"Согъвым. ЙанакIвызлакIгьи йуыцу агвхахIвара" гIарбарта гIахъыртIытI Апсны акъала хъада апны

АгIаншараква 03.07.2020 20:25 23436

Апсны акъала хъада апны Согъвым гIазырбауа асуратква ргIарбарта гIахъыртIытI.

Барганджиа Саид

Апсны АсуратгIвгIвчва радкIылара агIарбарта "Согъвым. ЙанакIвызлакIгьи йуыцу агвхахIвара" гIахъыртIытI ареспублика акъала хъада Аквта гIарбарта пещ апны. Ари ауыс ансисквша июль ахъа йдыртлапIалауа Согъвым амш йазынархапI. АгIарбарта дахъпшылитI апхъала Апсны акультура йаминистрыз Арсалиа Эльвира.

Ауи йшылхIвазла, аэкспозиция апсуа суратчпагIвчва йыргIвыз сурат 50 райхIа азнакIкIытI. Ага аршIыйагIвчва дасу йхатI йымазтIхIва, анхараквагьи ацапшымызтIхIва ауат зымгIва закIы йаднакIылитI – Согъвым.

Арсалиа Эльвира йгIалылкIгIатI "уыжвгIанчIви Апсны апны" ари "акъала гIарбара мурадта йызму йапхъахауа йшгIарбарту". Ауи хIгватра азыналырхатI Аквта гIарбарта пещ уъанашылуа апны агIарбарта гIахънатIуазшва Агвмаа Анзор йгIвыз асурат шгылу.

"Ауи ахъазгIваца йгьгIалхIымхтI. ЗымгIвагьи рхъвыхыгIвта, турыхдырыгIвта, "АпхъанчIви Согъвым" книга йгIвыта йырдыруа Агвмаа Анзор араъа суратчпагIвта хIпахь дгIагылитI. Ауи йынхара "АпхъанчIви Согъвым" асквш 1976 агIан йгIвытI", – лхIватI ахъпшылыгIв.

Ауи агIарбарта апны зыршIыйара уапшы йауаш асуратгIвгIвчва бергьыльква рыхьызква гIашIылпхьадзатI. Ауат йрыуапI Бутба Леварс, Семенцов Александр, Гуськова Екатерина, ДжьапIуа Батал датшагьи.

"АгIарбарта шабгу "амгIвалысыртаквала", айчважвараквала, азхъвыцраквала йалапI. Асуратква йрыцта араъа Согъвым ахъазла йапшым агIвгIвчва йырхIваз ажваквагьи гIарбапI, ауатгьи лахIвара чIыда гIауыларцIитI. ГвынгIвырапI ауат зквчважвауа акъала шакIву. Ари – ажвлара йырзынарху проектпI, араъа асураткви ажвакви йгьырхъазым – ари акъала хIкультура хъвыцща шщаквнаргылуа уазхъвыцырныс лшара гIаунатитI", – лгвгIанаграква хIыцагIвылшатI Арсалиа.

Семенцова Елена агIарбарта дасаспI, Согъвым апны сквшы 20 райхIа йбзазаз асовет йгьи аурышв суратчпагIв Семенцов Александр дипхIапI. Ауи лгвы шалагIваласуа гьылзыцIамкIтI, йауа ухIварыквын, лаба даъахмищтара йынхараква анахьанат асуратгIвгIвчва рынхараква йрыцта йъагIадырбауа ари йапхъахауа гIарбартапI. РыцIа пасата Согъвым апны Семенцов Александр йхъатачIв гIарбарта адыргалхьан.

"ХIыкъала хIсуратгIвгIвча аднакIылитI – уахьчIва йбзазаквауагьи йхIылахымгьи. Саргьи швабыж йсгвапапI саба Апсны ахъазла хвы зму суратчпагIвта дъаныркIву. Ауи Согъвым асквш 80-90-ква рагIан йшаъаз йгIайырбитI, ауесхъан, цIабыргыта, асуратчпагIвчва гвлахIара дукI рылан. Ансимшы ауат амшын атшпы "Амра" чарта апны тшазыркIкIуанта рдахIвракви рдамыхIвракви йрылачважвун", – йгIалгвалашвахитI Семенцова Елена.

АгIарбарта йгIадгылкваз дрылан ажурналист Абшилава Ланагьи. Ауи суратхъыхра бзи йылбитI, йалкIгIата – Согъвым сурат ахъылхырныс, йаргьи Согъвым гIазырбауа асуратква ргIарбарта ауи лыхъаз магIын ду амапI.

"Сара щарда цIуата араъа йгIарбу асуратква схъырхитI. Ауат йаразджьара йазкIкIыта уырпшырныс швабыж йгвлахIарапI. Анчва дырзыразхатI агIарбарта адызгалыз", – лхIватI Абшилава.