Апрофессионал абакIыгIвчви абжьагIвчви АААК ахабарргарта портал йгIарархIвтI Апсны апны уахьчIва хвитра абакIра штшауацIнахуа, ари аспорт квпшыра абаргвыракви агвыгъаракви йгьи аспорт апны дара рхъатачIв ъазара шщаквгылуаз.
Барганджиа Саид
Апсны апны хвитра абакIра йанакIвызлакIгьи бзи йырбуз спорт квпшыран, ауыла футболгьи, каратегьи, боксгьи йгьгIархьымшвузтI. Хвитра абакIрала аспорт залква уыжвгьи йырчвыпI: абакIыгIвчва йшсабийу йалагитIта тшырбжьитI, анчва-абачва йыргвапата ргIариква Анчва йбзирала ареспублика апны ймачIгIвым абжьагIвчва ъазаква йрызхъарцIитI. Апсыуа абакIра лкIгIара злу йара абаргвыраквагьи кьангьаш злам абзигвыгъараквагьи амапI. Ауат рпны йхъаду щатата йырзалитI апрофессионалквагьи ауат йырбжьауагьи йрылахIарныс, тшауацIырхырныс, рмахъа-щахъаквалагьи ргвылагьи рыцIагьи йызрыбагъьуш адырра шIыцква йъарызгIашыкъу.
«Папа, Царгуш Денис сйапшхарныс стахъыпI»
Асквш 2012 агIан Лондон апны Олимпиада акIвшун. Апсны абзазагIвчва зымгIвагьи гвыла-псыла рабашталагIв, Гвдауыта йауу абакIыгIв шIа Царгуш Денис йыхъазла ржьы рыхьуан. Аполуфинал апны ргвалагIваласраква гIвынагьи цIгIвагьи гьрымахмызтI. ЙцIыхъвахауата Денис дызпшIагылаз йкъару гьйыквымхъатI, ауаса Олимпиада – 2012 апны аджьаз согIа данкъвгагIвхитI.
Ауищтара Гвдауыта йауу абакIыгIв шIа йыхьыз зымгIвагьи ршIа йгIатахатI. Апсны акъалаква зымгIва рпынгьи ачкIвынчва, – «Папа, сара Царгуш Денис сйапшхарныс стахъыпI!» – рхIвумцара аспорт залква тшрыгIвнарпсатI – дзачIв апсыуазлакIгьи йгвы апны псып шIыцла тшзырчвыз хвитра абакIра тшазырбжьарныс ртахъыта.
«ЙгьхIадагIвача гIаншарам», пхыцIа мгIвапI
Абар ауат агIаншараква рапхъала абакIра тшадызкIылыз чкIвынкI йтурых. Цвижба Ахра Согъвым апны дйытI. Ауи ймахъа-щахъаквала ауралагьи дбагъьан – дхвыцищтара йкъару бзийын, дщаласын, аспорт дшачIвыз гьимыргIващузтI. Ауи дсабита аспорт тшадикIылтI: акробатика, карате дхъырхуан, ауаса йаргванкви йдыркви йанакIвызлакIгьи абакIра йща йшалу йархIвуан. Йаргьи дабакIыгIвхатI.
Ужвы Ахра сквшы 24 дыртапI, щарда цIуата абакIрагьи абжьарагьи дрызъазахатI. Йбжьара нхара атурых кIьыдапI. АбакIыгIв шIа Москва апны Олимпия гIалцIырта гвып дрылан, ауаса ймачIымкIва йшгIаншалауа апшта, йызгIвадара зарар айдзатI, ауыла йхъатачIв спорт мгIва шIчIватI. Ауаса ари агIаншара ахъаз йгьхIадагIвачамызтI, бзирагьи гIалцIтI: аспортсмен уагIа щарда рсабап злу мгIва шIыц тшизыгIахънатIтI. Цвижба Ахра бзи йбуз ауыс дшазцIабыргыз дгIанхатI йгьи асабиква абакIра йазибжьауа далагатI, хвысквша цIитIта бжьагIвыта дынхитI.
«Успортсмен духара ахъазла йгьхъашыгIврагIвацам йатахъу, угвы багъьата айрышта ухъа уадынхалра, агIарбара дуква урызгIашыкъзара атахъыпI», – йхIвитI Цвижба абакIра апны адахIвра мгIва ушзыквылуаш даквчважвауата.
Апсны апны абакIра ахIагIара бзипI, ахъашыгIвра злу щардагIвыпI
АбжьагIвы йшихIвауала, дынхауищтара сабита зъарагIвы дрыдынхалыз рпхьадзара гьидырхуам. Ужвы ауи чкIвынчва 25-гIв гвыпта дрыдынхалитI, рахIа йайцIбу хвысквша дыртапI, рыцIа йахIбу – жвыхвсквша.
«Атшпсщара мшква рагIан акIвымкIва ансимшы тшыгIбжьитI. ХIкъраль апны абакIра ахIагIара бзипI, ахъашыгIвра злу щардагIвыпI. Джьгарта дгIахIцхърагIитI Адуней апсыуа-абаза конгресс ЙхIаракIу асовет аунашвачпагIв Эгьзакь Мусса. Ареспублика абжьагIвчва рынхаша азбжа ауи йбзирала йгIарыквшвитI, аспорт ъамапсымаква рхвгIара апынгьи дгIахIцхърагIитI», – йхIвитI Цвижба Ахра.
Апсны апны хвитра абакIра апхъахьыла абзигвыгъаква дрылачважвауата Цвижба йшгIаликIгIауала, ареспублика апны хъашыгIвра злу, зуыс айрышта йазгIашыкъу аспортсменква щардагIвыпI, згвы цхIауа абжьагIвчва ахIбачва щардагIвгьи хIыцIагылапI, йгIахIцхърагIитI.
«Араъа Согъвым апны азалква гьмачIым, асабиква щардагIвыпI. Ауи хIгвапапI. АбакIра атшазыбжьара зымгIвалагьи йадгалапI. Ауаса дзачIв спортсменызлакIгьи йазалху атшыбжьартаква рпны йхъа дадынхалра, анкъвакъвраква дрылалра атахъыпI. УадыргIвана акIвпI агIарбараква анбзихуш. Ауаса ари ауыс акврыдзраква рыхъазла баргвыра щарда хIрынйитI», – йгIаликIгIитI Цвижба Ахра.
Гвдауыта – «абакIыгIвчва йырсайыртапI»
Аспортсменква йазалху атшыбжьартакви анкъвакъвракви йрылалра шатахъу ауысла Ахра йхIваз йацикIитI Цвейба Адамгьи. Ауи Гвдауыта дауапI, агIсквша цIитIта бжьагIвыта дынхитI.
«Азал апны абжьарагIвацаквали Апсны ауацIала анкъвакъврагIвацаквали хIспортсменква ргIарбараква гьхIагIазлушым», – йхIвитI ауи.
Йара Адам абакIра тшанадикIыл быжьсквша дыртан, атшыбжьара уысква ага йбзийымызтынгьи ауи «згIвата йылаштI». Дуней анкъвакъвра щарда рпны йапхъагылагIвхаз абжьагIвы дпшвырхъыччауа йгIайгвалашвахитI йапхъахуз анкъвакъвра баргвква дшрылалуаз: «Сара 15 сквша сыртан. Пермь апны Россия ачемпионат акIвшун. ХIара йапхъахауата ауат рапш анкъвакъвра хIагIа хIрылан. Сара ауат анкъвакъвраква рпны апхъагылара гьгIатзымгатI, ауаса ъазарата йгIасыларцIаз шIырпшыра амамкIва йдууын».
АбакIра апны ауи йапхъахауата айгIара ангIатига «Мышвчыр» турнир (Хын йолимпия чемпионхаз Медведь Александр йыхьызла йакIвшуз ЧкIвынргIа рквтала хвитра абакIра адуней турнир – аредакция ррытаразга) даналаз акIвпI – асквш 2009 агIан ауаъа дапхъагылагIвхатI.
АбжьагIвы йара дъауу Гвдауыта «абакIыгIвчва йырсайыртата» йпхьадзитI: сквшыкI ауацIа Гвдауыта район апны йапшымкIва агIанкъвакъвракI акIвдыршалитI. Цвейба йшгIаликIгIауала, уахьчIвала апсыуа хвитра абакIра атшауацIнарыхра цхърагIара адрайдзитI Гвдауыта район аспорт комитет, Апсны ахвитра абакIра афедерация, ареспублика арыпхьара аминистерства йгьи АААК ЙхIаракIу асовет аунашвачпагIв.
Аспорт апынгьи абзазара апынгьи айгIайра азгIашыкъра
Адам йгвып саби 20-гIвы рылапI, ауат йырныбыжьпI хвысквша йгIашIарышвта жвахсквшадза. АбжьарасахIатква ансимшы йакIвшитI хIва йауаштI.
«Сгвып рпны щардагIвыпI гьсхIварым, ауаса ахъашыгIвра злу асабиквагьи рылапI, ауат апхъахьыла агIарбара хIагIаква гIатыргарныс рылшуштI», – йхIвитI Цвейба йгвгIанаграква хIыцагIвишауата.
АбжьагIвы йшипхьадзауала, ачкIвын олимпиада апны дымчемпионхаргьи йа йбергьльу дымспортсменхаргьи дсабийищтара аспорт дадкIылазтын дгьалапIатIушым, аурам дгьгIаквхушым.
«Аспорт асаби йзгIвадара арыбагъьауа йахъазымкIва йакъыльи йхъвыцщи щаквнаргылитI», – йхIвитI ауи багъьата.
Апсны апны хвитра абакIра атурых сквшщарда гIацIанакIитI. Ари аспорт Апсны ауагIа р-Абашта айсра амщтахьгьи зынла апсып гIащаквгылхтI: ага рынхаща йшатахъу апшта йадгаламызтынгьи ареспублика апны абакIра залква гIахъыртIыхуа йалагатI, асабиква ртшыбжьарасахIатква атаджвыквылхтI. Йауа ухIварыквын хвитра абакIра апсыуала йгIаныцIитI ашIаква агвбагъьара рылацIара йгьи аспорт апынгьи абзазара апынгьи айгIайра йазгIашыкъта йбжьара.
швталра йа тшаншвцIара атахъыпI.