Барганджиа Саид

Согъвым апны анхара джвыквылтI Адуней апсуа-абаза конгресс а-Дискуссия клуб йазалху проектта йлнахыз Ан-абачва рклуб. Ноябрь а 30 атшын ауи йалакву йапхъахауа анйара акIвдыршатI.

АААК а-Дискуссия клуб аунашвачпагIв Турава Ирина йшгIалылкIгIазла, Ан-абачва рклуб Апсны ахъазла шIырпшыра змам проектпI.

«ХIкъраль апны ауи йашIырпшы йауаш адкIыларакIгьи гьаъам. ЙаъапI ауагIа гIальаматра ззрыму ауысквала йадызкIылуа, йаъапI аполитика партияква, йапшым адкIылараква, ауаса ан-абачва рыхъазла аклуб йапхъахауата йгIаншатI, ауи апш датша гьаъам», – лхIватI Турава.

АААК а-Дискуссия клуб апны йапхъахуз дсасхатI Гицба Инар

Ауи йгIайззаз дыдлырдыртI Ан-абачва рклуб аунашвачпагIв – зныбыжьла йшIу ан Квициниа Кама. Ауи аклуб амурадкви ахачIвкви дрыквчважватI, «апроект амагIны швабыж йшдуу» гIалылкIгIатI.

Ауи йшгIацылцIахызла, ан-абачва джьгарта йрыцыркIуазтын уыста йлырхыз зымгIва абзазара йаларжьырныс рылшуштI.

«ХIыуа щардагIвы гьразым асабигIзартаква, азгIвадрахчара, арыпхьара, асабиква йырзынарху анахьанат абзазара уысква шадгалу, ауи ахIатырла згвы цхIауа анчви абачви тшадхIкIылырыквын баргвыра зпщылу уыс щарда хIырхъйарныс хIылшуштI. Ауи ауысла хIгIазгвынгIвуаш, йхIыцызкIуаш абзазагIвчва тшгIахIыдыркIылырныс хIтахъыпI», – лхIватI аклуб аунашвачпагIв.

Ауи лгIачважвара апны йаталхIвахтI АААК а-Дискуссия клуб анхара йаланакIуата йагъьу агIахъвыцракви апроекткви ахча шырзалырхуаш.

«Адискуссияква анакIвшауа йапшым агIахъвыцраква гIалхIкIгIуштI, ауат проектта йанхIыргIалхуаштI, уахьчIвала магIны зму ауысква гIащтIызхуа апроектква асквш 2021 агIан абзазара йалалырныс ахъазла ахчала цхърагIара ддрадзуштI. Абараса хIынхузтын аклуб анхара магIны амазлуштI, араъа ажви ауыси гьагIвысуашым», – йгIалылкIгIатI Квициниа Кама.

Ауи йшгIацылцIахызла, Ан-абачва рклуб дзапш анызлакIгьи, абазлакIгьи дгIалал йауаштI, йхъаду «аджьгарри азыгIальамтри ргIарбара» акIвпI.

Анйара апны ауи йалаз зымгIвагьи анкета рзыршатI, ауаъа йгIарбан апхъахьыла йызлачважвуш атемаква. Ауат атемаква йгIадырбитI асабиква рпсихология згIвадара, ан-абачва рщагаща гвыбзыгъа, асабикви рарыпхьари рапхъаламгIвайсри, асабиква рызгIвадарахчара, ажвлара рпны асабиква агвымхара рачвыхчара, йгIадзынгылуа абанпараква рбжьара апны апсуа бызшва агIахчари атшауацIнарыхри руысла амальква ргIаура.

«Атемаква хIанрылачважвауа йбергьльу аъачIвагIагIвчва гIахIрайгвалуштI: апсихологква, апедиатрква, апедагогква, анчви абачви разцIгIараква ауат рхъатала йрыздыргылырныс рылшуштI», – лхIватI аунашвачпагIв.

Ан-абачва рклуб апны йапхъахуз анйара йалаз анчвагIваца ракIвын, ауаса адгалагIвчва шгвыгъауала, ахъачваквагьи, абачва, айчважвараква джьгарта йгIарылалуаштI.

Анйара йалаз рыуа азаджв, Делба Мрамза, йшгIалылкIгIазла, Ан-абачва рклуб швабыж йатахъдзу, змагIну дуу гIаджвыквцIарапI.

«Аклуб дахIврала йшынхуш кьангьаш гьазгIазгуам, йауа ухIварыквын ауи анхаща атгIачва азазаъащаква йрапшпI, ауи ухъатачIв уысквагьи гIащтIухырныс гвышхвара гIауыланацIитI. Сара заджвыла ари апш уыс гIаншарныс щарда цIуата йстахъын. Дзапш анызлакIгьи йылтахъыпI лара йлапшу апхIвысква дрынйата гвыргIвата йрыму йацрылачважварныс. Анчва дшвзыразхатI Ан-абачва рклуб ъагIаншвыршаз ахъазла», – лхIватI Делба дшразу гIалырбауата.

Ауи йылхIваз йацылкIтI Квеквескири Элана. Ауыгьи кьангьаш гьазгIалгуам аклуб йалу зымгIвагьи ауатыкв йгIаталуа ауысква «йрыдынхалырныс, йрылачважварныс, рырхъйара амальква йырзыпшгIарныс» йшхIазыру.

Аклуб йалалыз дрыуазаджвпI апсуа гвчIагIвчпара адкIылара «Киараз» гIанзыршаз йрыуазаджву Гопиа Кама (адкIылара Апсны апны ажвлара рцхърагIара йазыбжу атгIачваква йрыдынхалитI – аредакция ррытаразга). Ауи лара лтланыкъвала йлыргвыгъатI «Киараз» йгIацIанакIуа анчвагьи, абачвагьи аклуб агIаджвыквцIараква йгIарылалырныс ахъазла йлылшауа амальква шналахвуаш».

Ан-абачва рклуб апны анйараква апхъапхъа мызкIы апны гIван йакIвшалуштI. Анйараква зымгIвагьи АААК а-Дискуссия клуб асоцсетква рнапаква рпны онлайн амальла йгIадырбалуштI.

Адуней апсуа-абаза конгресс сынчIва ноябрь мыз агIан Согъвым апны а-Дискуссия клуб анхара джвыквнацIатI – ауи ауатыкв апны апсуа-абаза уагIахъа ргIахчари ртшауацIнарыхри знархару тема щарда йрылачважвуштI. Аклуб апрезентация ноябрь а 7 атшын йадыргалыз анйара апны йакIвшатI. Ауи анйара йалан а-Конгресс ЙхIаракIу асовет ауысхагIвчва йгьи Апсны ахабарргагаква ргIащтийыгIвчва. Ауищтара апроект джьгарта йынхитI: йапшым атемаква знархару адискуссияква рылалрала ахIвара швъаква адыркIылитI, нархара-нархарала йлыху анйараква адыргалитI.