Арат амшква а-Конгресс ауысхагIвчва гвып Голландия нхара уысла йаъата Нидерланды апны шIыцта АААК ашта хъвшара гIандыршатI.
АААК ауысхагIвчва шта хъвшара шIыц гIандыршатI. Ауи йалалтI Голландия апны йбзазауа апсуа-абаза уагIа ргIащтийыгIвчва. Ауи ауысла ащаквыргылра а-Конгресс ауысхагIвчви Нидерланды йауу абашталагIвчви ранйара апны йгIапхьатI.
Европа акъральква рпны абашталагIвчва рынйаракви ауат рпны ашта хъвшараква ргIаныршари АААК гIвымакъраль нархарала асквш 2019 ауацIа йархъйарныс йылнахта АААК ЙхIаракIу асовет аунашвачпагIв Эгьзакь Мусса йрыбагъьаз ахачIв уысква йрыланакIуата йакIвшитI. Голландия апны йгIаншаз ашта хъвшара Европа апны йгIвбахитI апхъала йгIандыршаз Великобритания ахъвшара амщтахь.
Ужвы Нидерланды апны йаъапI АААК архъйагIв секретарь Гицба Инар, ЙхIаракIу асовет йалу Чирикба Вячеслав йгьи Ахабарргарта портал аунашвачпагIв Лазба Амина.
Роттердам апны йакIвшаз анйара даквчважвауата Лазба Амина йшылхIвазла, ауи апхъала а-Конгресс ауысхагIвчва гвыргIва тIакIв рылан.
«Ари апш анйара щарда цIуата йшакIвымшасыз гIдырун, Голландия йтабзазауа хIабашталагIвчва рпхьадзара тамамта йгьхIымдыруазтI, ауи ахIатырла баргвын йухIварныс анйара гIальаматра азызбата зъарагIв гIайуаш. ЩардагIв ъагIадгылыз хIайгвыргъьатI. ЙгIалскIгIарныс стахъыпI хIабашталагIвчва а-Конгресс анхара гIальаматра ду шазрымаз, йгIащтIырхыз азцIгIаракви атахъыракви щардан, йалкIгIата чкIвынргIа: ари апш анйара запыт йакIвшаларныс, апсуа бызшва арыпхьарали ауагIахъа гIахIвраква разыбжьарали акурсква гIахъыртIырныс», – лхIватI Лазба лгвгIанаграква хIыцагIвылшауата.
Ауи айззара апны лткъвымлагIвчва дшрынйазгьи гIахIалхIвтI.
«Ауи швабыж йджьасщатI. АгIвыма къраль апны хIабашталагIвчва съарынйаз, зымгIвагьи йацхIцрийу абызшвала хIъайчважвуз, ауат ртгIачваква ртурых, хIабабара йгIахIыланацIаз агвапара – абарат шабгу угвы пхарали гвыргъьарали йдырчвитI. Сара заджвыла ауи анйара сгвы анцIрала йгIатахатI, сткъвымлагIвчва срабадыртI, ужвы ауат Апсны апны срызпшуаштI йсрысасырныс стахъыта», – йгIалылкIгIатI Лазба.
Анйара ащаквыргылрала йгIандыршаз ашта хъвшара йалалыз рщардагIв джьгарра злу чкIвынчвапI. ЗымгIвагьи йацшIакIта ахъвшара даунашвачпагIвта далырхтI сквшы 34 зныбжьу Амстердам абзазагIв, апсуа чкIвын Ашуба Эргьун.
«ХIара шIырпшыра змам апхъанчIви культура хIачIвыпI, ауыла адуней анахьанат абзазагIвчва хIгьрапшым. Ага ауаса йаъазтынгьи хIэтнос аунашва здыруа мачIыгIвпI. Адуней акъральква рпахь хIгIагылта хIыхьыз хIхIвара апхъала хIара-хIара йыгIдырра атахъыпI йхIмагIнугьи хIгIазлыцIызгьи. ЙалкIгIата ауи ахъазла акIвпI а-Конгресс ауысхагIвчва срыуахарныс згIастахъхаз. Ари адкIылара мурад хъадата йамапI адунейла йхъылапсу апсуакви абазакви радкIылра», – йгIахIгвынйыргIвитI АААК ашта хъвшара аунашвачпагIв шIыц йхъвыцща.
Ашуба Голландия апны дйытI, араъа дгIадзынгылтI. Ауи йаба Трыквштала йахъысыз апсуа мхIаджьырква дгIархъшахъыцIтI, сквшкъомкI рапхъала Трыквшта дтыцIын Голландия дталхтI, араъа йбзазартахатI. Эргьун йан дголландпI. Ага ауаса йаъазтынгьи, ачкIвын, йара йшихIвахуала, йанакIвызлакIгьи йцри уагIа рща шйылу йылайхIвун.
«Сара голланд культурагьи трыкв культурагьи сырхъвыта тшгьыспхьадзум, ага ауат срылата сгIадзынгылызтынгьи, рыбызшваквала счважваргьи, – йхъвыцраква хIыцагIвишитI Ашуба. – Сара швабыж йстахъыпI апсуа бызшва ссырдырныс йгьи сгвыгъитI а-Конгресс абзирала ауи апш амаль сауырныс. СызуудахIва йангIасцIгIара схъа аладута йсхIвитI апхъанчIви апсуа уагIахъа сшгIарылцIыз. Ауаса «ауи апш уагIахъа адуней йыквта зынгьи йгьхIымгIастI» - хIва ангIасархIвхра счIвата счIвуныс гIастахъхитI. Сара йсыласхIвитI суагIахъа рща шсылу, ажвала йузымхIвуш ахацквала сшырпщылу».
Анйара йалаз щардагIвы дара ртурыхквагьи рхIвун. Ауат йрыуазаджву Палба Севда йшылхIвазла, ПалбаргIи ГвымбаргIи йрыуу лани лаби зынзаман Трыквшта йгIатыцIхын Европа апны йбзазарныс йайтыпахтI. Лара Севда Голландия апны дйытI, араъа дгIадзынгылтI, ужвы лпхIи лани лаби лыцта Роттердам апны дбзазитI. Ари апхIвыс шIа йылгвалапI лпхIа рыцIа дандухара ауыгьи дналахвта Апсны ларпшра дцарныс.
«Щарда цIуата ари йапшу адиаспора райззараква сгьрыламызтI, ауи ахIатырла швабыж йсгвапапI уахьчIва араъа щардагIвы съарабабаз, йалкIгIата хIцри Апсны йгIатыцIта йгIайыз асасчва. СайгвгъитI абари йапшу анйараква йапымшвтуата йшакIвшалуш. Сара швабыж йстахъыпI апсуа бызшва ссырдырныс, спхIагьи йылсырдырныс, швабыж йстахъыпI хIтурыхи хIкультури руысла сдырраква йрыласырхIарныс», – лхIватI Палба.
Анахьанат хIабашталагIвчва дрыцта ауыгьи Голландия апны АААК ашта хъвшара далалтI.
Ардзынба Шенгьуль лхъапщыла Амичба Озкани лари Утрехта къала йгIатыцIын Роттердам анйара йгIадгылтI. АгIвыджьгьи ацыта гIвысквша рапхъала йапхъахауата Апсны йаъан. Шенгьуль лан дадыгейпI, лаба дапсыуапI, лаба йтланыкъвала ланду лтдзахьыз АжьибапI.
«Швабыж йхIгвапата хIгIайтI уахьчIва анйара апны. Сара швабыж йгIасгвалашвитI сцри бызшва йгьи сгвы йалахIауата хIабашталагIвчва саларачважвитI. Апсыуа бызшвала сгьзыгIвуам, ауаса сызчважвитI, сани саби йсдырдыртI. Саргьи схъатала зынзаман апсуа диаспора рсабиква йдсырдыруан апсуа бызшва, ауаса анйараква рыцIа-рыцIа ймачIхатI. Швабыж хIырзыбжапI ари йапшу анйараква, хIуагIахъа гIащаквхара ахъазла хIыбызшва гIащаквыгIыжьра атахъыпI», – йылрыбагъьитI Ардзынба Шенгьуль.
АпхIвыспа шIа Купалба Щара лан Лазба Тулин длыцта дгIайтI. Ауат Роттердам апны йбзазитI. Щара «Голландия апны апсуа жвлара дшрыуу, апсуа уагIахъа дшгIарылцIыз бзита йлылалхIвитI», ауи магIны ду амата йылпхьадзитI.
«Сара аголландква срылата сгIадзынгылын йыздыритI хIара хIкультура (апсуа культура – аредакция ррытаразга) ауат ркультура йшапшым. ХIцIасква анахьанат ауагIахъаква рыхъазла йшвапха бзипI. ХIани хIаби сащи сари ахIбачва пIатIу шрыквхIцIуш хIазырбжьитI. Ажва ахъазла, апещ заджв дангIашылра ауи пIатIу шйыквхIцIауа гIахIырбауата хIгIагылитI. АтгIачва рпны анамыс хIазырбжьитI, хIани хIаби йнаскIьата хIхьпшра йаназыбжахара ауи джьауапкIра хIымата хIшадгылуаш гIахIгвындыргIвитI. Голланд культура апны ауатква гьаъам, ауи ахIатырла саргьи скьазу ангIадзара ссабиква ауат ацIасква йырзызбжьуштI», – лхIвитI Купалба лгвгIанаграква хIыцагIвылшауата.
Айззара йалаз зымгIвагьи Адуней апсуа-абаза конгресс йшалалуала анкетаква ргIвытI. Ауат йрыртуаштI йазалхата йдрыхIазырыз а-Конгресс алазлара аршахIатгаква.
Анйара ауагIахъа ашваквали агIахIвраквали йалдыргатI.
АААК ауысхагIвчва Европа адкIылара акъральква рпны нхара уыс дырхъйауата декабрь а 16 агIандза йакIвшуштI. Ауат ужвы Бельгии Германии рпынгьи апсуа-абаза диаспораква йрынйарныс рмурадпI.
швталра йа тшаншвцIара атахъыпI.