АшIыцраква 04.03.2021 17:50 26419

АААК а-Конгресс ашIыпIа хъвшараква рынхара агвынзыргIвуаши чкIвыныргIа йрыцынхуши анхагIвы дгIалхрала анкъвакъвра ъадзакIвшуш араутI.

Барганджиа Саид

Адуней апсуа-абаза конгресс АААК ашIыпIа хъвшараква рынхара агвынзыргIвуаши чкIвыныргIа йрыцынхуши анхагIвы дгIалхрала анкъвакъвра аналгуш амш нанарыскIьатI. Апхъапхъа йшырхIвазла, анкъвакъвра йалалра зтахъкву ранкетаква февраль а 20-дза акIвын йъадзанарахвуашыз. Ужвы йшщаквдыргылызла, ашвъаква мартI а 4 йгIашIарышвта а 15-дзагьи йущтий йауаштI.

Анкъавакъвра шакIвшауа даквчважвауата а-Конгресс архъйагIв секретарь Гьыцба Инар йгIаликIгIатI йцIыхъвахауа архъвыхрадза жвгIвы шнадзаз. ЙгIашвгвалахIыршвахпI – анхагIвы йгIалхра хъвы-хъвы йакIвшитI: анкета атра, онлайн-рхъвыхра гIакIылсра, АААК аунашвачпагIвчва рачважвара, йцIыхъвахауа ахъвы – а-Конгресс ЙхIаракIу асовет аунашвачпагIв йачважвара.

ЙхIызгIайыз зымгIва згвы цхIауа чкIвыныргIапI, рхIаль-шан пшдзапI, рдырраквагьи бзипI, ауаса хIара апшгIара ашIахIымрысуата зшвъаква гIазщтийырныс йахамдзазгьи ауи рчпата тшгIахIдырбарныс лшара рыхIтырныс щаквхIыргылтI», – ауыс зкву гIахIгвынйыргIвытI Гьыцба.

Ауи йгIаликIгIатI йнарахвыз ащаквыргылра нхара зтахъу ауагIа рыцIа йщардагIвыта анкъвакъвра йгIалалырныс, а-Конгресс аунашвачпагIвчвагьи йдыргылуа ахачIвкви ахъвдаквцIаракви рыцIа йрыквыргIапсу дгIалырхырныс лшара шырнатуаш.

«Йапхъахауата хIызпшыз чкIвыныргIа нхара йгIахв йауаш агвып йгIарылахитI, ауат рыуа азджьакI а-Конгресс анхара йгIаланахIыркIта йыззычпу хIапшуаштI», – йхIватI Гьыцба.

Акоординатор йхъвдаквцIараква

АшIыпIа хъвшараква рынхара агвынзыргIвуаши чкIвыныргIа йрыцынхуши анхагIвы арат ауысква йыхъвдаквызлуштI:

  • АААК ашIыпIа хъвшараква ргIаныршара, АААК а-Устав йгIанахIвауа амурадкви ахачIвкви рыпкъ йтата ауат жвлара магIны зму проектта йдырхъйуш, уыста йырхуш лыхра джьгарта далазара;
  • ашIыпIа хъвшараква рынхара рхъвыхра, ауат рхачIвква рыцIа йнардзата йдырхъйара ахъазла рацынхара аныргIалра;
  • ашIыпIа хъвшараква йлырхыз ауысква андырхъйауа ауат рыцIа сабап щарда шгIаргуаш апшта йагвныргIвра, апроектква рлыхра апны зджьакIы йдырхIахьаз ашвапха бзиква гIарысабапра;
  • АААК ашIыпIа хъвшараква йакIвдыршауа ауысквала йатахъу ашвъаква агвныргIвра, ауат ашвъаква рхъвыхра, АААК аквта уысхарта йшырщтийуаш ахъпшылра;
  • йхъгалраква дырхъымсуата анхара агIарбараква азкIкIра – аунашвачпагIвчва анахIвара нхарата йакIвшаз ауысла йатахъу ашвъаква рыхIазыррагьи алата;
  • ансисквша йакIвшалауа «Абаза» Культура-спорт фестиваль адгалра ацхърагIара;
  • ашIыпIа хъвшараква уыста йакIвдыршауа ахабар АААК ахабарргарта портал аунашвачпагIви анхагIвчви йаназаману йдырдырра;
  • ЙхIаракIу асовет аунашвачпагIв, архъйагIв секретарь, аппарат аунашвачпагIв апроектква рырхъйаща цIбата йацIырбауа ласыта йыррайшахра, апхъахьыла ауат рапш анхара йшгIаламшвахуаш амальква нахвра.

Йара ауи апшта акоординатор аунашвачпагIвчва рунашваква йырхъйара, аорганизация апны йщаквгылу анхара адгалща, ашвъаква рынкъвгаща рыпкъ йтата анхара адигалра, йуыс азъазара йалайырхIара йборчпI.

Анкъвакъвра акIвшаща йшаъу йгIанхитI, тшызпсахуа ауи ъадзакIвшауа агIамтагIваца акIвпI.

Йапхъахауа ахъвы. МартI а 4 йгIашIарышвта а 15-дза анкъвакъвра йалалра зтахъкву ранкетаква азыркIкIуаштI. Анкета йатахъу зымгIва антаугIвра амщтахь АААК ауысхарта йуга (ауи асахIат а 9 йалагитIта асахIат а 18-дза йынхитI) йа info@abaza.org электрон адресла йущти йауаштI.

АААК ашIыпIа хъвшараква рынхара агвныргIврали чкIвыныргIа рыцынхарали анхагIвы йъанатIа зкIныс зтахъу йанкета йапшым аформатквала:

ЙгIвбахауа ахъвы апны анкъвакъвра йалалуа онлайн-рхъвыхра рызпшитI. Ауат дакъикъа 30 руацIа азцIгIара 25 джьауап гIарыртра атахъхуштI. ЗакI гIазнух йауаш гIвыра, йуыцынкъвугауа абадыргаква йа информация зту антахьгьыт аргIапсгаква гIаурысабап йгьауам.

Йхпахауа ахъвы апны анкъвакъвра комиссия (ауи йалазлуш Согъвым апны йгIаныршу АААК ахъвшара анхагIвчва ракIвпI) анкъвакъвра йалакву кIьыда-кIьыда йрачважвуштI.

Анкъвакъвра комиссия анкъвакъвра йалакву рдырракви рхIаль-шани йанырпшуа ргватра ззынархазлуш аъанатIала уынхара ахъазла йатахъыта ашвъа йану акIвпI.

Ауи акIвымкIвагьи анкъвакъвра комиссия анкъвакъвра апны йамайгIайуата йгIанхаз, ауаса здырракви зхIаль-шани ргвапхаз, апхъахьыла нхара йгIахв йауашта йызквдырпшуа руысла щаквыргылра нарахвырнысгьи йахвитпI.

Йпщбахауа ахъвы – АААК ЙхIаракIу асовет аунашвачпагIв Эгьзакь Мусса онлайн амальла йачважвара.

Йпщбахауа ахъвы амщтахь анкъвакъвра йалаз гIвыджь гIарылырхта мызкIы ауацIа нхаша хIакъ гIаргуа йдырхъвыхуата йындырхуштI. Ауи амщтахь нхара йгIаныржьуаш заджвы дгIалырхуаштI.

Анкетаква ъанарахвуа йгьи анкъвакъвра йалалквауа йъагIарачважвауа ари адресла акIвпI: Апсны Республика, Согъвым къала, ЛакIоба йурам, 109, Адуней апсуа-абаза конгресс ауысхарта. Ари ауысла кIара гIаззырдырра зтахъу +7 840 226-25-26 телефонла йазцIгIа йауаштI.