Апсны апны 13.10.2018 15:10 7908

Октябрь а 12 атшын Согъвым апны йакIвшатI IX Апсны-Россия хIаракьат айззара.

Барганджиа Саид

Согъвым апны йакIвшатI IX Апсны-Россия хIаракьат айззара. ЙшцIасхаз апшта, араъа йрылачважватI Россия йгьи Апсны рэкономика ацынхара ауысква, йакIвшатI агIарбарта шIыцква, уыжвгIанчIви экономика, абизнес нархартаквала йырхъйачIву ауысква йырзалхта «айшва гьажьква».

Ареспублика апрезидент Хаджимба Рауль айззара тшырзынайырхауата дхIвахIвтI. Ауи йшипхьадзауала, «сквшигIадзапхьадза афорум рыцIа-рыцIа тшауацIнахитI, йалахIитI, амагIны щтIыцIитI, апахь йгылу ахачIвква хъйауата йынхитI», Апсны йгьи Россия рэкономика азазаъащаква ртшауацIыхра апны амагIны швабыж йдупI, апхъахьыла агIвкъралькI рацынхара, рацацхърагIара стратегия арыбагъьаутаа йымгIвайситI.

Анхара йазыхIазырпI

Апленум алачIвара апны дгIачважватI Апсны аэкономика аминистр Ардзынба Адгур. Ауи йшгIаликIгIазла, сквшпхьадзара рурала ари айззара амагIны шщаквгылызла, ауи ауатыкв апны Апсны йгьи Россия рэкономика ацынхара знархару уахьчIвала рыцIа йхъаду ауысква рахъвдаквыщтрала ахъатаква джьгарта йайкьангьашитI.

«Аинвестиция ангIалраква мачвы ацрыцIарцIитI, знархарала йаквшвауа анхартакви акъвырльыкъвхартакви абадыритI, йагвынгIвитI», – йгIацицIахтI Ардзынба.

Россия агIащтийыгIвчва гвып сынчIва дырхъадан Лагъь КIавкIаз ауысла аминистр йтарагылагIв Кошин Игорь. Айззара ангIахъыртIуаз ауи йшгIаликIгIазла, Россия Федерации Апсны Республики рацынхара нархарта щардала тшауацIнахитI, жвасквша руацIа агIвкъралькI рацынхара йазалхта бзазара хъата щарда гIащтIызхуа ангIалра 100 райхIа мачвы рыцIарцIатI.

Апсыуа чагIыр, апсыуа ашвы йгьи ацифра технологияква

Ареспублика аинвестиция агентства ахIаракьат айззара апны йазалху гIарбарта адыргалтI. Араъа ауатыкв йтан Апсны анхартаква йгIадырхарджьуа апкъыгIвакви агIахъвыцра шIыцкви. Ауи апшта «Амра-Банк» йгIадырбатI абанк анхагIвчви агIарысабапыгIвчви онлайн амальла рацынхара зрымайруш ателефон аццIара программа шIыц. «Апсны а-Сбербанк» йгIадырбатI Апсны уагIа Абашта айсра апны р-АйгIайра асквш 25 аюбилей йазалхта йгIацIырщтыз ахча хъвашаква йгьи зноминал апсар 500 йнадзауа абанкнот «Владислав Арӡынба». Аблокчейн программаква йрыдынхалуа анхарта НЕМ астендгьи гIарбан. АгIарбарта йалан Согъвым ахшлыцI рхарджьырта йгьи Гал район апны йгIандыршаз йазалху аэкономика гьагьара «Амра». ЙгIацIырщтуа апкъыгIваква гIадырбатI щарда мцIуата зынхара джвыквлыз ачагIыр рхарджьырта «Абхазвино».

«ХIара швабыж йхIгвапата ари агIарбарта анхара хIалалтI. Айззара асасчва щардагIвы йыргвапхатI йгIацIхIщтуа ачагIыр. Араъа йгIахIырбатI жвахьзыкIла йахъыхацIыхыз йапшым ачагIырква. ХIайгвыргъьитI ауат ауагIа хънакъалуата йъахъырхыз», – йхIватI архарджьырта ачагIыр хъвшара аунашвачпагIв Шулумба Дауыт.

Йхъадаз ауысква йрылачважватI

IX Апсны-Россия хIаракьат айззара апны «айшва гьажьква» пщба йнадзауата йакIвшатI. Ауи йалакваз Апсны йгьи Россия ргIвымакъраль ацынхара йалачважватI, йалкIгIата, туризм нархара зму ауысква, атуристква ртахъыраква радгалра агъьчIвра знархару ацынхара. Араъа йгIадрахатI акъральыгIва экономика ащтIыхра йапщылата абанкква рацынхара анархарагьи. Йапхъахауата ахIаракьат айззара ауатыкв йтан аинформация технологиякви ауи анархара шIыцракви. Ари анархарала айчважвара дадгалагIвын Апсны аэкономика аминистр йтарагылагIв Тарба Батал.

«Адунейла уахьчIва магIны зму арат ауысква хIрылачважварныс ахъазла сынчIва хIара йазалхта йадыгIгалтI ари айчважвара. Айчважвара нархарата йаман ацифра экономика, ацифра трансформация йгьи аинновация тшауацIнарыхра. ЙшхIпхьадзауала, арат анархараквала хIкъраль апны уыжвгIанчIви заман йаквыргIапста уахьчIвала йырхъйачIву уыс щардапI», – йхIватI Тарба.

IX Апсны-Россия хIаракьат айззара анхара йалан Россия а-Федерация Совет агIащтийыгIвчва, Донецк йгьи Луганск уагIа республикаква рэкономика министерстваква рунашвачпагIвчва, Армения йгьи Сингапур йгIартыцIта йгIайыз ахIаракьатчпагIвчва.

Апсны-Россия хIаракьат айззара асквш 2009 йгIашIарышвта йакIвшитI. Афорум йадгалагIвпI Апсны Республика аэкономика аминистерства йгьи Россия Федерация аэкономика тшауацIнарыхра аминистерства, ауи адгалра йацхърагIитI Росконгресс фонд.