Ноябрь а 26 Апсны апны а-Конституция амш дыртлапIитI. Адуней апсуа-абаза конгресс ЙхIаракIу асовет аунашвачпагIв Эгьзакь Мусса Апсны абзазагIвчва ауи агвыргъьахъвла драйхIвахIвтI.

Ауи йгIаликIгIатI асквш 1994 ноябрь а 26 Апсны Республика атурых апны мгIан ду зму гIамта шIчIварата йшалыз.

«Ауи амш йнарахвыз рахIа йымчу хабза къару зму ашвъа ареспублика ахъазла йбаргвдзаз агIамта агIан акъральыгIва ащапIы арыбагъьарныс, ахъахвитра щаквнаргылырныс, апхъахьыла акъраль пахьла йшчIвырхъуш апшта аъаща гIаншарныс ахъазла щата щтIанацIатI», – йхIватI АААК ЙхаракIу асовет аунашвачпагIв.

А-Конституция йанакIвызлакIгьи запшуагIахъазлакIгьи рыхъаз акъральыгIвара, акъральгIвра йгьи адемократия байараква йыргIарбагата йпхьадзитI Эгьзакь Мусса.

«Ауи ауагIа рыбызшвала, рдинла, жвларата йгIазлыцIызла алых аъамкIва йацапшу рхвитнагIаква арыбагъьатI. АкъральыгIва ахабза хъада – ауи ауагIахъа ртурых аурала йыззынадзаз адахIвраква адызкIылуа, акъральыгIва аполитика, ахабза йгьи аэкономика ргIапсра щаквзыргылуа швъапI», – йхIватI ауи.

Эгьзакь Мусса дацIачIвагъватI а-Конституция йахачIв хъаду ажвлара рквта абагвынгIвра щаквзыргылуаш амальква шIасдъа йгIанаршIыцларныс, ауагIа рбзазаща агъьхара ахъазла ажвлара ркъару згIвадаква зымгIва аднакIылырныс шакIву.

«Багъьата йхъасцIитI: аконституция байараква апхъахьылагьи ррыбагъьара Апсны Республика ауачIвымш агIатгараква йрыщата цIабыргхуштI», – йгIацицIахтI Эгьзакь Мусса.

Апсны Республика а-Конституция асквш 1994 ноябрь а 26 агIан ЙхIаракIу а-Совет йжвыгIвхуз азддара асессия апны йнарахвтI, асквш 1999 октябрь а 3 йакIвшаз ареферендум апны йдрыбагъьахтI.