Адуней апсуа-абаза конгресс асквшква 1992-1993 рагIан йакIвшаз Апсны ауагIа р-Абашта айсра апны йгIатыргаз АйгIайра сквш 30 анахъыцIуа йадахIвуата «Аибашьра асаламшәҟәы» («Айсра асальамшвъаква» – аредакция) проект шIыц джвыквнажьитI. Апроект йапшым ауагIа рзаъачвакви раргванкви йырзырщтиуаз асальамшвъаквала ауат рбзазара уыла йгIацIанажьуаштI.

Асальамшвъаква хвы зквцIауачву йшдыррагIалцIырту лхIватI апроект гIаджвыквызцIаз йгьи йанзыргIалуа чкIвыныргIи физкультури тшауацIдрыхрала АААК ахъвшара аъачIвагIагIв Квициниа Эсма.

«ХIара йхIмураду айсра асальамшвъаква ахъаз йазхIкIкIыта йгIазквчважвауа гIахIхIвахырныс гьакIвым. Ауат йагIвсызи хIызтуи агIамтаква адыркIылитI, хI-АйгIайра атурых йашахIатпI. ГIвырипхьадза угвы йнадзитI, ауагIа йтымхъара ахъазла закIгьи йампшуата йгIазылсыз абаргвыраква унарбитI. Ауат згIвыз ауагIа рлахIвараква айсра шабгаз йгIалырган угвы зрыпшкауа рсальамшвъаква йрыларцIатI. Ауат айсра, амамыр, ауагIа йгIарыквчважвауа, бзибарала, азхъацIарала, гвыгъарала йырчву гIахIвахрапI», – лхIватI Квициниа.

Асальамшвъаква рыцхIагIала йырчвыз асквшква 1992-1993 рыгIамта гIарыцIаркIитI. Ауат згIвыз ауагIа рныбыжьли бзазара швапхата йдырхIазли йгьапшым, ауаса зымгIвагьи рпсадгьыл, раргванква, рцриква, рыгIвзачва йрызрыму абзибара йаднакIылитI. АзджьакI знапIы йгIацIцIыз ауагIа уахьчIва адуней йгьыквхым, ауаса асатырква уанырбжьапшуа ауат ласыла йайгIайта руачIвымш насыпла йшырчвызлуш йшайгвгъауа убитI.

Апроект йалу йрыуазаджву АААК ахабарргарта хъвшара анхагIвы Хвтаба Алиса дызпхьаз асальамшвъаква лахIварата йгIалыларцIаз хIыцагIвылшатI.

«Сальамшвъипхьадза гвыргIвапI, шварапI, мдыррапI йгьи ауагIа йрылымцIуа гвыгъарапI. АгIвыраква ухъвырбышква гIаладыргылитI, йхьантаз агIамта уазыргахитI. Сара сгIазпхьаз атурых зджьара йгIанымхауата гвптшыгапI. Ауи хIайсра агIаншара чвгьадзакI йгIаквчважвитI. Авертолет ангIакIнырцIа зтгIачва аладзыз агIвычIвгIвыс йгвы йымрыдзныс къару гIайауитI, бзата йгIанхаз дрызныхIвитI, ауат ачвгьахараква уыжвласыла цIыхъва шрауаш йазхъайцIитI», – лхIватI Хвтаба Алиса.

Апроект АААК анхагIвчва айсра асквшква ртурыхква йшгIарыпхьауа знызлуш авидео гIаннаршуштI. Ауи акIвымкIвагьи апшыгIвчва асальамшвъаква гIазлыцIыз агIаншараква, ауат згIвыз ауагIа йырпхыцIахаз рархIвуаштI.

Ахъыхраква джвыквылхьатI. Апроект дарежиссерпI арыпхьарала, жвлара джьгаррала, згIвадарахчарала АААК ахъвшара аъачIвагIагIв Хьышба Науыр.

«Сара ари апроект шцуш сыла йгIацIазжьын сгвышхвауата ауи салагатI. Апроект шхъыхIхуаш ансимшы кIара шхъыхIхлауа йгьапшызлушым, а-Конгресс ауи ауысла уыршIыйара хвитта йауущтырныс лшара гIаунатитIта – ауи сайгвыргъьитI. СгвыгъитI апроект дзачIвызлакIгьи асальамшвъаква згIвыз ртара дтанаргылуашта, гIвычIвгIвыс кIьыдипхьадза йфырра йылыйнархIвушта», – йхIватI Хьышба Науыр.

Асальамшвъаква разкIкIра йацхърагIатI Гвдауыта йаъу Дбар С.П. йыхьыз зхъу Апсны ауагIа р-Абашта айсра амузей, Ардзынба В.Г. йыхьыз зхъу Айсра ртшхъвара амузей йгьи Эшера йаъу Айсра ртшхъвара амузей. АсальамшвъаквакI ауат згIвыз ауагIа рзаъачва дара йгIаргтI. ЙгIалырхыз агIвыраква зымгIва ауат згIвызи ртгIачвакви ръизинла йгIадрысабапуаштI. ЙхIазырхауа авидеоква асайти асоцсетква рпны а-Конгресс абгъьыцкви йгIартарцIалуштI.