Адуней апсуа-абаза конгресс ЙхIаракIу асовет аунашвачпагIв Эгьзакь Мусса Россия абзазагIвчва АуагIа рацзакIыра амшла драйхIвахIвтI. Датшагьи ауи ахIвахIвра швъаква рзищтитI Къарча-Черкес Республика ахъада Темрезов Ращид, Адыгей Республика ахъада Кумпилов Мурат, Къабард-Балкъар Республика ахъада йхъвдаквцIараква зырхъйауа КIвакIва Казбек.

«Ари акъральыгIва гвыргъьарамш ащайдзаква атурыхгьи ауагIа ргвбайара тынхагьи цIолата йрылалитI. Ари атшын асквш 1612 агIан Россия алахь ахъазла магIны ду змаз атурых гIаншараква гIацIсытI – акъраль йтабзазуз ауагIахъаква багъьата тшадыркIылын р-Абашта ахъахвитра йазгылтI йгьи Россия акъральыгIвара дрыбагъьатI», – араса йаныпI ахIвахIвра швъа.

Эгьзакь Мусса йшипхьадзауала, «уахьчIва Россия ауачIвбзазара шцуш, абзазара йгIалалыз ашIыцраква йрыквыргIапсу акъраль ауыжвгIанчIви псахраква шаъазлуш, ажвлара ртынчра зпщылу Россия абзазагIвчва рацзакIыри рацIагылри ракIвпI».

Ауи йгIацицIахтI йзачIв уагIахъазлакIгьи йгIащаквхара, тшауацIырхра ахъазла йадкIылазара шатахъу, йалкIгIата Россия ауагIахъаквагьи рымч зрыбагъьауа рацзакIыра шакIву.

Россия апны ноябрь а 4 атшын АуагIа рацзакIыра амш асквш 2005 йгIашIарышвта ансисквша йдыртлапIитI. Ари акъральыгIва гвыргъьарамш Россия атурых апны магIны ду зму агIаншара йачвахъабагата йщаквыргылхатI – асквш 1612 агIан Польша рыр кIыгIвчва Москва йтырцахын йгIадырхвитхтI, ауи Казань апны йгIаншаз а-Нчва Аны ликона знархару агвыргъьарамш йаквдыршватI.