Декабрь а 20 атшын Согъвым аквта гIарбарта пещ апны Апсны ауагIа рартистка Агумаа Софа любилей йадахIвуата йакIвшатI асурат гIарбарта «АгIахътIра сайырква рагIамта».
Барганджиа Саид
Асурат гIарбарта «АгIахътIра сайырква рагIамта» апны Апсны уагIа рартистка Агумаа Софа лхъатала йазылкIкIыз асуратква йрыуата 70 райхIа аныргIалын апщаша, декабрь а 20 атшын. АгIарбарта Агумаа йылхъыцIуа асквш 80 аюбилей йадахIвуата йадгалан йгьи араъа асасчва тшахадыргIвазарныс рылшатI актриса лбзазара апны рыцIа магIны змаз агIаншараква.
Агумаа ажурналистква драчважвауата йшылхIвахызла, лынцIра шабгу йауыс хъадаз, ажва аламкIва, атеатр акIвын. Ауи лгвы йтата дазсакъуа йынкъвылгитI турасипхьадза, ауи лыхъазла ауат «асабиква йыргIвызапI».
АгIарбарта агвыргъьахъв гIахътIра апны йгIапхьатI Апсны апрезидент Хаджимба Рауль йхIвахIвра. Ареспублика а-Хъада йгIаликIгIатI «апсыуа актёр шIаква ргIадзныргылра, Апсны къральыгIва чкIвынргIа ртеатр ащаквгылра йгьи ауи аршIыйара унашвахъцIара» рпны Агумаа Софа лалацIара ду.
Агумаа ларгьи унашва зхъылцIауа ЧкIвынргIа ртеатр уыста йызквыркIкваз гIалрахан асасчва йралхIвтI. Ауи йшылхIвазла, атеатр агвып йыргвыгъапI аспектакль шIыцква дыргылырныс, йалкIгIата «асцена апны йгIабзадыргылхырныс» ргвыгъапI Щынквба Баграт йгIвыра ду «АцынчIварах» афырква.
«ХIара гвала щарда хIымапI, Анчва йхIвузтын, абзазара йалагIыжьпI», – лхIватI актриса. АгIарбарта асасчва ашIаква щардагIвыта йрылан, ауат ъауаз Согъвым йгьахъазымызтI, Апсны анахьанат акъалаквагьи йгIартыцIын йаъан.
«Сара йсгвапата сгIайтI. Агумаа Софа лспектакльква щарда сырпшытI схъатала – ауат зымгIва сгвы апны щта лашара гIанырыжьтI. Апхъахьылагьи сквшщарда рурала аршIыйара дахIвраква лзыстахъпI!» – лхIватI Гагра абзазагIв Шулумба Милана бзи йылбауа актриса длылачважвауата. Айззара апны ажва пха щарда рхIватI.
«ШIырпшыра змамкIва йджьащахъву Агумаа Софа! Ауи йацапшыта дпшдзапI амелодрама апынгьи акомедия апынгьи», – йгIалылкIгIатI Апсны телебара ажурналист Абшилава Лана.
Атеатр йгьи акино рактриса, Апсны уагIа рартистка Агумаа Софа лыршIыйара нхара Тбилиси атеатр училища дангIалга асквш 1961 агIан Чанба Самсон йыхьыз зхъу Апсны драма театр атруппа дрылата йджвыквылцIатI.
ЛыршIыйара сквшква рурала турасы 70 райхIала дгIахъвмартI. Ауи уахьчIва йъагIадзазгьи бзи дырбитI апсыуа апшыгIвчва. Асквш 2014 август йгIашIарышвта Агумма Апсны къральыгIва чкIвынргIа ртеатр даршIыйара унашвачпагIвпI. Декабрь а 20 – артистка йлйымта мшыпI, сынчIва ауи йлыртлапIитI йылхъыцIуа асквш 80 йадахIвуа аюбилей.
швталра йа тшаншвцIара атахъыпI.