АААКи арыпхьагIв Джугелиа Инни йацдырхъйауа апроект апкъ йтата сынчIва йапхъахуз алекция асуратгIвгIвчва ъадрыхIазыруа СогIвым аучилища апны йакIвшатI.
Селма Базба
Адуней апсуа-абаза конгресс агвып «Ирӡтәым» (апсуа бызшвала – «йрыдзчIвым, йурыдзта амаль змам» гIаныцIитI) проект апкъ йтата АГУ апны апсуа бызшва акафедра арыпхьагIв Джугелиа Инна далата алекцияква акIвдыршауаркIвитI.
Апроект чкIвыныргIа агвбайара, ауагIахъа культура рыладыркIра, апсуара ацIасквала йбжьара, рцри бызшви ацIаскви ахабзакви бзи йырбауата йгIадзныргылра йазынхитI. Алекцияква акIвдыршарныс атурыхдырыгIвчва, абызшвадырыгIвчва, аэтнографкви аэтнологкви гIадрайгвитI.
ХIызту асквш агIан йапхъахуз алекция Чачба А.К. йыхьыз зхъу, асуратгIвгIвчва ъадрыхIазыруа СогIвым аучилища апны йакIвшатI. Ауи дгIапхьатI аучилища арыпхьагIв, асуратчпагIв ЧIвыджьба Нодар. Айчважвара азъазара апны цри бызшва амагIны йазынархан.
Анйара йгIазшIырттI АГУ афилология факультети СогIвым акъральыгIва колледжи рстудентквагьи.
Дызквчважварныс йгIалихыз ауыс апкъ йтата асуратчпагIв апсуа азъазара апны амифология магIныта йаму гIхъитIытI, атурых, акультура, аэтнография йырзынархата джьащахъвара щарда йхIватI, йара йыршIыйари йбзазари йгIарылхта кIара уазызбжьауа агIаншараква дрыквгIашIастI. АпхьагIвчва ауи йыздзыргIвра йахъазымкIва джьгарта айчважвара йалалуан, азцIгIараква дыргылуан, аджьауапква йрымагIальаматта йрыздзыргIвуан.
Анйара апны цри бызшва гIащаквыжьра шатахъу ауысла щарда рхIватI.
«Абызшва – дырра злауауа амальпI, ауи акIвпI агIвычIвгIвыс аршIыйарагьи азъазарагьи злаййырдыруа. Абызшва агIвычIвгIвыс гIвычIвгIвыста дщаквнаргылитI, ауи йчпащаква, йбзазаща, йдунейпшыща таракI йтанаргылитI», – йхIватI ЧIвыджьба.
АсуратчпагIв «Ирӡтәым» проект ашIаква рыхъаз магIныта йаму гIаликIгIатI.
«Апсуа бызшвала йакIвшауа апроект аучилища йахъазымкIва Апсны апхьартипхьадза апны йатахъыпI. Араъа йызлачважвауа ауысква гьапшым, ауаса ауат зымгIва апсуа бызшва цкьала йрыквчважвитI, аздзыргIвчвагьи айчважвара йгIалалырныс лшара рымапI. Ауи чкIвыныргIа апсуа культура йазрыму азыгIальаматра йаланархIитI, рцри бызшвала йхъвыцырныс йгьи йчважварныс рыцIагьи ргвы йгIащтIнахуата йачпитI». – йхIватI ауи.
Апроект гIалазгаз Джугелиа Инна сынчIва ауи аргIапсща шгIадыршIыцыз даквгIашIастI.
«Ирӡтәым» проект асквш 2023 агIан дахIврала йджвыквхIцIатI. Культура, азъазара, апсуа цIаскви ахабзакви йырзынархата 10 айчважваракI адыгIгалтI. СынчIвагьи акыт апхьартаква хIцауамца айчважвараква акIвхIыршалуштI. Ауаса хIара йхIтахъыпI апхьагIвчва Лыхнашта йа абари аучилища апшта зджьара йыгIгауамцара йакIвхIыршуш алекцияква хIрыщардарныс», – лхIватI Джугелиа.
ЧкIвынргIи физкультури тшауацIдрыхрала АААК ахъвшара анхагIвы, апроект архъйара агвынзыргIвуа Квициниа Есма апроект сынчIвагьи дахIвра амазлушта дшайгвгъауа лхIватI.
«ХIпроект апкъ йтата йадыгIгалуа анйараква алекцияква йгIарыпхьауи аздзыргIвчви йхътIыта йшайчважвуш апшта йхIчпитI. Йауа ухIварыквын, хIара хIыхъаз йхъаду дасу йгвгIанаграква шизыхIвуш акIвпI. Ауи йапшу аформат ашIаква рыцIа рхъа йгIатахитI. ХIара хIгвыгъитI арат апроектква йгIарылалуа чкIвыныргIа хIуагIа рыбызшва, ртурых, ргвбайара цIолата йддырдырныс ртахъхушта». – йгIалылкIгIатI Квициниа.
Ауи йшылхIвазла, йащтагIайуа алекция ласыла йадыргалныс йаквдырпшитI.
«Ирӡтәым» – Адней апсуа-абаза конгресси АГУ апны апсуа бызшва акафедра арыпхьагIв Джугелиа Инни йацдырхъйауа проектпI. Апроект апсуара ауагIа йрылагара, Абаза уагIа рцIаскви рхабзакви гIащаквыргылхра йазынархапI. СынчIва апроект апкъ йтата 10 анйаракI адыргалырныс хачIвыта йлырхтI.
швталра йа тшаншвцIара атахъыпI.