Апсны апрезидент Хаджимба Рауль Сирия апны апсыуа-адыгьа диаспора ргIащтийыгIвчва дрынйатI йгьи Марщан Уалид диджьабатI
Барганджиа Саид
Апсны апрезидент Хаджимба Рауль йазалху райгварала йапхъахауата Сирия ГIарып Республика дансасуаз сентябрь а 7 атшын Дамаск апны апсыуа-адыгьа (черкес) диаспора ргIащтийыгIвчва дрынйатI йгьи апсыуа-абаза уагIа йгIарылцIыз агIвычIвгIвыс ду йнышвынтара адзхъа хIврапшдза щтIайцIатI. Ари ахабар АААК ахабарргарта портал анхагIвчва йгIадылрадзатI Апсны ахъада йпресс-секретарь АгIвдза Наала.
АгIвдза йшылхIвазла, абаза уагIа ргIащтийыгIвчва рынйара гвапарали пхарали йырчвын.
«ХIабашталагIвчва швабыж гвапата йгIайпылтI апрезидентгьи ауи йыцыз ащтийыгIвчва гвыпгьи. Адиаспора йрыуата йгIачважваз зымгIвагьи йызнымкIва йгIалыркIгIатI рыгIвпсадгьылкIгьи нархарта щардала джьгарта йацынхарныс йъангIалыз ажвала йузымхIвуш гвыргъьара ду шгIарыланацIауа», – лхIватI Апсны апрезидент йпресс-секретарь.
Анйара анакIвшуз Хаджимба Рауль йабашталагIвчва тшырзынайырхауата йхIватI Апсны апны магIны ду шазырбауа Сирия Республика ахъада Башар аль-Асад Апсны ахъахвитра дшадгылуа ауысла йщаквыргылра. Хаджимба йгIаликIгIатI Апсны абзазагIвчва Сирия йту рабашталагIвчва пIатIу ду шрыквырцIауа.
«ЙтлапIу хIайщчва, араъа йтабзазауа зымгIвагьи хIхъа швыладупI. ГIатгара дута йхIпхьадзитI апсыуа уагIахъа заман ауыра йззпшуаз азазаъащаква уахьчIвала йщаквхIыргылырныс ъахIылшаз. Апсны ахъахвитра йацикIуата Башар аль-Асад йчпаз ачIвырхъа хъацIарапI. ХIара хвду рыквхIцIитI токьаль багъьала йщаквгылу арат ачIвырхъаква», – йгIаликIгIатI Хаджимба Рауль.
Ауи йгIайхIватI сентябрь а 4 агIан Дамаск йакIвшаз Сирия апрезиденти йари ранйара апны йшрылачважваз апхъахьыла агIвкъральыгIвакI разазаъащаква тшызлауацIырхуаш анархартаква.
«Сара кьангьаш гьазгIазгуам ауи ауысла агIвхъатакIлагьи йджьгару амальква шнахвхуш. Сирия ачIвыла хIгIахвынгылищтара ауи абзазагIвчва рпхари ргвапари хIылахIхIвитI. Апсны рыхъазла йдудздзу гIаншарахатI Сирия ауи ахъахвитра йъадгылыз. Сара йазхъасцIитI хIайгвара сквшпхьадзара, сквшышвпхьадзара рурала багъьата йшымгIвайсуаш», – йхIватI Апсны апрезидент.
Сирия ГIарып Республика йту апсыуа-адыгьа (черкес) диаспора ргIащтийыгIвчва рщардагIв араъа асквш 1949 агIан йгIандыршаз ачеркес жвлара организация «Адыгэ Хасэ» йалапI. УахьчIвала ажвлара йаднакIылитI уагIа 8000-гIв райхIа, ауат йрыуата 200-гIв абаза уагIа йрыуапI.
«Адыгэ Хасэ» аунашвачпагIв Бардоко Ридван йшгIаликIгIазла, Апсны апрезидент йгIайра Сирия рыхъазла гIаншара дупI.
«Уара угIайра йагIарбагапI хIара пIатIу шхIыквуцIауа. Швабыж хIузыразпI хIкъраль зташваз йхьанту азаман аурала Апсны йнацапахуаз хIуагIа швъарцхърагIаз ахъазла. Швара швбзирала хIабашталагIвчва ауаъа бжара рымамкIва йадгалата йбзазитI», – йхIватI ауи.
Апсны Республика арепатриация аминистерства агIарбараквала, асквш 2011 йгIашIарышвта ареспублика йгIаталтI Сирия артыгIвчва уагIа 800-гIв райхIа йнадзауата, ауат йрыуата уахьчIвала ауралагьи Апсны йтабзазитI уагIа 500-гIв райхIа. Ауат рщардагIв бзазартала йадгалапI, анахьанат ауи ауысла кьазу йгылапI.
Апрезидент Хаджимба Рауль Сирия ГIарып Республика апны дансасуаз апсыуа-абаза уагIа йгIарылцIыз агIвычIвгIвыс ду, Сирия арра генерал Марщан Уалид йхъмаштылра квырмыш азичпауата йнышвынтара апны хIврапшдза щтIайцIатI. Марщан Уалид данабгаз агIвуагIахъакI раргванчIвра знархараз амальква найахвуан, ауи ауысла йызнымкIва Апсны Республика дгIайуан.
Апрезидент йазалху йсайт ахабар шаргауала, Апсны къральыгIва ахъада Марщан Уалид йтгIачвагьи дрынйатI.
Апсны апрезидент Сирия йазалху гIарайгварала сентябрь а 4 дгIайтI. Хаджимба йгьи Асад агIвкъралькI рбжьара айгвари ацынхари руысла АнгIалра мачвы ацIарцIатI. Ауи апхъала, сынчIва май а 29 агIан, Сирия адунейла йхътIыта йгIархIватI Апсны ахъахвитра йшадгылуа йгьи адипломат азазаъащаква шацщаквдыргылуа.
швталра йа тшаншвцIара атахъыпI.