Трыкв адиаспора цхърагIара йазыбжата Апсны йгьи Лагъь КIавкIаз айщчва республикаква рпны йбзазауа атгIачваква рыхъазла гъын чгIвыча гIарщтитI.
Трыкв адиаспора йгIарщтийыз агвчIагIвчпара цхърагIара, йалкIгIата ахвыцквагьи адуквагьи йырзалху гъын чгIвычата комплект 1200, атрыкв къала Бартын йгIатырган Апсны йгIаргтI. Ауи аунашва АААК апортал йгIадйырдыртI а-Конгресс архъйагIв секретарь Гицба Инар.
АцхърагIара ауыс гIаджвыквызцIаз, а-Конгресс ауатыкв йгIатазцIаз АААК ЙхIаракIу асовет йалу ХIапIатI АхIмад йакIвпI.
«А-Конгресс ари агIаджвыквцIара абгата йацыркIтI. Трыквшта апны ахIатлара анхIазырха Апсны аунашвачпагIвчва тшырзынахIырхатI ауи гвчIагIвчпара цхърагIарата йырпхьадзарныс. Датшагьи хIрынйан хIрачважватI цхърагIара йазыбжу атгIачваква йрыдынхалуа ажвлара адкIылараква рунашвапчпагIвчва йгIаргуа ачгIвыча йызквнагу йшырзыршуш апшта», – йхIватI Гицба.
Ауи йшипхьадзауала, ари апш цхърагIара амагIны датша нархарагьи амапI, йшпакIву ухIварыквын рапхъанчIви псадгьыл апны абари йапшу амальквала адиаспора ркъару айщчвара зрыбагъьауа, жвлара магIны зму апроектква йрыларцIарныс рылшитI, ауипхьадза хIабашталагIвчва рцри хакв йтамызтынгьи Апсны абзазара уысква йрылата йшгIамгIвайсуа рылархIвитI.
АААК архъйагIв секретарь йшихIвазла, йгIаргыз ачгIвычаква аналырхра амщтахь агвчIагIвчпара адкIыларакви дари цхърагIара йазыбжу атгIачваква гIадрыбергьыльта йырзыршуштI. АчгIвычаква рызбжа цхърагIара йазыбжу атгIачваква рыхъазла Лагъь КIавкIаз айщчва республикаква йырзырщтиуаштI.
АцхърагIара ауыс гIазрыкIапыз АААК ЙхIаракIу асовет йалу ХIапIатI АхIмад ахабарргарта портал йшгIарайхIвызла, абари йапшу ацхърагIара Апсны йтабзазауа райщчва сквшщарда руарала йгIаддрадзитI. СынчIва Апсны абзазагIвчва рыхъазла цхърагIара адыркIылра апхъала йазалху хъвдаквцIара нкъвызгауа Апсны ргIащтийыгIв Харазия Вадимгьи АААК ЙхIаракIу асовет йалаквугьи йрачважватI.
«ХIара цхърагIара хIахIвауата Трыкв апны атекстиль компания пхатшаква тшырзынахIырхатI, ауат швабыж хIырзыразпI. АгвчIагIвчпара цхърагIара ркъарула йадыркIылтI зщала атрыкв, акурд, апсыуа, агвхъауа уагIахъаква йрыуу архарджьыгIвчва. ЙангIаджвыквхIцIа йгIашIарышвта мурадта йхIыман а-Конгрессгьи алата ацхърагIара зхъахIара мачIу атгIачваква согIата йдхIрадзарныс», – йхIватI ХIапIатI АхIмад.
Ауи йшихIвазла, акомплект 1200 рпны 400 саби чгIвычапI, 250 хъацIа чгIвычапI, 550 пхIвыс чгIвычапI. АчгIвычаква шIыцдзапI, архарджьыгIвчва рынхартаква рпны рейша йгIапшцIыргатI.
«ЦхърагIара гIахIдрадзарныс хIара архарджьыгIвчва рхъатала тшырзынахIырхатI, ауи йамагIнызлуш, зъара йнадзуш хIгьаламчважватI, дара-дара йщаквдыргылтI. УадыргIвана анхартаква хIгIарыкIвшумцара йгIапшцIыгIгахтI, хIазсакъуа йамгвахIцIан Апсны йхIщтитI», – йгIахIгвынйыргIвытI ХIапIатI.
ЙхIаракIу асовет йалу ари агIвычIвгIвыс йшипхьадзауала, арат ауысква здинла, зыбызшвала, зуагIахъарала йапшым ауагIа рагвынгIвра, рацIагылра дыргвышхвитI. Датшагьи рмагIны зладуу ари акIвпI: ауагIа абаргвыраква ррыдзрала йацацхъарагIитI, йгIадзынгылуа абанпараква аргванырчIвитI, Апсны апны агIвычIвгIвысагIари амамырри рыщата дрыбагъьитI.
АгвчIагIвчпара хIатлара амшынла йгIахъырган Апсны йгIаргтI, ауи йацхърагIатI Астомбыль апны йынхауа «Согъвым хIатланкъвгара компания».
«Ари амаль гIасрысабапуата йъагIахIцхърагIаз ахъазла швабыж сшырзыразу расхIвырныс стахъыпI «Согъвым хIатланкъвгара компания» аунашвачпагIв Метин Узун йгьи акапитан Исмет», – йгIацицIахтI ХIапIатI АхIмад.
Ауи датшагьи йшихIвазла, уыжв ласыла Трыквшта апсыуа культура квтаква рфедерация йрабадыруата агвчIагIвчпара цхърагIараква адыргалырныс ргвыгъапI. Ауи акIвпIта, йгIарщтийыз ари ацхърагIара гьцIыхъвам, ужвыгьи датша ащтагIайуаштI.
Зов отечества!
Огромная благодарность соотечественникам.
В единстве сила✊️
швталра йа тшаншвцIара атахъыпI.