Барганджиа Саид

Июль а 24 атшын КIавкIаз айсра йаладзыз рхъмаштылра син ЙынджьыгьчкIвын кыт апны айззара акIвшауата йгIахъыртIытI.  

ЙынджьыгьчкIвын кыт ахъада Джьантемыр Фуъад йшихIвазла, КIавкIаз айсра йаладзыз ауагIа рхъмаштылрала асин акыт апны йдыргылырныс абзазагIвчва жвасквша рапхъала ргвы йгIаташватI, ауаса ауыхвара уысква джвыквлырныс анхIылша цIыпх акIвпI. Ауи агIан «Алашара» фонд анхагIвчва ауыс йацыркIтI. «Асин ауыхвара акыт абзазагIвчва хвыцгьи дугьи зымгIва ркъару аларцIатI. Ауи хIара хIыхъазла магIны ду аман. ДзачIв гIвычIвгIвысызлакIгьи йуагIахъа турых йдырра атахъыпI», – йхIватI Фуъад.

Асин агIахътIра йадахIвуата йакIвшуз айззара йалан Адуней апсуа-абаза конгресс агIащтийыгIвчвагьи. АААК ЙхIаракIу асовет апредседатель йцхърагIагIв Тания Кан йшгIаликIгIазла, амхIаджьырра апсуа-абаза йгьи адгьа уагIа ртурых апны йымйыхуа хвырта цIолата ащта гIанхатI.

«Ауи арыцхIагIа хIгвы йтымцIуата йтазара атахъыпI. ХIара амхIаджьырра йаладзыз рыхъазла син анхIыргылуа апхъахьылагьи хIпшра атахъыпI. АмхIаджьырра йапшу арыцхIагIаква атагIанымшахырныс ахъазла хIуагIа ацIагылазара, хIбзазара рыцIа-рыцIа йагъьхауа йшымгIвайсуаш йащтата  джьгарта йацынхара атахъыпI», – йхIватI Тания.

ЙынджьыгьчкIвын кыт апны асин шгIахъыртIуаз йыла йабарныс, араъа КIавкIаз айсра йаладзкваз рхъмаштылра квырмыш азичпарныс йылшатI абаза мхIаджьырква ртынха Марщан Самир.

«Абазаква рчва йтшаз арыцхIагIаква ажвала йгьузыхIвушым. СгвыгъитI амхIаджьырква ртынхаква зымгIвагьи зынзаман рпсадгьыл йазгIацапахырныс шрылшушла. ХIткъвым апны сара сакIвпI йапхъахауата запхъанчIви псадгьыл йазгIацапахырныс зылшаз. ЙстахъыпI арахьарат хIайщчваква зымгIвагьи сара сапшта ауи ртлакIьырныс», – йхIватI Марщан Самир.

Ансисквша май а 21 атшын  КIавкIаз айсри амхIаджьырри йрыладзыз КIавкIаз ащхъа уагIа рхъмаштылра йамшта йгIалыркIгIитI Апсны, Къабард-Балкъар, Къарча-Черкес, Адыгейшта, датшагьи къраль щарда рбзазагIвчва.