XVII афестиваль «Герзмава Хибла швгIалрайгвитI…» октябрь а 20 атшын Согъвым астадион «Динамо» апны йакIвшатI.
Барганджиа Саид
XVII афестиваль «Герзмава Хибла швгIалрайгвитI…» Апсны астадион хъада «Динамо» апны апшыгIвчва зкьыгIвпхьдзара йнадзуата йакIвшатI.
ЙгIашвхIыргвалашвахпI, сынчIва афестиваль мартI мыз агIан йгIахъыртIытI – ауи агIан Москва аконсерватория азал ду апны аопера ашвахIвагIв ду, СССР ауагIа рартист, атеатр Ду асолист, Герзмава Хибла лынбжьагIв, ахIба пшдзата йлыщтаныкъвуз Соткилава Зураб йхъмаштылра знархараз аконцерт акIвшатI. Соткилава Зураб асквш 2017 сентябрь агIан адуней йхIваджьтI.
Афестиваль апрограмма йалата октябрь а 20 атшын Согъвым апны йгIахъвмартI Татарстан акъральыгIва симфония оркестр, Конторович Лев дзунашвачпагIву академия хор ду «Хор ашвахIвара азъазагIвчва», Россия аопера ашвахIвагIв, Башкортостан ауагIа рартист Абдразаков Ильдар йгьи лара аопера йачIва Герзмава Хибла.
Хвыдъа йакIвшатI йгьи йдудздзата
Афестиваль апрограмма байан, гIахъвмаррипхьадза цIолан, йауацIыхын, чIащыгIван.
«ЦIабыргыта, ари шIырпшыра змам шоу дудздзан, Согъвым абзазагIвчва ауи анцIрала ргвы йгIатахуштI. Герзмава Хиблагьи афестиваль асасчвагьи шIырпшыра змам, зынгьи йухъмаштылхуаш амузыка адунейла хIгIакIвдыршатI. Швабыж сырзыразпI йхIзадыргалыз абари агвыргъьахъв ахъазла», – абараса лгвгIанаграква хIыцагIвылшатI Апсуа телебара апродюсер Бебиа Анжела.
Афестиваль «Герзмава Хибла швгIалрайгвитI…» щарда цIуата адунейла абзибагIвчва амапI. Ауат апшыгIвчва афестиваль ъакIвшалакIгьи дара ъанызлакIгьи ауи рыла йшабуш йащтапI.
«Герзмава Хибла – адуней йыквта турых зхъырхIвгIауа дгIвычIвгIвыспI. Согъвым астадион апны ари аконцерт шакIвшуш аныгIдыр амщтахь йтахIымщахIауата тшадыгIгалтI Краснодар хIгIатыцIын хIгIайтI. Швабыж хIгвы арыпшкауата йыхIгвапахатI адунейла йбергьльу ари аопера ашвахIвагIв ду лпсадгьыл апны хвыдаъа аконцертква ъакIвлыршауа. ХIыгIвзачвагьи хIаргьи шIала йузымхIвушта хIыла пшытI. Анчва дылзыразхатI, квырмыш ду лзыхIчпитI», – лхIватI ашвахIвагIв лыршIыйара бзи йызбауа Бакиева Саида.
Асцена айачIваква гIаквылпхьадза анапIасра ду тшгIащтIнахуан. Герзмава пшдзадзата йылхIвуз арияква апшыгIвчва дзачIвызлакIгьи йгвы ацIгIвадза йнадзун.
«Швабыж сгвы йалахIатI! ЙзачIв ласы йалгайа аконцерт! АлахIвара пшдзаква ауи йгIахIыланацIаз асквш шабгу къару гIахIыртуата йаъазлуштI. Швабыж хIырзыразпI хвду ззыгIбауа Хиблагьи аконцерт адгалагIвчвагьи гIвынагьи цIгIвагьи змамкIва йщарду абарат алахIвара лашараква рыхъазла», – лхIватI Согъвым абзазагIв Ампар Миранда.
«Ласыла адуней гIалрыкIкIуштI» йгьи «йшабгу йшедеврпI» ззырхIваз
Афестиваль апны дгIахъвмартI апсуа балерина шIа, Санкт-Петербург аурышв балет академия йыцIу апсуа балерина шIа ЧквотIуа Кристинагьи. Ауи йылзалхта астадион апны балет уатыкв дрыхIазыртI. АпхIвыспачкIвын лгIахъвмарра апшыгIвчва щардагIвы йыргвапхатI.
«Сгвы гIатгвыргъьгIитI ауи йлапшта талант зму ачкIвынчви ахIвсси ъахIыму ахъазла. Кристина дангIахъвмаруаз сылапш лхъысымхуата сылпшуан. ХIхъа зладухуш ужвыгьи гIвычIвгIвыскI Апсны дауата адуней шгIалрыкIкIуаш йазхъасцIатI», – араса йылпхьадзитI апшгIвы Воуба Марта.
АуагIа ззымпшуаз джьащахъвара гIадырбатI Конторович Лев дзунашвачпагIву академия хор ду «Хор ашвахIвара азъазагIвчва». Ахор йгIархIватI агвы амчра йгIаквчважвауа апсуа ашва «Ахвра ашва». Астадион «Динамо» апны зкьыгIвпхьадзара йнадзауата йчIваз ауагIа зымгIвагьи ауи йгылата йаздзыргIвытI.
«Ауи анцIрала угвы йгIатахушта йаъан, сгвы гIанарыпшкатI, стамакъгьи йгIакIылагылтI. Анчва дырзыразхатI ауи асогIа ахъазла. Йара аконцерт абгата йгIахвта йшабгу музыка шедеврпI», – лхIватI Гагра абзазагIв Барцыц Амина. Ауи уыста йылчпан Согъвым дгIайтI афестиваль «Герзмава Хибла швгIалрайгвитI…» дапшырныс ахъазла.
Ари афестиваль адунейла апсуа «эксклюзивпI»
Аконцерт апхъала йгIайуаз атшын Герзмавагьи ауи йасасыз адуней йачIваквагьи ажурналистква рыхъазла пресс-конференция акIвдыршатI, ауаъа йауацIыхта сынчIва афестивальгьи ауи апрограммагьи йрыквчважватI.
Апсны акультури атурых-культура тынха агIахчари рминистр Арсалиа Эльвира аконференция апны даъан, ауи йгIахIгвынлыргIвытI Апсны ахъазла ари афестиваль амагIны здуу йгьи ауи апрограмма «эксклюзивта» йылпхьадзатI.
«Арат асквшква руацIа афестиваль швабыж йхIаракIу ауыс архъйитI, ауи абзирала апсуа культура адуней культура йахъвхатI. Анчва дылзыразхатI Хибла ари афестиваль ъагIаджвыквылцIаз ахъазла – асквш 2000-ква йгIашIарышвта йъагIамгIвайсуа. Йапхъахуз афестиваль Пицунда апны йакIвшатI, уадыргIвана Россия, Америка, Европа акъральква рпны. Сара йшазызбауала, Герзмава Хибла йакIвлыршауа фестивальипхьадза эксклюзивпI», – лхIватI Арсалиа Эльвира.
Датшагьи ауи йшгIалылкIгIазла, ари аконцерт «апсуа апшгIвы йзынархадзапI». Башкортостани Татарстани ауагIа рартист Абдразаков Ильдар йшгIайхIвазла, Апсны йхынхауата дгIайитI, ауи ахъазла дылзыразта пхата длызхIвахIвтI ахщата йпхьадзауа Герзмава Хибла.
«Анчва дбзыразхатI, Хибла, араъа съагIабрайгвалауа ахъазла, йшпакIву ухIварыквын ари ачIвыла агIайра сара сыхъазла гвлахIара дупI, насып дупI, гвапара дупI. Араъа сыгIвзачваква аъапI, алахIвара пшдзаквагьи анашх лашарагьи сдырчвитI. Араъа йгIаншауа йанакIвызлакIгьи сгвы йацчпапI – сахща Герзмава Хибла лбзирала. Афестиваль «Герзмава Хибла швгIалрайгвитI…» сыхъазла лкIгIара зму гвыргъьахъвыпI», – йхIватI ашвахIвагIв.
Лара Герзмава Хибла йшгIалылкIгIазла, сынчIва афестиваль агIвынаква тшауацIырхтI.
«Ари йсогIу концертпI, йгвыргъьахъву концертпI, ауаса ауи апрограмма аопера арияквагьи аланакIуата йнардзапI. Швабыж сайгвыргъьитI с-Апсны йацIагылырныс йхIазыру агIвзачва цIабыргква ъасыму. ХIара Апсны азъазара атурых алахIцIитI. Амузыка гIахIрысабапуамцара хIкъраль мамырта йшбзазуш апшта йхIчпуштI», – араса лгвгIанаграква хIыцагIвылшатI ашвахIвагIв.
Ауи йгIацылцIахтI ари апш концерт адгалра джьауапкIра шапщылу, ауи уагIа щардагIв ркъару шаларцIаз.
«Арат рапш гвып бзи сыцIагыламзарквын, абзихагIв ду Ачба Николай дсыдзхъагыламзарквын схъазы закIгьи гьсылымшушызтI. Швабыж йсгвапапI Николай Владимир йпа йапшу анбжьагIвчва сбзазара йъагIалалыз», – лхIватI Герзмава.
Йбергьльу ашвахIвагIв афестиваль «Герзмава Хибла швгIалрайгвитI…» асквш 2001 агIан Апсны апны йгIанлыршатI. Асквш 2014 йгIашIарышвта ауи агIвынаква тшауацIырхтI йгьи Москва аконсерватория азал ду, Станиславский К.С. йгьи Немирович-Данченко Вл.И. рыхьыз зхъу амузыка театр асцена, Вена а-Мюзикферайн азал хьапщ, Карнеги-холл, Швейцария акъала Санкт-Мориц рпны йакIвшатI. Афестиваль гIаншищтара ауи йалан адуней музыка абарат аграндква: Спиваков Владимир, Образцова Елена, Мацуев Денис, Абдразаков Ильдар, Дебора Браун, датшагьи. ЙалкIгIата афестиваль магIны амапI Апсны амузыка бзибагIвчва зымгIва рыхъазлагьи: ансисквша Герзмава лпсадгьыл апны йлыцгIалдитI йагъьу амузыкантква, йагъьу амузыка программаквагьи адылгалитI.
швталра йа тшаншвцIара атахъыпI.