АшIыцраква 26.08.2019 23:50 37752

АААК ЙхIаракIу асовет аунашвачпагIвгьи а-Конгресс ауысхагIвчвагьи Иордания нхара уысла йаъата Амман апны аспорт клуб «Аль Ахли Клаб» аунашвачпагIв йынйатI

Хагба Изольда

АААК ЙхIаракIу асовет аунашвачпагIв Эгьзакь Мусса, АААК архъйагIв секретарь Гицба Инар йгьи Иордания ахьызла ЙхIаракIу асовет апрезидиум йалу Абаза (Чква) Ануар ашвахьа август а 26 атшын Амман апны ачеркес спорт клуб «Аль Ахли Клаб» аунашвачпагIв Шыкым Омар йынйатI йгьи ацынхара ауысква йрылачважватI.

Эгьзакь Мусса йгIайрахатI а-Конгрессгьи «Алашара» адкIыларагьи аспорт атшауацIнарыхри ауагIа йрылагари гватра ду шазрыму. Ауи дшгвыгъауала, Иордания йауу чкIвынргIагьи Абаза Хъвмарраква йызрылалуаштI. Ахъвмарраква ансисквша Къарча-Черкес Республика апны йакIвшитI. Эгьзакь Мусса аспортсмен шIаква Къарча-Черкес йгIайрайгватI. Апсны ауыс зкву гIахIахвырквын, ауаъа аспорт клуб «Абаза» нхитI, йгIаликIгIатI АААК аунашвачпагIв.

«Иордания аспортсменква йрылшуштI Апсны апынгьи Къарча-Черкес апынгьи анкъвакъвраква йрылалырныс. Аспорт йгьи акультура уысква адыгIгалырквын хIара чкIвынргIа хIзадкIылуаштI», – йхIватI АААК ЙхIараку асовет аунашвачпагIв.

Аспорт клуб апрезидент Шыкым Омаргьи дадгылитI чкIвынргIа аспорти азгIвадара бзазащи йхънарыхра магIны шаму.

«ХIклуб апны ауагIа йапшым аспорт квпшыраква тшрыдыркIылырныс рылшитI: футбол, баскетбол, гандбол, дзцара. ЧкIвынргIа апсуа гIахIвраквагьи рылата КIавкIаз агIахIвраква тшъарзырбжьауа ансамбль нхитI. Аклуб апны уагIата 1000-гIвы раъара йапшым аквпшыраквала тшырбжьитI», – йхIватI Шыкым.

Анйара ъадзакIвшуш Эгьзакь Мусси Шыкым Омари аспорт анкъвакъвраква радгалрала ргвгIанаграква абархIвтI йгьи апхъахьыла йацынхарныс йангIалтI.

«Ари анархарала ацынхара тшауацIнарыхра, ашвапха бзиквала хIашIашIпшра атахъыпI. Аспорт хIара хIыхъазла апсыпнкъвгара йагIвызапI», – йхIватI Эгьзакь Мусса йажва далгауата.

АААК аунашвачпагIвчва Иордания Хашимит ПаштахIыгIвара август а 27 агIандза йаъазлуштI. Ауат ауаъа рцара-гIайра асквш 2019 аурала а-Конгресс аунашвачпагIвчва агIвыма къральква ргIарыкIвшара знархару аплан йаланакIитI. Ауи аплан асквш 2018 агIан ЙхIаракIу асовет йдрыбагъьатI. СынчIва асквш ацIыхъвадза АААК датшагьи йгIарыкIвшарныс ргвыгъапI Сирия, Германия, Голландия йгьи Трыквшта.