АшIыцраква 25.02.2019 15:10 23233

КВН агвып «Апсны йауу анартква» ркапитан, апсыуа йгьи Россия актёр, арежиссёр Таниа Тимур Адуней апсуа-абаза конгресс йалу рсатыр йалайырхIатI.

Барганджиа Саид

Йхъаду апсыуа мшыркъвагIвы, КВН агвып «Апсны йауу анартква» ркапитан, Россия ателеканал ТНТ айачIва йгьи арежиссёр Таниа Тимур Адуней апсуа-абаза конгресс йалу дрыуазаджвхатI.

АААК даналалуаз Таниа Тимур йшгIаликIгIазла, а-Конгресс алалра йгIаныцIитI апсыуа-абаза уагIахъа ргIахчари ртшауацIыхри знархару апроектква рырхъйара джьгарта ушалу.

«РыцIа йхъаду байарата хIара йхIыму хIкультура акIвпI. ДзачIвызлакIгьи йылшауала хIуагIахъара агIахчара дацхърагIара атахъыпI, ауыла дгIадзынзыргылыз, адахIвра мгIва дыквызцIаз й-Псадгьыл пIатIу шаквицIауа гIайырбауата», – йхIватI ауи.

Таниа йшипхьадзауала, ауагIахъа культура атшауацIнарыхра аэтнос агIахчара йузакъвымгушта йапщылапI.

«Йхъаду абанпараква ршIымчIвара акIвпI. Ари акультура хац шIчIварыквын йара аэтносгьи ыдзуаштI. Ауи адзра адуней шабгу ахъазла лдзгIарахуштI», – йгIаликIгIатI а-Конгресс йалалгIвацаз Таниа.

Актёр йшипхьадзауала, АААК ахачIв хъадаква йрыуазакIыпI «апсыуа-абаза уагIа злащаквгылу зымгIва агIахчара, йалкIгIата йырбайара цIабыргу: абызшва, ацIасква, акультура».

«Ауи акIвпI хIара анахьанат ауагIахъаква хIызларапшым, адуней ауагIахъаква ртгIачва ду хIахъвыта хIызчпауа. ХIцIас байакви хIапхъанчIви культури рунашва рдырырквын анахьанат акъральква рбзазагIвчва зымгIвагьи ауи дара рылаквала йырбарныс гIартахъхуштI. Ауи уыс дупI, ауаса а-Конгресс ауи ркъару аквхъуштI», – йгIацицIахтI Таниа Тимур.

Адуней апсуа-абаза конгресс далалныс дахвитпI апсуа-абаза этнос йрыуата йызтахъу дзачIвызлакIгьи. Ауи ахъазла а-Конгресс асайт апны ахIвара швъа утагIвыта info@abaza.org электрон адресла йущтира атахъыпI, йа ахIвара швъа АААК ашIыпIа хъвшаракI йырнапIыцIаршвара атахъыпI.

Таниа Тимур асквш 1980 агIан Согъвым апны дйытI. Асквш 2005 агIан КВН агвып «Апсны йауу анартква» дыркапитанта КВН ЙхIаракIу алига дачемпионхатI. Актёр йалкIгIата дызлабергьыльхаз ТНТ амшыркъвара проектква «Зны Россия апны» йгьи «АуагIахъаква райгвара» дрылата дызлагIахъвмарыз акомедия турасква ракIвпI.

Таниа Тимур Москва апны асценаристкви арежиссёркви ЙхIаракIу ркурсква дгIарылган асквш 2018 агIан режиссёр пычIв нхарата йхъихтI акомедия фильм «АйгIайра ахъазла сизыразпI сабаду».