УахьчIва адуней шабгу байарата йгIалырхуаш рымдыруа амгIвалыцIырта йгылапI. Араъа ауагIахъа лкIгIара йанакIвызлакIгьи хвы аквырцIауата гьузыхIвушым, йара акIвпIта, рахIа йауацIыху абадырракви амакIыракви рахIа йызпщылу ауи акIвпI. УыжвгIанчIви этнография апны гвы рутуашта йаъапI абазаква. Ауат йырбайару абазара агIвычIвгIвыс йуагIахъа ршан дшаквыргIапсу йашвага-загапI.

РАН йаланакIуа Антропологии этнографии рмузей (Кунсткамера) адиректор Головнев Андрей йстатйа «Абазаква: ауагIахъара лкIгIара агIаршIыцхра, йа аэтнография шIыц арчIаджьырта» абазаква ршвапхала ауагIахъа лкIгIара йгьи ауи агIащаквхари агIащаквыргылхри зпщылу аъащаква цIолата йгIахъызтIуа рхъвыхрапI.
КIавкIаз апны йакIвшаз архъвыхраква рыщатала йадгалу агIвыра абазаква дара-дара йабархIвуали астатйа згIвыз йархIвызли йалапI.

Астатйа «Зышта йбзазауа ауагIахъа мачIква: ауагIахъа лкIгIара агIаршIыцхра» проект апкъ йтата йгIвыпI. Ауи апроект Россия ажвлара злалу аэтнокультура щарда рдырра йапщылу, Россия шабгу адызкIылуа алкIгIара рыбагъьара знархару анаука рхъвыхраква р-Программа йахъвыкIпI.

«Абазаква: ауагIахъара лкIгIара агIаршIыцхра, йа аэтнография шIыц арчIаджьырта» статйа йшабгу ари азцагала швапхьа йауаштI:

https://etnografia.kunstkamera.ru/files/etnografia_journal/2024_03/golovnev_3_25_2024.pdf