Шамба Тарас йыхьыз зхъу акубок йъазабакIуаш йхвбахауа Абаза хъвмарраква Адуней апсуа-абаза конгресс, «Алашара» адкIылара йгьи «Апсадгьыл» ассоциация радгалрала Къарча-Черкес апны йакIвшуштI.
Барганджиа Саид
Къарча-Черкес апны йхвбахауа Абаза хъвмарраква анакIвшауа агIан футболасрала Шамба Тарас йыхьыз зхъу акубок йазабакIуаштI, – араса ахабар дыргитI Адуней апсуа-абаза конгресс (АААК) апресса къвырльыкъвхарта.
Абаза хъвмарраква июль а 21 атшын йджвыквылуаштI. Ауат йрылазлуштI Апсны, Къарча-Черкес, Къабард-Балкъар, Москва, Ставропольшта, Йордания йгьи Трыквшта йрыуу аспорт гвыпква. СынчIва Абаза хъвмарраква радгалра уысква дырхъйитI Адуней апсуа-абаза конгресс, Абаза-апсуа уагIа ртшауацIыхра знархару Адуней адкIылара «Алашара» йгьи абаза жвлара организацияква рассоциация «Апсадгьыл».
Анкъвакъвраква радгалагIвчва йщаквдыргылтI аконгресс агIаджвыквцIагIвчва йрыуазаджву, йбергьльу апхьахьа, аюрист наукаква рдоктор, апрофессор, Адунейла апсуа-абаза уагIа рассоциация апрезидент Шамба Тарас йхъыцIуа асквш 80 аюбилей йадахIвуата футболасрала ауи йыхьыз зхъу акубок гIандыршарныс.
АААК апредседатель Эгьзакь Мусса хвду аквицIатI адунейла апсуа-абаза уагIа раларпара, рапхъанчIви ащтаныкъвара агIащаквыргылхра апны Шамба Тарас йалацIара.
Ауи араса йхIватI: «СквшкъомкI рурала апсуакви абазакви Шамба Тарас МАААН дагIаныршагIвыта йгьи дапрезидентта акIвын дшыгIдыруаз. ХIара Тарас Мирон йпа йхатI швабыж хIазыразпI, хIхъа аладухауата хIацIагылитI унашва зхъицIуз аконгресс анхара анардзарала азхъацIара, ахв швабыж йхIаракIыта йхIпхьадзитI адуней шабгула апсуа-абаза уагIа ргIахчара йгьи раларпара ауыс апны йалацIара ду. Тарас Мирон йпа Апсны ашIаква ргвып йгьи Согъвым а-«Спартак» дрылата зынзаман футбол дшасыз гIапхьадзахауата, йысквш 80 йадахIвуата аспорт хъвмарраква рагIан футболасрала йыхьыз зхъу акубок азабакIра гIанхIыршарныс йщаквхIыргылтI».
Датшагьи Эгьзакь Мусса йшгIаликIгIазла, ахIбачва ргIатгараква дыртлапIауата чкIвынргIа йгIадырбитI ауат пIатIу шрыквырцIауа, йалкIгIата, зныбыжь анаскIьара йампшуата джьгарта ажвлара уысква нкъвызгауа, зкъральгIв хъвыцща багъьу, зуагIи зпсадгьыли рызцIабырграла швапхата йхIзалуа агIвычIвгIвысква.
«ХIара апхъахьылагьи йхIыртлапIуштI зшвапхала чкIвынргIа ръадаб щтIызхуа ахIбачва ргIатгараква», – йхIватI Мусса ХIабальа йпа.
Агвыпква йапшым аспорт квпшыраквала йанкъвакъвуаштI: футболасрала, волейболасрала, гIвра апхъанысрала, хысрала, махъарыхъварала, парала, аркъан ахърала.
Къарча-Черкес республика апны Абаза хъвмарраква йхвынхауата йакIвшитI. Анкъвакъвраква йгIарылалуа агвыпква йгIарыцIанакIуа ашIыпIа гIвынаква рыцIа-рыцIа тшауацIырхитI, Россия ахакв шIыцква йгьи агIвыма къральква адыркIылитI.
швталра йа тшаншвцIара атахъыпI.