Апсуа ажвлара-политика уысхагIв ду, пIатIу зкву АААК апрезидент Шамба Тарас Согъвым апны Адуней апсуа-абаза конгресс агвып дрынйатI.
Барганджиа Саид
Йбергьльу апсуа ажвлара-политика уысхагIв, пIатIу зкву АААК апрезидент Шамба Тарас Согъвым апны Адуней апсуа-абаза конгресс агвып дрынйатI.
Асквшква 1992-2017 рагIан Апсуа-абаза уагIахъа рдуней ассоциация (МАААН – араса йангIаншагIваца йахьзын Адуней апсуа-абаза конгресс – аредакция ррытаразга) ахъада йъанатIа нкъвызгуз Шамба Тарас а-Конгресс шгIаншаз даквчважватI. Ауи йгIаликIгIатI уахьчIвала а-Конгресс «апсуа-абаза этнос радкIылра ауыс ахъазла згвы цхIауа, зкъару ту агIвычIвгIвыс щалас шIаква йъарнапIыцIу» магIны ду шаму. Ажва гьалам, йхIватI Шамба Тарас, а-Конгресс анхагIвчва гвып АААК ЙхIаракIу асовет ахъада Эгьзакь Мусса йунашва гвыбзыгъала йынхауата адахIвра бзиква шрымазлуш.
Тарас Мирон йпа йгIаликIгIатI апсуа-абаза этнос рпны Эгьзакь Мусса йыхьыз магIны шаму.
«Ауи дгIвычIвгIвыс дупI. Йажва дазцIабыргпI, сабап злу ауысква йнардзата йырхъйитI, апсуаквагьи абазаквагьи зхъа хIыладухауа дгIвычIвгIвыс нардзапI. Ауыс апны дадгалагIв джьгарпI», – йхIватI пIатIу зкву АААК апрезидент а-Конгресс аунашвачпагIв дйыквчважвауата.
Шамба Тарас АААК ауысхагIвчва йрыцагIвишатI сквшщарда рурала анхара апны йадикIылыз адырракви аъазари.
АААК архъйагIв секретарь Гицба Инар анйара апны йшгIаликIгIазла, АААК анхагIвчва гвып зынцIра апсуа-абаза этнос радкIылра йазыщтIазцIаз, сквшы 25 руацIа а-Конгресс ащаквгылра йадынхалыз агIвычIвгIвыс йъайынйаз швабыж йыргвапапI.
«ХIара зынла йгIахIтахъхатI хIуынйарныс. ХIабашталагIвчва ъабзазауа къральта хIъацалакIгьи, йъакIвызлакIгьи швабыж пхата йгIаргвалашвахитI шванйараква», – йхIватI Гицба Инар Шамба Тарас тшизынайырхауата.
Ауи йатайхIвахтI а-Конгресс амурадкви ахачIвкви тшшрымпсахыз йгьи сквшы 26 рапхъала йгIаджвыквлыз ауыс йшаквнагу апшта йнардзахра шатахъу.
Гицба Инар АААК ащтийыгIвчва апсуа-абаза диаспора ъабзазауа акъральква рпны йшцаз даквчважватI, ауат мурадта йрыму «абашталагIвчва рыцIа йауацIыхта рапхъанчIви псадгьыд Апсны ахабар дырдырра шакIву йхIватI».
Ауи йшгIацицIахызла, адуней акъральква йыртабзазауа хIабашталагIвчва зымгIвагьи йрылшитI а-Конгресс асатырква йгIарылалырныс, ауи анхара джьгарта йалазларныс.
Шамба Тарас адиаспора йрыуу ауагIа йызларабадыруа амальквагьи дрызцIгIатI. АААК ахабарргарта портал аунашвачпагIв Лазба Амина а-Конгресс апортал апсуа-абаза этнос ауысхагIвчва йрыуу щардагIвы йшрабадырыз гIалхIватI.
«ХIара дзачIвгIвычIвгIвысызлакIгьи гIальаматра йызхIымапI. ХIзабадыруа ауагIа рпхьадзара рыцIагьи йшалахIырхIуш хIазхъвыцитI, йалкIгIата къралькI хIанцара, хIабашталагIвчва гIахIаута апортал апны рхабар шхIыргуш хIащтапI», – лхIватI Лазба Амина.
Анйара йалакваз цри бызшва агIахчари атшауацIнарыхри руысгьи анахьанат ауыс хъадаквагьи йрыквчважватI. Анйара ацIыхъва АААК агвып Шамба Тарас дрыхадыргIвазатI апхъахьыла йыздынхалуаш а-Конгресс ауысква.
швталра йа тшаншвцIара атахъыпI.