Айззара ажвлара рымч ащаквгылщи анхащи йазынадырхатI
Анаука конференция гIвгIаншара дукI йрыквдыршвауата йадыргалтI: Апсны ауагIа р-Абашта айсра апны йгIатыргаз АйгIайра асквш 30 йгьи Россия ареспублика ахъахвитра йацнакIищтара йцIуа а 15 сквша. Айззара аунашвахъцIара хабзаквала арыпхьагIвчви апхьахьакви акъральыгIва унашвахъцIара ргIапсра анхагIвчви аднакIылтI.
«Ауат йрылапI Москва, Россия анахьанат ашIыпIаква, ГIвадахь Осетия йхIаракIу рапхьартаква рпны йынхауа хIъачIвагIалагIвчва», – лхIватI Апсны а-Конституция суд аунашвахъцIагIв йтарагылыгIв, Апсны анаукаква р-Академия йаланакIуа Экономика аинститут адиректор йтарагылыгIв Пилиа Диана.
«Араъа аюрист жвлара дара мчыта йгIарбапI: анаукаква рдокторква, апхьагакви амонографиякви згIвыз аъачIвагIагIвчва. РахIа йгвапахугьи – хIреспублика аюрист жвлара гвып бзита йгIайтI. Ауат ахымшкIгьи йгIачважвуштI. Ауи хIшIара, хIюристква анаука шрымагIальамату йаквшахIатхитI. Профессионалта бзидздзагIв ангIадзынхIыргылра акъральыгIва ащаквыргылрагьи рыцIа ймайрахуштI», – йгIалылкIгIатI Пилиа.
Пилиа Диана аконференция адызгалыз, йгIалалыз зымгIва – АААК ЙхIаракIу асовет аунашвачпагIв Эгьзакь Муссагьи дрылата, йара ауи апшта айззара йгIадгылыз а-Конгресс анхагIвчвагьи дшырзыразу лхIватI.
ЙгIайззаз зымгIва сальам райхуата тшырзынайырхатI Апсны анаукаква р-Академия апрезидент, афилология наукаква рдоктор ДжьапIуа Зураб.
«ЙтлапIу асасчва, запшуагIахъазлакIгьи ртурых йалазлитI ауагIа сквшышвпхьадзарала йынкъвыргуз агвала анхъйауа амшква. Ауи йапшу рахIа магIын дудздза зму мшыта, апсуа уагIа рыхъазла рыцIа йхъаду гIаншарата йалтI асквш 1993 сентябрь а 30-и асквш 2008 август а 26-и», – дацIачIвагъватI ауи.
Аконференция йадгалагIвхатI Апсны анаукаква р-Академия йаланакIуа Экономика аинститут, Россия аунашвахъцIара уысхагIвчва р-УагIахъа адкIылара йгьи Апсны йаъу Россотрудничество ауысхарта. Ауат йрыцикIтI ареспублика а-Президент.
АздзыргIвчва рпахь йгIачважватI Тибилов А.А. йыхьыз зхъу ГIвадахь Осетия акъральыгIва университет аректор Тедеев Вадим, Апсны ЙхIаракIу асуд аунашвахъцIагIв Бытба Саида датшагьи. АунашвахъцIара уысхагIвчва р-УагIахъа адкIылара авице-президент, аюрист наукаква рдоктор, Россия апны гIатгара зму анаука анхагIвы Старилов Юрий йгIайззакваз «Ажвлара рымч асабапри абагъьари щатата йырзалуа акъральыгIва къвырльыкъвхара аргIапсра ахабзаква» доклад гIарылайхIватI.
«Къральипхьадза ачыннкъвгара зъачIвагIу йара абюрократия амахпI, ауаъа ауат акъвырльыкъвхагIвчва ргылартаква щаквгылахьапI. МагIын дугьи амапI абарауат ахабзаква рабаркIыра щатата йхIаракIу апринципква рымазларныс. Апринципква бзийызтын, демократия йаквыргIапсызтын, кIара гIарыцIанакIуазтын – ахабзалыхрагьи тамамызлуштI, акъральыгIва уыснкъвгагIвгьи йхъвдаквцIараква багъьата йдыруаштI», – йгIаликIгIатI Старилов Юрий йгIачважвара апны.
Аконференция йалакваз Ахабза рхъвыхраква р-Квта адиректор, УнашвахъцIарала ГIвадахь Россия аинститут апны ахабзи акъральыгIви ртеорияли ртурыхли акафедра аунашвахъцIагIв, аюрист наукаква рдоктор Щапсыгъв Дамир йапхьага шIыц ддырбатI. «КIавкIаз ауагIахъаква ркъральыгIвари рхабзакви ртурых» книга – апхьахьа гвыпкI здгIапсалыз нхарапI, ауи анаука анхагIвчвагьи, арыпхьагIвчвагьи, астудентквагьи, КIавкIаз ауагIахъаква йрыуу ауагIагьи йрымагIальаматхуштI йгьи йрысабапхуштI, – йгIалыркIгIатI айззара апны.
«Ажвлара рымч: ащаквгылщи анхащи йырпщылу апроблемаква» йгIвбахауа анаука-практика конференция сентябрь а 23-дза йакIвшуштI.
швталра йа тшаншвцIара атахъыпI.