Мсыр апны йбзазауа апсуа-абаза диаспора йрыуазаджву Абаза (Маан) Рауф АААК ахабарргарта портал йгIарайхIвуата дрылачважватI Мсыр апны апсуакви абазакви рдиаспора гIанзыршаз АбазаргIа ртгIачва рбзазаща шаъуи ауи алкIгIаракви.
Барганджиа Саид
Мсыр апны апсуа-абаза диаспора – йазакIу, йбагъьу йгьи йаларпу тгIачва дупI. Араса АААК ахабарргарта портал йгIарайхIвтI Мсыр апсуа-абаза диаспора рпны зыхьыз бергьльу, а-Университет Айн-Шамс апны ажвлара рабадыррала кьангьашагIвта йынхауа Абаза (Маан) Рауф. ЙатахIхIвахпI, Мсыр йту апсуа-абаза диаспора зымгIва Абаза ткъвым йаланакIитI, ауи атдзахьыз нкъвыргитI, азджьакI апхъала йрымаз ртдзахьыздзаква гIанырыжьтI, азджьакI ауат гьырдырхуам.
Рпхьадзара, рбзазарта, рдин
Абаза (Маан) Рауф йшихIвазла, Мсыр апны апсуа-абаза диаспора уагIата зъарагIв аланакIуа щаквуыргылырныс баргвыпI, ауаса азджьакI йшырпхьадзауала, уахьчIвала акъраль йтапI зкьгIвы райхIа йнадзауа апсуакви абазакви ртынхаква.
«ХIара йхIыуу райхIарагIв йпхатшу Мсыр ахпровинциякI рпны йадкIылапI: Эш-Шаркия, Каир йгьи Александрия рпны», – йхIватI Абаза (Маан).
Ауи йгIацицIахтI Мсыр апны Абаза ткъвым йаланакIуа зымгIвагьи мсылман дин шынкъвыргауа.
Абаза ткъвым политика йгьи къральыгIва нхарата йакIвдыршауа
АбазаргIа рткъвым йрыуата щардагIвы йапшым агIамтаква рпны Мсыр апарламент, амуниципал советква йрылан, йапшым акърыльыгIва уысхартаква рпны аъанатIа дуква нкъвыргатI.
«УахьчIвала АуагIа айззара (уагIа 518-гIв йнадзауа Мсыр а-Парламент ацIахь палата – аредакция ррытаразга) Абаза тдзахьыз нкъвыргауата хгIвы алапI: Абаза Хани Дери, Абаза АхIмад Фуъад йгьи Абаза Ваджи Хуссейн», – йхIвитI Абаза (Маан) Рауф.
Асквш 1882 йгIашIарышвта апсуа-абаза диаспора министр щардагIв гIарылцIтI.
«Ажва ахъазла, Абаза Сулейман ХIасан Паша ажвлара дырраква дырминистрын. Абаза Десуки Ибрагим Аль-Сид Паша дахIврала йакIвшаз йынхара мгIва анджвыквицIуз ажвлара уысква дырминистрын, уадыргIвана атранспорт даминистрхатI, ауи амщтахь асквш 1947 агIандза агвчIагIвчпара аминистерства дахъадан, йцIыхъвахауата Мсыр агIвымакъраль уысква дырминистрхатI. Абаза Махер Бек сквшы 20 райхIа аэлектроэнергетика аминистерства унашва ахъицIатI, Абаза Амин АхIмад асквш 2011 агIандза акытмлыкврхIара аминистр йъанатIа нкъвигатI», – йгIашIипхьадзитI Абаза (Маан) Рауф дахIвра змата зыхьызква бергьльыз акъральыгIва уысхагIвчва рызджьакI.
АчIахIра хьызква рынкъвгагIвчва
АбазаргIа ртгIачва Мсыр апны уахьчIва йъагIадзазгьи ачIахIра хьзы Паша (апхъала Мсыр апаштахIква ачIахIра хьызква Паша йгьи Бек згIатгараква хIагIаз атгIачваква йырквнадыргун – аредакция ррытаразга) нкъвызгауа атгIачваква йрыуазакIыпI. Ауи ахьыз рквнадыргIатI Абаза тгIачва йрыуата жвгIвы (Абаза Аль-Сид Паша, Абаза Сулейман Паша, Абаза АхIмад Паша, Абаза ИсмагIиль Паша, Абаза МухIамад Паша, Абаза Абд-ГIазиз Паша, Абаза Фуъад Паша, Абаза Десуки Паша, Абаза ГIазиз Паша – аредакция рратаразга.)
Абаза (Маан) Рауф йшихIвазла, АбазаргIа рткъвым йрыуата щардагIвы апхъала апшта Мсыр апны аъанатIа дуква нкъвыргитI. Ауи йшгIаликIгIазла, адиаспора йгIарылцIтI йбергьльу айъазагIвчва, аинженерква, абухгалтерква, акьангьашагIвчва, ахIаквымхарта нхагIвчва, ауацIауысква йгьи абджьар къаруква рафицарква. Абаза тдзахьыз нкъвызгауа ауагIа акъраль ауацIала Мсыр акоммерция банк пхатшаква, анефть йгьи ателекоммуникация компанияква рпны йынхитI.
Абаргвыракви ауат ррыдзра амалькви
Абаза (Маан) Рауф йшгIаликIгIазла, ага йгвасразтынгьи, АбазаргIа рыуа заджвгьи йгьидырам апсуа йа абаза бызшваква. Датша баргвырата йаъу, ауи йшипхьадзауала, атгIачваква рщарда Апсны йалырдыргIауа гьаъам. Дшгвыгъауала, АААК анхара абарат абаргвыраква ррыдзра йацхърагIуштI.
«ДжьауапкIра дута швара (АААК – аредакция ррытаразга) йшвыквпI ахабарргара кампанияква, апсуа-абаза чкIвынргIи Мсыр абаза чкIвынргIи ращтаныкъвара знархару ауысква, рыуа дзачIвызлакIгьи дгIамдата дангIайхра йбаз, йгIаз, йылайхIваз йтгIачва йшрайхIвхуаш апшта», – йхIватI Абаза (Маан) Рауф.
Ауи йшипхьадзауала, абари йапшу ащтаныкъварала, абабарала апсуа-абаза диаспора йрыуу дзачIвызлакIгьи «АбазаргIа ртгIачва йгIарылцIта адуней шабгула йгIамдауа хIвачIвгIвыта дщаквгылныс йылшуштI».
СынчIва апрель мыз агIан Адуней апсуа-абаза конгресс ауысхагIвчва ргвып Мсыр нхара уысла йаъан. Ауаъа йъадзаныз магIын ду зму анйараквакI рыман, Мсыр йбзазауа Абаза ткъвым йрыуу щардагIвгьи аргваныта йрабадырныс, йшацынхушла йрангIалырнысгьи рылшатI.
швталра йа тшаншвцIара атахъыпI.