазла, ужвы ари асахIат Гвдауыта Аквта район чымазагIвтара апны коронавирус шрыхьуа щаквдыргылхьата 21-джв щтIапI, ауат йрыуата ахыгIв мачIкI йхIатлапI, азаджв рыцIа дхIатлапI. Амчыбыжь ауацIа ачымазагIвтара хгIвы гIацIырщтхтI. Апсны дакъральыгIвта йчмазагIвыз азаджв йайъазарныс датша къралькI дыргатI.

"Пандемия гIаджвыквлищтара Апсны апны коронавирус зхьуата йщаквдыргылыз зымгIва шалу 189-гIвы йнадзитI. Ауат йрыуата 69-гIвы бзихахтI, хгIвы псытI", – хабар аргитI аоперштаб.

АуагIа коронавирус згIва йачвыхчарала аоперштаб ауысхагIвчва датшагьи йгIархIватI Апсны апны COVID-19 ауыс уазцгIата аъачIвагIагIвчва рбжьагажва уаздзыргIвы йызлауаш йанакIвызлакIгьи йынхауа ателефон номерква шаъу.

Согъвым абзазагIвчви асасчви 995–02–07 йгьи 935–30–71 номерквала телефон йас йауаштI, Очамчыра – 925–10–09, Ткъварчал – 925–10–03, Гала – 925–10–07, Гагра – 925–10–05, Гвдауыта – 925–10–02, Агвдзера – 925–10–04 номерквала.

Щарда йнамихуата Согъвым апны йазакIу аномер 0303 уас йауата йырчпуштI, йазакIу аномер ареспублика шабгу апны йынхауата йырчпарнысгьи йащтапI.