Апсны атурыхи акультури йырзынархаз акъыльрыпшгIага викторина быжьгвыпкI алан.
Базба Селма
Апсны атурыхи акультури йырзынархаз «Абаза» викторина йадызгалызгьи йакIвзыршазгьи АААК чкIвыныргIи физкультури тшауацIдрыхрала ахъвшара анхагIвчви «Дюна» интеллектуал-ршIыйара клуб йалаквуи ракIвпI.
Ахъвмарра йалаз Апсны атурых, араъа йырцIасу агIахIвыщакви ашвакви, амацIауыща, анхараква, архитектура йырзынархаз азцIгIараква рыртуан. АзцIгIараква джьауап гIарыртра ахIатырла ахъвмарыгIвчва Эсенч Тевфик, Эбжноу Кериман, НартыргIа рхабарква, асуратчпагIв Чачба-Шервашидзе Александр йыршIыйара, а-Конгресс атурых датшагьи щарда рдырра атахъын.
Ахъвмарра гIазхъвыцыз йшырхIвауала, акъыльрыпшгIага хъвмарра знархараквала йапшымыз цхъвыкIта йыршатI.
«АААК асквш 2021 агIан «Иарбан? Иаба? Ианба?» («ЙачIвыйа? ЙабакIву? ЙанбакIву?» – аредакция) акъыльрыпшгIага хъвмарра акIвнаршатI. Ауи телебарала йгIадырбахын щардагIвы йыргвапхатI. ХIара ауи йашIырпшыта, телебара аламкIва хъвмарра адыгIгалра хIтахъхатI. ХIшазхъвыцызла, викторина ауи йапсата йалуаш квпшырапI. Ауи «Иарбан? Иаба? Ианба?» йызлапшым – хъвмарра йахъазымкIва ларпшыгагьи алапI. Ари аформат шIыцла хIынхарныс хIара зджьара йгIанымхауата йгIахIцхърагIатI атекстква згIвыз Мамаца Гвдиси аредактор Торосян Эльвири», – йхIватI АААК чкIвыныргIи физкультури тшауацIдрыхрала ахъвшара аунашвачпагIв Берзениа Валерий.
Ауи йшихIвазла, йхъвмаруаз агвыпква йрыуата ащарда йапхъахауата акъыльрыпшгIарала анкъвакъвраква йрылан.
«ЙалкIгIата йхIгвапапI ахъвмарра Апсны атурыхи акультури йырзынархаз викторината ауагIа ргвы йъагIатахуш. Агвыпква ахъвлапын ргвы аущтта йайчважвауа йыргара йахъазымкIва ауагIахъа культура ахъазла шIыцра щардагьи рдыртI. Абарауаса Абаза уагIахъа ртурых ауагIа йрылалырныс акIвпI авикторина згIалагIгаз. Анчва дырзыразхатI ауи йгIалалыз зымгIвагьи – йъагIалалыз ахъазгьи, дыррата йгIадырбаз ахъазгьи. ХIырзыразпI ахъвмарра адгалра апны йгIахIцхърагIаз «Апра» ресторан аунашвачпагIвчвагьи», – йгIацицIахтI ауи.
АзцIгIараква лызхыз Мамаца Гвдиса апрограмма аналайцIуз ауи ззынарху ауысква рыцIа йшщардазлуш дшащтаз гIаликIгIатI.
«ХIара апрограмма ажвала азцIгIараква ракIвымкIвагьи апсуа фильмкви ашвакви ршIчIвараквагьи алахIцIатI, ауылагьи хIгIашIамсуата ахъвмарра пшакI ацIахIрысра хIтахъыта йапшым апкъыгIваква злаз азцIгIараквагьи гIахIхъвыцтI», – йгIахIгвынйыргIвытI ауи.
Аинтеллектуал анкъваквъра йалан ЧкIвыныргIи спорти русквала Апсны Республика АкъральыгIва комитет, «Abkhaz-Desk» жвлара адкIылара ргIащтийыгIвчви абаза уагIахъа ртурыхи ргвбайари шырдыруа зырхъвыхра зтахъызи.
ЙгIвбахауи йхпахауи агылартаква зкIыз агвыпква «АйачIваква гIакIнызцIауа» клуб апны хрихыцла йхысырныс йазрыхвитуа асертификатква рырттI. Апхъагылара згаз агвып йнапIылачпару абашлыкъква согIата йырзалтI.
Ахъвмарра апны йайгIайтI «Abkhaz-Desk» ркоманда: Маршан Бетюль, Патарая Энжи, Харчилава Омар, Харчилава Рада, Лакашиа Мрамза, Вартикян Анжелика.
ЙайгIайыз агвып йрылаз Лакашиа Мрамза ахъвмарра лахIварата йгIалыланацIаз хIыцагIвылшатI, АААКи «Дюна» интеллектуал-ршIыйара клуби ауи ъадыргалыз ахъазла дшырзыразугьи лхIватI.
«Са сшапшуала, ари йапшу ахъвмарраква хIычкIвынчви хIыхIвсси адыркIылитI. Авикторина хIкъраль, ауи ацIаскви ахабзакви шудыруаш йазынархапI. Ага ауи анкъвакъврата йаъазтынгьи апшIагылра гьуылауымхIвузтI. ЗымгIвагьи кьахвта азаман ргатI, апсуа культура апны шIыцра щарда рхъа ахъаз йгIахъыртIытI. Абараса, аквыгъвгъваракIгьи злам анйараква рпны хIыжвлара йапшым ахъатаква йрыуу ауагIа адукIылгьи хIкультура дуырдыргьи йауаштI», – лхIватI Лакашиа Мрамза.
«Викторина Абаза» проект – Апсны атурыхи акультури урыланазырхIвауа акъыльрыпшгIага-ларпшыга хъвмаррапI. Апроект гIалазгаз мурадта йрыму апсуа-абаза уагIахъа культура йазынарху адырраква йрылархIара, ауагIа абаза уагIахъа рыхъазла рыцIа щарда шырдыруаш йацхърагIара акIвпI.
швталра йа тшаншвцIара атахъыпI.