Бгъанба Щазина

Афестиваль асквш 2018 йгIашIарышвта йакIвшитIта – йщаквгылхьаз ацIасквагьи амапI, йаргьи аршIыйара анйараква, ауыса апхьараква, алитература шIыцраква рамдара йрадгалартахатI.

«Фестивальипхьадза йызларчву ауысквала, анйараква ъакIвшауала ауи апхъала йаъакваз йгьрапшызлум. ШIыцта йгIахIылалквауа зынла ауыс йацыркIитI – хIара хIабадыритI, азаджв азаджв хIизаргванхитIта хIыгIвзачва шIыцква хIпынква йхIрайгвитI. ЙшцIасхаз апшта, чIвы дрышвын апсуа гIвгIвчва йрыуата йащтагIайуаш асквш Нальчик, Майкъвап, Черкесск йцуш щаквдыргылтI. ХIара йхIпырапI атакIра шIыцква, акнига шIыцква, телебарала агIатраква, апхьагIв йынйара – ауаса йанаъазара агвацчпа гIвыраквала хIыбызшваква тшауацIырхуаштI», – лхIватI ауысагIв, адраматург, «Рица апны арифмаква» проект гIалазгаз Къаныкъва Зарина.

Анйара октябрь а 2 Ардзынба В.Г. йыхьыз зхъу Айсра Ртшхъвара а-Музей апны йгIахъыртIытI, ауи йащтагIайтI Баграт йыбыхъв апны ауыса апхьараква, йгьи йшцIасхаз апшта ауи Рица апны йалгатI. Ауи йалаквазгьи асасчвагьи ауысара «марафонква», агIачважвараква, зхъвыцщала йраргвану ауагIа рынйараква рхIауа йалалтI. Афестиваль анакIвшуз апсуа бызшвала йатаркIыз гIвкнигакI – Къарча-Черкес йауу Кенчешаов Артури Къаныкъва Зарини рчIвква – гарыларгатI.

Апроект йгIалалтI ауысара апны йапхъахауа ачIвырхъаква атызпуагьи пышва ду зырхIахьаз ауысагIвчвагьи, агIвгIвчвагьи, атакIыгIвчвагьи. Йапхъахауата ауаъа йгIадгылтI Краснодар шта йауу, зцри щапсыгъв бызшвала йгIвуа ауысагIв йгьи ашвахIвагIв Аллало ХIасан, Къабард-Балкъар йауу амакъымршIыйагIв йгьи ауысагIв шIа Апшев Анзор, Адыгея йауу ауысагIвчва – «Адыгэ макъ»» газет анхагIвы Дербе Тимури АРИГИ ахабарргара-гIвырагIацIщтра хъвшара анаука нхагIв апхъагылагIв Мысрокъва СултIани.

Ансисквша йакIвшалауа «Рица апны арифмаква» фестиваль асквш 2008 йгIашIарышвта къраль щарда гIазланакIуата йадыргалуа апроект «Ауысара атахъынхIвра» йахъвыкIпI. Арат асквшква зымгIва руацIа ауи апроект джьгарта дапщылапI афестиваль адиректор, Апсны а-Фыр Сосналиев СултIан йхъапщыла Сосналиева Любовь.

Гвы аутуашта йаъапI афестиваль йгIалалквауа рынхара асквш шабгу йашIамсуата йшадгалу. Майкъвап, Нальчик, Черкесск рпны Апсны йауу акультура анхагIвчва рылата алитература анйараква акIвшалитI, Адыгея акIвпIта – ауаъа «Ауысара атахъынхIвра» проект апкъ йтата «Руфабгъва апны асатырква» литература фестиваль акIвдыршуа йалагатI.

Афестиваль адыргалтI Апсны культурала а-Миинистерстви АГУ апны АмкIваб Владимир йыхьыз зхъу Апсуа-адыгьа филология аквти. Ахчала йгьи хабарргарала анйара адгалра йацхърагIатI Адуней апсуа-абаза конгресс.