Барганджиа Саид

Адуней апсуа-абаза конгресс июнь а 2 атшын Очамчыра район йаланакIуа Атара кыт апны Асабиква ргIахчара амш йадахIвуата асабиква рыхъазла гвыргъьахъв адыргалтI.

Агвыргъьахъв джвыквмылскIва асабиква йырзымчхIахуата йазпшуан дасу йкьазу гIадзата рлактаква бзи йырбауа амультфильм фырква рсуратква ананырцIушыз. Зуыртла йдууыз акIьанджьква амультфильм фырква рфашала йгIвычата агвыргъьахъв ъадзакIвшуз асасчва рыла дырпшуан. ЙалкIгIата зымгIвагьи ргвы йгIатахатI атрансформер Бамблби, ауи йацхъагылата дзачIвсабийызлакIгьи ачвахъабага суратква рхъырхырныс амаль рыртуан.

Аниматорква асабиква рыхъазла датшагьи джьащахъваракI дрыхIазыртI – асабын швахъ чырпIиква ршоу. Йызтахъу дзачIвызлакIгьи йкъару йырхъвыхуата рахIа йдудздзу ачырпIи йырчныс дащтан.

Ахъвлапын ацIыхъва агвыргъьахъв йалаз зымгIвагьи ашвъабыгъь шоу рызпшуан. Асабиква йазалхта йрыздрыхIазырыз ашвъабыгъь серпантин амцIырпсауа йгIахIвуан, йкьахвуан. ЙцIыхъвахауата, асабиква шIырпшыра амамкIва йдыргвыргъьатI ахъгIараква. Ауат ахъгIараква согIата йырзыршатI йгIайта йаъаз асабиква зымгIвагьи.

АРИ АГIАНШАРА АВИДЕО АПШРА >>

АААК апхIвысква рсоветква рунашвачпагIв Ардзынба Гета йшгIалылкIгIазла, а-Конгресс Асабиква ргIахчара амш гватрадъа йгьгIанырымжьуашызтI.

«Ари атшын, ари агвыргъьарамш шакIвхIыршуш хIаналачважвуз хIыззхъвыцыз ауи акIвпI: цIыпх Согъвым аквта гвыргъьахъв айззара ду адыгIгалтI, абаружвы хIгватра рзынахIырхарныс хIтахъыпI аквта йачвыхъару акытква, йаргьи Атара кытла хIгIалагатI. ЙшхIпхьадзауала, ари агвыргъьарамш йаднакIылра атахъу акъала хъада йту асабиква йгьырхъазым, арат йрапшу агвыргъьахъв мшква акытква рсабиквагьи ргвы йгIатахауата, рсабихъа йахъвыта йаъазара атахъыпI. Ауи акIвпI Адуней апсуа-абаза конгресс уахьчIва араъа йзаъу», - лхIватI Ардзынба.

Атара аквтанай апхьарта математикала арыпхьагIв Квициниа Маврик йшипхьадзауала, ари йапшу агвыргъьахъвква асабиква бжьагажва рыланацIитI, йтамаму амгIва йыквнацIитI, йаргвыргъьитI. Ауыгьи амагIны швабыж йдупI.

«Ари агвыргъьахъв асабиква йцIыхъвахауа амызква рагIан йрыгхаз агвлахIара рызгIанагхтI, йауа ухIварыквын авирус ахъазла (акоронавирус апандемия йгIахъшахъыцIыз ашIакIра амальква рыхъазла – аредакция ррытаразга) асабиква щарда цIуата йгьабамбасызтI. ЙахьчIва йакIвшаз анйара ауат апхьарта абзазара шаъаз гIаднаргвалашвахтI. Ауи шабгу магIны ду рымапI. Ари агвыргъьахъв адызгалыз зымгIвагьи Анчва бзирата йаъу гIаритыргIатI. Асабиква ъану насыпгьи аъапI. Асабиква абзазара ахIальабальыкъраквагьи абаргвыраквагьи ухъдраштылитI. Адуней асабиква зымгIвагьи бзазаща пшдза рымазтI, рхъахьла ажвгIванд йанакIвызлакIгьи ймамырызтI», - йхIватI арыпхьагIв йажва далгауата.

Асабиква рлактаква гвыргъьарала йшырчвыз гвы ауымтуашта йгьаъамызтI.

«Сара швабыж сгвы йалахIатI, зымгIва рацкIыс йсгвапхаз швахъла йдырчуаз ачырпIиква шгIахIкIуаз акIвпI. Ари йапшу агвыргъьахъвква щардала йакIвшарныс стахъын», - араса лгвгIанаграква хIыцагIвылшатI апхьагIв Квициниа Сария.

Ауи лъахIльычкIвын Квициниа Милена хвыц агвыргъьахъв аналагагIваца йгIашIарышвта дгIахIвуа дджвыквылтI. Ауи йшылхIвазла, азаман ласдза йшагIвсызгьи гвы гьалымттI.

«ЙахьчIва агвыргъьахъв апны сара зымгIва швабыж йсгвапхатI - акытчаква ангIагIдыруазгьи ачырпIиквала хIшхъвмаруазгьи. Йадызгалыз зымгIвагьи швабыж сшырзыразу схIвара стахъыпI. ХIгвыгъитI апхъахьылагьи ауи апш гвыргъьахъв атахIзырчпахуашта», - лхIватI ауи.

Датшагьи пхIвыспачкIвынкI, Гицба Наала, лаба дйыцта Согъвым дгIатыцIын агвыргъьахъв дгIадгылтI. Ауи йшгIахIалхIвызла, сахIатквакI руацIа Атара кыт йауу лыквлагIвчва щардагIвы драбадырныс дахадзатI.

«ХIара швахъ хIырчуанта йалагIыжьуан, хIхъвмаруан. ЗымгIва рацкIыс йсгвапхаз асабиква хIшацхъвмаруаз акIвпI, ауат рыуа щардагIвы срабадыртI», - лхIватI ауи.

11 сквша йырту акыт абзазагIв Сангулиа Анри дшгвыгъауала, АААК апхъахьылагьи йатадыргалхуаштI ари апш гвыргъьахъвы.

«Сара зымгIва швабыжта йсгвапхатI, ауаса рыцIа сгвы йгIатахаз ачырпIиква шагвхIырцуаз, хIшгIахIвуаз акIвпI. Ари агвыргъьахъв адызгалыз зымгIвагьи швабыж хIырзыразпI», - йхIватI ачкIвын.

Адуней апсуа-абаза конгресс асабиква рыдынхалра гватра ду азрымапI. Асквш 2019 июнь а 1 атшын АААК Согъвым апны йауацIыхта гвыргъьахъв ду адыргалтI, ауи асхъан Апсны аштаква зымгIва йрыуата агвыргъьахъв йалан саби 300-гIв райхIа.

Асабиква ргIахчара адуней мшы – сквшщарда зхъыцIуа адуней гвыргъьарамшква йрыуазакIыпI. Ауи акIвыршара ауысла ащаквыргылра асквш 1925 агIан Женева апны асабиква рбзазаща агъьчIвра уысква знархараз Адуней конференция апны йгIаргтI. Ауаса ауи агвыргъьарамш йапхъахауата йдыртлапIарныс анрылша сквшы 25 анагIвс амщтахь – асквш 1950 агIан – акIвпI. УадыргIвана ауи ансисквша йдыртлапIауа йалагатI. Асабиква ргIахчара амш йгьгвыргъьарамшгIвацам, ауи ажвлара йгIаднаргвалашвахитI асабиква насыпла йырчвыта йгIадзынгылырныс, йзапхьарныс, йхъызхуа ауыс тшадыркIылырныс, йандухара зъадаб хIаракIу ан-абата, къральгIвта йщаквгылырныс ахъазла рхвитнагIаква гIахчара шатахъу.