Москва йту апсуа диаспора йалакву май а 9 Россия акъала хъада апны АйгIайра Амш андыртлапIуз «Аджьаль змам аполк» йрылата йгIамгIвайстI
Барганджиа Саид
Апщаша, май а 9, Москва йту апсуа диаспора ансисквша йакIвшалауа «Аджьаль змам аполк» акция йалалтI.
«Аполк» асатырква рпны ауагIа рнашхква сынчIвагьи йанакIвызлакIгьи йапшын. ЦIыпхгьи цIыпхчвгьи рапшта зымгIвагьи йрылархIвахьаз АйгIайра Ду артлапIара йгIауыланацIауа агвщтIыхра; абачви апачви, абадучви ауат ргIариква ргIарикви, абадучва рабачви ауат ртынхакви рапщылазара; зымгIва нанауахвуата йгIарылалуа уахьчIва йбзазаквауи нцIрала хIгвква рпны йбзазаквуши йазакIу ргвы амч – абаратква зымгIва ари амгIвайсра «йузымырпсуашта» йырчпадзитI. АмгIвайсра йалаз щардагIвы рсабиква – йхвыцыркIвугьи рыцIа йтшытхахьазгьи – айсыгIв фашаква рышвата рхъа щтIых йрыцпI. Араъа йубитI амакъым ъамапсымаква зму, збжьы пшдзу щардагIвы – ауат айсра азаман йаъаз ауарадква рхIвитI. Архъа мацIауыртагьи нхитI. Совет Союз йалаз ареспубликаква, Апсынгьи рылата, руагIа гвып-гвыпта йадгылитI.
«Аджьаль змам аполк» йрылагылакву дрыуапI йбергьльу апсуа жвлара-политика уыснкъвгагIв Шамба Тарас (асквшква 1992-2017 рагIан Адуней апсуа-абаза уагIахъа радкIылара (МАААН, ужвы Адуней апсуа-абаза конгресс) даунашвахъцIагIвын – аредакция ррытаразга).
«АйгIайра Амш – гвыргъьахъв дупI, йауа ухIварыквын, ауи адуней ауагIахъаква аднакIылитI. ХIара зымгIва йыгIдыритI ЙгIвбахуз адуней айсра рыцхIагIата йгIанагыз. «Аджьаль змам аполк» йапшу акцияква хIара рыцIа хIаргваныта хIырчпитI, [амамыр ахъаз зхъа щтIазцIакваз] ауагIа гIахIгваладыршвахитI, хвы рыквхIдырцIитI, рхабарква [йгIадзынгылуа] абанпараква йддырдыритI», – йгIаликIгIатI ауи.
Апсны рколонна йалагылапI чкIвыныргIа, Москва йапшым апхьартаква йрыцIу астудентква. Ауи апшта, Апсны йгIадрийыз астудент Дбар Исмет йабаду Дбар КунтIи ауи йаща цри Дбар Мироди рсуратква йнапIыцIа дгIайуан.
«Сабаду Берлиндза днадзатI, АйачIва къапщы аорден гIайквнадыргатI (ауи аорден Совет Союз айсра апынгьи амамыр бзазара апынгьи йхчарала, акъральыгIва шварагIварадара адгалрала гIатгара ду змакваз ракIвын йзыртуаз – аредакция ррытаразга), ауи йаща Мирод йцIыхъвахауа азамандза щтадъа дыдзта акIвын йшыгIдыруаз. ГIвысквша ракIвпI йцIуа ауи йыдзща атамам гIагIдырищтара. Ауи асквш 1943 агIан Керчь аргванква рпны дгIарщытI», – йтгIачва ртурых ахъвыкI хIахайыргIвазатI Дбар Исмет. АчкIвын йгIацицIахтI йгIадзынгылуа абанпараква рыхъаз Абашта айсра Ду йалата йайсквуз «рфырра гIагвынгIвра», «ауат рпахь хIара борчта йхIыкву тшазыдырра» магIын ду амата йшипхьадзауа, ауат рхабарква асабиква йрахIвлара шатахъу.
Абашта айсра Ду агIан йгIатыргаз АйгIайра Амш – май а 9 – ансисквша Россия йахъазымкIва Совет Союз йгIаланакIуаз анахьанат аштаква рпынгьи датша къраль щарда рпынгьи йдыртлапIитI. Абашта айсра асквшква рагIан апсынчIвыла йтыцIын афронт йпшцIалтI зкьы 55-гIв райхIа, ауат йрыуата 15500-гIв апсыуан. Айсра афронтква рпны йайсытI абазатагьи 3000-гIв райхIа
швталра йа тшаншвцIара атахъыпI.