11.02.2025 16:00 1019

АААКи Апсны Республика репатриацияла АкъральыгIва комитети рацынхара йгIалцIтI «Аураща» йгьи «Апсуа куашара» проектква.

Хутаба Алиса

«Аураща» проект 10 макъымкI аланакIитI, ауат йрылапI аршIыйара шIыцквагьи ауыжвгIанчIви макъымршIыйагIвчва шIыцта йанырцIахыз ашIалахIвара ашваквагьи. Гвымба Анри йшихIвауала, ауат интернет йтарцIахьатI.

«Ари зджьара йгIанымхауата магIны зму проектпI, йаргьи Яндекс музыка йгьи Apple музыка цифра уатыквква йгIарталхьатI. ХIара йхIтахъын адуней ауагIа аинтернет уатыквква рпны апсуа уагIахъа макъымква рызгIауырныс, йапшым апрограммаква йа авидео айшысква анырчпауа ауат рызгIарысабапырныс», – йгIаликIгIатI ауи.

АмакъымгIаныршагIв Агрба Тимур ауи ауагIахъа ргвбайара апны магIны зму алацIарата йшалуа гIаликIгIатI.

«ХIара ауыс амагIны тшазыгIдыруата, хIгвы аквкIта хIадгылтI. Сшхъвыцуала, йхIчпаз амакъымбзибагIвчва йгьырхъазым йызгвапхуш. Апроект архъйара зхъвыкI алазцIаз зымгIва хIырзыразпI», – йхIватI Агрба.

«Апсуа куашара» проект онлайн амальла апсуа гIахIвыща уазнабжьитI, ауагIахъа тынха «Instagram» аформатла абзазара йаланажьитI. Ауи 12 видео апхьарасахIаткI йнадзитI, йызтахъу зымгIвагьи тшырбжьарныс цхърагIагата йырзалуаштI. Ауыгьи хIуагIа ртурых, рцIасква, ргвбайара йыргIарбагапI. ДзачIвызлакIгьи йпны дшаъу рыцIа данахадзауа АААК асайт дталта тшибжьа йауаштI. «Шаратын» къральыгIва ансамбль агIахIвчва Ходжава Даниили Бебиа Амини апроект шIыц лактата йазалтI.

«Ари апроект салалырныс тшангIасзынадырха снамкIгIамкIуата зынла «Щта» – схIватI. Апсуа гIахIвыщаквала йшатахъу апшта йаныргIалта видео апхьарасахIат ужвыгьи йгьаъамызтI, саргьи ауи ауыс сгвыргъьачIвауа салалтI. Ауаъа апсуа гIахIвра айтыпаща йгьи анапIчпаща хъадаква гIахIырбатI, йызтахъу йара-йара штшырзибжьуш апшта. ХIара апсуа культура, апсуа гIахIвыща ауагIа йрылагIгитI, ауи хIгвы йаланархIитI. Анчва дырзыразхатI ари апроект архъйара йацхърагIаз зымгIва!» – лхIватI Бебиа Амина.

АААК ахьыла апроектква йырхъпшылуа Жьыба Дмитрий ауат хIуачIвымш йшазынхауа гIаликIгIатI:

«АгIвпроекткIгьи хIуагIахъа рфонд апны алацIарапI, ауат йгьсквшыкIым-йгьгIвысквшам заманта йыззынхуш – ауат рыгIамта цIхъва гьамам. УыжвгIанчIви Апсны апны ауи йапшу ашвапхаква мачIдзапI. Аконгресс ахьызла репатриацияла акомитет, йхъатала – Вадим Николай йпа, ауыс йапщылаз зымгIва сразыра расхIвитI. Арат йацхIырхъйаз проект дупI, ауат дахIвра шрауаш кьангьаш гьазгIагIгуам!»