АААК ЙхIаракIу асовет йалакву а-Конгресс анхара уахьчIвала агIарбараква шаъу йрылачважватI йгьи анхара апны йхъаду анархараква лырхтI.
Барганджиа Саид
Адуней апсуа-абаза конгресс ЙхIаракIу асовет йалакву йызкьазуу ралачIвара апны апщаша октябрь а 17 атшын уахьчIвала анхара шакIвшауа йалачважван апхъахьыла йыздынхалуаш лырхтI.
АААК ЙхIаракIу асовет аунашвачпагIв Эгьзакь Мусса алачIвара ангIахъитIы амщтахь ажва архъйагIв секретарь Гицба Инар йыйттI. Ауи йызлапшуашыз ауысква гIашIипхьадзатI – АААК ЙхIаракIу асовет апрезидиум апхъала йызлачважваз ахуыскI. А-Конгресс йалалырныс зтахъу шнарахвуа рыцIа йауацIыхта даквчважватI АААК ЙхIаракIу асовет аунашвачпагIв йуысхарта ахъада Таниа Кан. Ауи йшгIаликIгIазла, уахьчIвала а-Конгресс ашIыпIа алаща ащапIы щтIарцIатI.
«А-Конгресс йалалырныс зтахъу рнахврала анхара джьгарта йакIвшитI, ауи анхара абзирала сквшыкIи бжакIи ауацIа АААК уагIа 1000-гIв райхIа алалтI. Апсны апны ареспублика совет Гицба Инар дахъадахатI, араъа а-Конгресс йалу рпхьадзара уагIа 346-ла йалахIатI, Къабард-Балкъар апны – Пшванокъва Владимир, уагIа 30-гIв, Ставропольшта апны – Чагва Армида, уагIа 38-гIв, Москва апны – Барганджиа Даур, уагIа 80-гIв, Санкт-Петербург апны – Реквава Темур, уагIа 35-гIв. Аджария апынгьи йгIаныршапI шIыпIа совет», – йхIватI Таниа Кан.
ЙгIачважвара далгауата, ауи йшихIвазла, а-Конгресс йалу рпхьадзара йалахIара ахъазла ашIыпIа советква зымгIвагьи ркъару адыркIылта йацынхара атахъыпI.
УадыргIвана ЙхIаракIу асовет йалакву рпахь дгIачважватI ауысхарта аунашвачпагIв йтарагылыгIв Калинкин Михаил. Ауи сквшыкIи бжакIи руацIа адкIылара йгIадрысабапыз ахча даквчважватI.
«Асквш 2018 йгIашIарышвта асквш 2019 сентябрь мыз гIацIанакIуата акврыдзраква рсмета мильуан 37 раъара надзатI. Ари апхьадзара йаланакIитI а-Конгресс ахабарргарта портал йазалху, АААК анхагIвчва рынхаша, а-Конгресс йакIвнагашауа ауысква радгалра акврыдзраква», – йхIватI ауи.
Калинкин йшгIаликIгIазла, а-Конгресс анхара уахьчIвала ахчалагьи техника ъамапсымалагьи датша гIалцIырталагьи абгата АААК ЙхIаракIу асовет аунашвачпагIв Эгьзакь Мусса йадигалитI ухIва ауаштI. АААК архъйагIв директор датшагьи йшгIацицIахызла, А-Конгресс анхара акврыдзраква рызбжа ЙхIаракIу асовет йалу Агрба Беслан йалайцIитI.
Анйара апны дгIачважвауата ахабарргарта портал аунашвачпагIв Лазба Амина ажванахъа шIыцква гIалрахатI, йалкIгIата, а-Конгресс алалра знархару ахIвара швъа аформат электрон квпшыра амазларныс йгьи амаль аъазтын ауи йалакву электрон аршахIатга рыртуата псхара гIандыршарныс. АААК ЙхIаракIу асовет йалакву йацшIакIта арат ажванахъаква йрыцыркIтI.
АААК ЙхIаракIу асовет йалу Барцыц Олег анйара шакIвшауа даквчважвауата гвы айттI Эгьзакь Мусса дызхъаду АААК йакIвнаршауа анхарагьи анхагIвчва гвып йрылу ачкIвынчва шIаквагьи рджьгарра «хвдудздза рыквуцIушта йшаъу». Ауи йазхъайцIитI ари апш нхара «гIамта айшысла агIарбара бзидздзаква шамазлуш».
«Сшхъвыцуала, Адуней апсуа-абаза конгресс анхара рыцIа-рыцIа йашымтахитI. Багъьата йазхъасцIитI а-Конгресс йалу рпхьадзарала йшадкIылара духуш. ЙызбитI а-Конгресс аядро шынхауа, швабыж джьгарта йшынхауа къраль щарда рпны АААК йгIалалуаш ауагIа ауысква рхабар ддырдырныс, йырзынадырдзарныс ахъазла амедиа амальква шгIадрысабапуа. Йшызбауала, щарда йнамихуата ауи анхара бзира щарда гIахъшахъыцIуаштI», – йхIватI Барцыц йажва далгауата.
Адуней апсуа-абаза конгресс ЙхIаракIу асовет алачIвараква йапымшвтуата йакIвшитI. ЙагIвсыз анйара асквш 2019 июнь агIан Астомбыль апны йакIвшатI. Ауаъа йагIвсыз асквш ауацIа АААК анхара агIарбара хъадаква йрылачважватI.
швталра йа тшаншвцIара атахъыпI.