Барганджиа Саид

АААК йджвыквнацIатI цри бызшва арыпхьара знархару аонлайн-проект «Апсышвала хIчважвитI/Абазала хIчважвитI». Апроект шIыц ахачIв хъадаква йрыуапI апсуа-абаза диаспора йъанызлакIгьи цри бызшва ддырдырра ахъазла йауацIыху амальква рымазларныс.

Апсуа бызшва ахабар гIауазхIвуа 10 азцIгIаракI рджьауапква

УахьчIвала апсуа-абаза уагIа адунейла къраль 50 райхIа йыртата йбзазитI. Ауи асквшышвква урылалта йщаквгылыз, йазакIу абызшви ацIаскви змата йгIамгIвайсуа йадкIылу этноспI.

АААК ЙхIаракIу асовет аунашвачпагIв Эгьзакь Мусса дшхъвыцуала, уахьчIвала йакIвшауа аглобализация апны рыцIа-рыцIа йбаргвхитI ауагIахъа байара, апхъанчIви цIасква йгьи абызшва абайара гIаухчарныс.

«ЙалкIгIата ауи ахъазла АААК амурад хъададзаква йрыуазакIыпI абаза уагIахъа ргIащаквыжьра йащату цри бызшва агIахчари атшауацIнарыхри. Асквш 2017 йгIашIарышвта АААК анхагIвчва гвып адиаспора ъату акъральква рпны цри бызшва атшауацIнарыхра джьгарта йацхърагIитI. АААК ашIыпIа йгьи ашта хъвшараква ъагIахъыртIуа атыпква рпны цри бызшва арыпхьарала, агIахIвра азыбжьарала акружокква гIандыршитI. Ажва ахъазла, араса акIвпI Санкт-Петербург апынгьи Москва апынгьи йшырчпаз», - йатайхIвахтI ауи ауыс даквчважвауата.

Аонлайн-проект йауацIыхта даквчважватI а-Конгресс ахабарргарта портал аунашвачпагIв, апроект гIазхъвыцыз Лазба Амина.

«АААК анхара апны йхъаду анархартаква йрыуазакIыпI – апсуа йгьи абаза бызшваква ргIахчари ртшауацIнарыхри. Ауи ахIатырла ари апш проект гIаджвыквхIцIарныс щарда цIуата сгвы йтан, ауаса йапшым ашвхIаусыгIваквала йгьаквымшвузтI. Майрата, гIапсара дукI апщыламкIва, хъвмарра квпшыра амата агIарысабапыгIвчва цри бызшвала ймайру ажванахъаква, ажвацгIайква зладдырдыруаш амалькI адыгIгалра стахъын. Абараса йгIаншатI апроект «Апсышвала хIчважвитI/ Абазала хIчважвитI», - лхIватI Лазба.

Ауи йшылхIвазла, агIвыбызшвакI – апсыуи абази – рарыпхьара гьакIвмызтI рыцIа йбаргвыз, йбаргвыз ауи агIарысабапра йапшым акъральква йыртабзазауа, йапшым абызшваквала йчважвауа апсуа-абаза диаспора йрылшарныс акIвын.

Суратла йадгалу абаза алфавит: арыпхьара цхърагIага

«ХIара хIгIарысабапыгIвчва йахьчIва йгIашIарышвта ансимшы йахъыргIвылгIарныс рылшуштI майрата йузыгвынкIылуа ажванахъакви ажвацгIайкви гIвбызшвакIла йгIазырбауа авидеоапхьарасахIатква анахьанат апщбызшвакIла йатакIта – ангьльызла, гIарыпла, урышвла, трыквла», - йгIахIгвынлыргIвытI Лазба.

АААК ахабарргарта портал анхара мшква рагIан ансимшы закIы-закI апхьарасахIат гIаквырцIалуштI хпа-хвба ажванахъала йалата, амыз ауацIа йызхъысуа ауи ацIыхъва йабаркIыта йадыргаллуштI.

«АгIарысабапыгIвчва ари апроектгIваца агIаршIыцхра йахъпшылуамцара йыртахъу апхьарасахIатква майрата йгIарауларныс ахъазла хIара ари апроект йазалхта Telegram апны «World Abaza Congress ABK/ABQ» канал гIанхIыршатI», - йгIацылцIахтI Лазба Амина.

Ауи йшгIалхIвазла, апроект АААК ахабарргарта портал анхагIвчви йапшым акъральква йырту абашаталагIвчви тшадыркIылын дара ртахъырала йынхумцара йацырчпатI.

Апхьага материал щатата йазалтI США ачеркес диаспора йрыуу Джонти Ямиш йынхараква. Ауи сквшкъомкI цIитIта абызшва программаква дрыдынхалитI, агвхъауа бызшвагьи рылата бызшва 20 рырдырра йазынарху мобил программа Optilingo джвыквйыжьтI. Апроект ахъазла Ямиши хвыдъа ангьльыз бызшвала йадигалыз ажванахъаква йадкIылата йгIайщтитI. Ауат ансимш чважвара йаланакIуа ажванахъаква рпроцент 95 гIацIанакIитI, ажвата 3500 райхIа йнадзитI. АбызшвадырыгIвчва арат ажванахъаква гIалырхуамцара ауыс сквшщарда йадынхалтI.

«ХIара хIабашталагIвчвагьи, а-Конгресс ахабарргарта портал атакIыгIвчва, апроект хвыдъа йацхърагIарныс йагвынгIвытI. Апсуа бызшва дадынхалитI Москва йтабзазауа афилолог Ажиба Алина, абаза бызшва – Къарча-Черкес йауу афилолог ХIасарокъва Бильаль, трыкв бызшва – Трыквшта йтабзазауа Аргвын Елис, ангьльыз бызшва – адипломат, Апсны агIвымакъраль уысква рминистерства анхагIвы Гагулиа Артур, гIарып бызшва – Сирия йгIатыцIхыз арепатриант, ажурналист Квашба МухIамад», - лхIватI АААК ахабарргарта портал аунашвачпагIв.

Дара ртахъырала ауыс йацхърагIауата рбыжьквала йыргIвитI абаза бызшвала ажванахъаква ажурналист, «Алашара» адкIылара ахабарргарта-алапшра хъвшара аунашвачпагIв ЧкIала Георгий, апсуа бызшвала – лара Лазба Амина лхъатала. АпхьарасахIатква рдизайн дадынхалтI авидеограф, ахабарргарта портал арежиссёр Хварцкиа Илона.

Апсыуакви абазакви заджвы йчIвгьи йапшым агвбайара йанкъвгагIвыпI

«Ари апроект хIыцызчпауа зымгIвагьи сшырзыразу схIвара стахъыпI. Швабыж сгвыгъитI ауи адунейла цри бызшва ззырдырныс зтахъу хIабашталагIвчва сабап ду рзгIанагуата йшрыхъвушла. Ауат срыхIвитI хIапхьарасахIатквала йддырдыруа ажванахъаква авидео йанырцIата йгIарщтиланыс, йгIарщтиуа агIвыраква хIнапаква йгIарыквхIцIалуштI», - лхIватI Лазба Амина лажва налырдзахуата.

Апроект гIвысквша йымгIвайсуаштI, ауи амщтахь рыцIа йалачпата тшауацIнахныс ауаштI: агIарысабапыгIвчва апсуа йгьи абаза бызшваквала абгата йнардзу адиалогква ддырдырныс рылшуштI.

Апсуа йгьи абаза бызшваква рарыпхьари ртшауацIнарыхри Адуней апсуа-абаза конгресс рынхара апны рыцIа йхъаду анархартаква йрыуазакIыпI. АААК анхара апны ари анархарта гватра ду азамапI – апсуа-абаза диаспора ъату акъральква рпны цри бызшва арыпхьарала акурсква гIахънатIитI, апсуа йгьи абаза бызшваква ргIахчара, ртшауацIнарыхра знархару ауысква йрыдынхалуа апхьахьа-бызшвадырыгIвчва йырцхърагIитI.

«World Abaza Congress ABK/ABQ» проект аканал тшанцIа йауаштI ари азцагала