АгIаншараква 21.04.2023 12:55 5268

АААК ЙхIаракIу асовет аунашвачпагIв Россия Федерация апны Сирия ГIарып Республика Йазалху хъвдаквцIара зму рхIвачIвгIвы Аль-Джаафари Башар дйынйатI.

Адуней апсуа-абаза конгресс ЙхIаракIу асовет аунашвачпагIв Эгьзакь Мусси Россия Федерация апны Апсны Республика Йазалху хъвдаквцIара зму рхIвачIвгIвы Квициниа Алхаси Россия Федерация апны Сирия ГIарып Республика Йазалху хъвдаквцIара зму рхIвачIвгIвы Аль-Джаафари Башари ранйара Россия Федерация апны Сирия ГIарып Республика рхIвачIвгIвы йуысхарта апны апщаша, апрель а 20 атшын йакIвшатI.

Анйара анакIвшуз Эгьзакь Мусса Сирия ауагIа йшрыцикIуа йагIарбагата асквш 2023 февраль а 6 агIан йыншаз адгьылцIсра зарар зызнахаз акъраль абзазагIвчва йырзалихыз ахчала ацхърагIара Аль-Джаафари йыйттI.

АААК ахъада Сирия аунашвахъцIагIвчва йшрыцикIуа, адгьылцIсра йаладзыз ауагIа ртгIачваква ргвакъвпра шрыцагIвишауа, зарар задзакваз рзгIвадара ласыла йгIащаквдыргылхныс шырзитахъу йхIватI.

«Адуней апсыуати абазати йыкву зымгIва адызкIылуа Адуней апсуа-абаза конгресс ахьызлагьи са схъаталагьи а-Президент Асад Башар, Сирия ГIарып Республика аунашвахъцIагIвчва, йхIайщчву Сирия ауагIа йшрыцхIкIуа расхIвитI. Йаладзкваз ртгIачваква ргвакъвпра рыцагIвсшитI. Хвырти зарари задзакваз ласыла йгIащаквгылхныс рзыстахъпI. ХIайщчвара зынгьи йшIымчIварагIатI!» – йхIватI Эгьзакь Мусса.

Аль-Джаафари апсуа-абаза уагIахъа рацкIра хвду аквицIатI, АААК ахъада Эгьзакь Мусса йхъатала ауагIа йырзалихыз ацхърагIара ду ахъаз дшизыразу йхIватI, Сирия апны арыцхIагIа зтшын йыншаз уалагата абаза уагIа йрыуакву акъраль джьгарта йъацхърагIауа Сирии Апсни руагIахъаква айгвара багъьа шрызбжьу йшаквшахIатхауагьи гIаликIгIатI.

Эгьзакь Мусси Аль-Джаафари Башари ранйара ауагIахъаква рацынхари рабагвынгIври рыбагъьара ауыс апны акъральква рацацкIри адипломатии йалкIгIу магIны шрыму йаквшахIатхитI.

УахьчIва, адуней йапшым абаргвыраква йанрынйауа, ацацкIра, айгвара, айщчвара рынкъвгара – гвыгъара гIахIылазцIауа, агIвычIвгIвысагIи арыцхIащари йанакIвызлакIгьи ркъару шдуу гIахIгвалазыршвауа лашарбагапI.

Анйара йалан Россия апны Апсны рхIвачIвгIвы йуысхарта акьангьашыгIв АгIвдза Мадинагьи АААК аунашвачпагIв йаппарат унашва ахъызцIауа, Апсны АгIвымакъраль уысквала а-Министерства ахъвдаквцIара кIьыдаква зырхъйауа ахIвачIвгIвы Таниа Кангьи.

АААК аунашвахъцIагIвчва рразыра ажваква ари анйара анадзара хIаракIыта йадгалра йацхърагIаз Россия апны Апсны рхIвачIвгIвы Квициниа Алхаси ахIвачIвгIвы йуысхарта акьангьашыгIв АгIвдза Мадини йырзынадырхитI.

Анйара аналгуз агIвхъатакIгьи ахьызхIвага согIаква амырдатI.